˻Koro moloringi˼ Wale-Sambatemo^a pora nimbe, enonga pulu-pulu kongono-walemo wendo orumu kinie kolea sumbulu topa pepili paa muni-kinie-ou kolea Makatalla ambo Maria Yesusinge ónomo noseringi kou-kandena omba kanorumu. Omba kanopalie kou-kande kere-pulumu pipi siringi koumu perele-marele pupe ekendonga lepa kere-pulumu we lierimu kanorumu. 2 Kanopalie yu lkisipe pupe Saimono-Pita kinie Yesusi lombili andoli Yesusini ou konopu mondorumu yemo kinie^b moloringiline pupelie nimbendo: “Yembomane olionga Awilimu óno-koleana wendo lingi. Yu nosiengi koleamo olio naa pilkimulu.” nirimu.

3 Aku nirimu kinie pilkulie Pita kinie Yesusi lombili andoli ye te akumu kinie óno teringi kou-kandena pungele puringili. 4 Lkisiku pukululie, lombili andoli ye te akumuni Pita topa akili-lendepa yu kumbi-lepa óno teringi kou-kandena purumu. 5 Pupe kou-kandena wake tepa kanopalie Yesusi kulupi toko óno teringi múlume ˻mindi˼ we lierimu kanorumu, nalo yu sukundu naa purumu.

6 Kanu-kinie Saimono-Pita akilipe omba kou-kandena sukundu pupe kanopalie, Yesusinge ónomo kulupi toko óno teringi múlume óno teringi koleana we lepa, 7 yunge pengena ka toringi múlumu yunge penge lierimu koleana ka toringi mele we lierimu kanorumu. 8 Kanu-kinie lombili andoli kumbi-lepa orumumu yu kepe sukundu pupe kanopalie, ‘˻Yu paa˼ sike ˻lomboropa wendo pumu lepamo˼.’ nimbe tondolo-mundupe pilierimu. 9 (Pulu Yemonga bokumuni Yesusi lomboropa ola molomba ou nimbe sirimu^c nalo Yesusi sike lomboropa ola molorumu ou naa kanokolie yu lombili andolimene kanu ungumu naa pilku kondoringi. Yu kolorumu kinie ‘Kamu kolomu.’ konopu leko, ‘Lomboropa ola molomba.’ konopu naa lieringi.)

10 Kanoko pora sikululie yu lombili andoli yeselo kelko ulkendo puringili.

11 Kolea Makatalla ambo Maria Yesusi lombili andoli yeselo kumbi-leko puringili kinie akilipe ombalie Yesusi óno teringi kou-kande kere-pulune kola tepa angilierimu. Kola tepa angilipelie kou-kandena sukundu wake tepa kanorumu kinie 12 mulú-koleana angello talo wale-pakoli kake teli talo pakokolo Yesusi óno ou lierimune moloringili kanorumu. Te yunge penge ou lierimune molopa, te yunge kimbu lierimune molorumu.

13 Elone yundu walsikulie: “Ambomo, nambemune kola tekenoye?” niringili.

Yesusi lomboropa ola molorumu mele naa pilipelie yuni elondo nimbendo: “Nanga Awilimu yu liku mengo puku nosiengi koleamo na naa pilkiru.” nirimu. 14 Aku nimbelie yu topele topa kanorumu kinie yunge bulkundu Yesusi angilierimu kanorumu. Nalo ‘akumu Yesusi’ nimbe kanopa imbi naa sirimu.^d

15 Yuni nimbendo: “Ambomo, nu nawe korokolie kola tekenoye?” nirimu.

Yesusi yu ‘ponie tapu yemo’ konopu lepalie Makatalla ambo Maria yuni nimbendo: “Yemo, nuni Yesusi mengo punu liemo nosenu koleamo na ningu siyo! Yu lipu meli pambo!” nirimu.

16 Yesusini yundu nimbendo: “Maria.” nirimu.

Yu angilierimune ambomo kamu topele topa sumbi-sipe kanopalie Juda-yembomanga Ipuru-Ungu nimbelie “Raponai.” ^e nirimu. (Akumunge pulumu ‘Ungu Mane Silimu’.)

17 Yesusini nimbendo: “Na Tata molemona kelepo olando ou naa pundu kene na naa amboloyo! Nanga angenupilime molemelena puku enondo ningu sikulie ninindu: “ “Na kinie eno kinie olionga Lapa Pulu Yemo molemona kelepo olando pukuru.” nimu.” ni!” nirimu.

18 Kanu-kinie Maria yu Yesusi lombili andolime moloringine pupe yu Awilimu^f kanorumu mele kinie Awilimu yuni nirimu mele kinie pupe temane topa sirimu.

19 Yesusi lomboropa ola molorumu kanu walemo Juda-yembomanga pulu-pulu kongono-wale lierimu kanumunge ipupene lepa kolea kalá torumu kinie lombili andolimene Juda ye-awilime^g pipili kolkolie niringimuni, eno moloringi ulkemo lloko toko molangi Yesusi omba eno moloringine angilipe enondo nimbendo: “Eno konopu pe nipili molaa!” nirimu. 20 Aku nimbelie, ‘Na toringi urume kanokolie ‘Na sike enonga Awilimu omba angilkimu.’ ningu piliengi!’ nimbe yunge kiselo kinie wangune kinie lipe ora sirimu. Awilimu kanokolie enone konopu paa awili-teko siringi.

21 Yesusini enondo altopa nimbendo: “Eno konopu pe nipili molayo! Tatane na lipe mundorumu mele eno nane lipu mundukurula.” nirimu. 22 Aku nimbelie yuni eno moloringine kere-múlumu popo topa ulsu mundupelie nimbendo: “Mini Kake Telimu enonga konopune molopili lieyo! 23 Enone yembo te ulu-pulu-keri tembama ‘Omba manie pupili!’ níngi liemo kapola kanu ulu-pulu-keri tembama omba manie pupe pora simbemo. Molo yembo tenga ulu-pulu-kerime ‘We pepili!’ ninge kinie kapola kanu yembomonga ulu-pulu-kerime we pembamo.” nirimu.^h

24 Yesusi lombili andolime moloringine Yesusi lomboropa ola molopalie ou orumu kinie enonga ye te naa molorumu. Kanu yemo Tomasi. (Yunge imbi te “Didimasi” ⁱ niringila.) Yu Yesusi lombili andoli ye rurepo akumenga tela. 25 Ye-lupemane “Awilimu ya omu kanomulu.” niringi kinie

yuni ‘Kolo tongi.’ konopu lepalie nimbendo: “Nanga mongone yunge kíne pirimúni toringi urumu naa kanopo, akune nanga ki-sundumu suku naa mundupu, tolone wangune toringine nanga kimu suku naa mundondu liemo ‘Yu lomboropa ola molomu.’ nimbu naa pilimbo, paa mólo!” nirimu.

26 Pe wale engaki omba purumu kinie Yesusi yunge lombili andolime altoko Tomasi pea ulkena suku moloringi. Eno ulke moloringimu kunema pali lloko toringi nalo Yesusi omba eno moloringine angilipelie, “Eno konopu pe nipili molaa!” nirimu. 27 Nimbelie yuni Tomasindu nimbendo: “Nunge ki-sundumuni nanga kimu simbi tondokolie kanoyo! Nanga wangune nunge kimu sinio siku mundukulie kanoyo! Kanokolie na ‘Lomboropa ola manda naa molomba.’ ningu pilkinu mele naa teko, ‘Sike lomboropa ola molomu.’ ningu tondolo-munduku pilí!” nirimu.

28 Tomasini yundu nimbendo: “Nanga Awilimu, nanga Pulu Yemo.” nirimu.

29 Kanu-kinie Yesusini yundu nimbe sipelie nimbendo: “Na kanokolie ‘Sike lomboropa ola molomu we molemo.’ ningu pilkinu. Na naa kanokolie ‘Yu sike lomboropa ola molorumu, kinié we molemo.’ ningu tondolo-munduku pilinge yemboma eno Pulu Yemone “Konopu peanga pepili molko kondangi!” nilimo aulkena molonge.” ^j nirimu.

30 Yesusi lombili andolime kanoko molangi Yesusi yuni ˻Pulu Yemone yu lipe mundorumu-ne omba molorumu, yu Pulu Yemo-kinie tapú-topa molopa kongono tenderimu mele˼ lipe ora sirimu ulu-tondolo awisili^k terimu, kanu ulume pali i bokune naa tondu, pokore mindi tondu.^l 31 Nalo ‘Yesusini enonga nimbe tenderimumunge eno alieli molko kondoko mindi pangi!’ nimbu ‘ ‘Pulu Yemone “Eno nokopa kondomba ye te lipu mundumbo.” nimbe ou mako torumu yemo, pe Yesusi yu sike kanu ye-nomi Kirasimu^m orumu.’ ningu pilku, ‘Yu sike Pulu Yemonga Malo.’ ningu piliengi!’ nimbuⁿ i boku wallo-kolte tondu. Kanu-kinie eno sike aku-siku ningu tondolo-munduku pilinge kinie yuni ya ma-koleana enonga nimbe tenderimumunge eno alieli molko kondoko mindi punge.^o