2 (Nalo Yesusi yu lombili puringi yemboma yuni no naa linderimu, yu lombili andoli yemane^d yemboma no linderingi.)

3 ˻Yesusini yembo no linderimu˼ temane akumu Parisi-yemane pilieringi mele pilipelie Awilimuni kanu walemonga kolea Judia-Disiriki mundupe siye kolopa kolea Gallilli-Disirikindu kelepa pumbe purumu.

4 Yu Gallilli purumu aulke akumu kolea Sameria^e awi-suku-singine lepa purumu.

5 Aulkemo aku-sipe lierimu-ne yu kolea Sameria lierimu taono tenga orumu, aku taonomonga imbimu Saika. Aku koleamo Juda-yembomanga anda-kolepa Jekopone yunge malo Josepo sirimu mamonga nondopa lierimu.

6 Jekopone ‘No molopili!’ nimbe muru akuorumu aku no-mongolomo kanu mamonga lierimu.^f Yesusi aulke sulune orumumunge siye terimu kulu aku no-kélona omba manie molopa múlu pilierimu. Kolea awi-tangoli mele akune omba molorumu.

7-8 (Yesusi yu lombili andoli ye pea oringime yu mulu pilipe molopili eno langi topo toko lingendo Saika taonona puringi.) Pe yu mulu pilipe molorumu kinie Sameria-ambo te no kolombando orumu kinie Yesusini yundu nimbendo: “No te nambo kolko si!” nirimu.

9 Sameria-ambomone yundu nimbendo: “Nu Juda-yemo. Na Sameria-ambomo. Pe nambemu-ne nando “No kolko si!” nikinuye?” nirimu. (Aku nirimumunge ungu-pulumu i-sipe: Juda-yembomane Sameria-yemboma konopu keri panjiku langi telumu moke teko naa nongo, eno-kinie telune tapu toko naa andoringimunge aku nirimu kanumu.)

10 Yesusini topondopalie ambomondo nimbendo: “Pulu Yemone méle we silimo mélemo pilku, i ye “No kolko si!” nikimu yemo kanoko imbi silinanje yundu “No si!” nilina kinie yuni konde molopa mindi puli nomo^g nu silke.” nirimu.

11 Ambomone topondopa nimbendo: “Awilimu, nu no koloni mingi te naa menu, no-mongomo paa maniendopa lemo. Pe i no konde molopa mindi puli nikinu nomo nu tena kolkolie siniye?

12 Olionga anda-kolepa ye Jekopone i no-mongolomo sirimu kanu yemo, yu kinie yunge ambolangoma kinie kongime kinie i nomo noringi, ‘kanu yemo maniendopa nu olandopa.’ ningu nikinuye?” nirimu.

13 Yesusini topondopa nimbendo: “I no-mongolona no nonge yemboma altopa no waka lemba,

14 nalo nane nosimbo nonge yemboma pe eno no paa waka naa lemba. Nane paa sike nikiru: “Nane no simbo akumu nonge yembomanga konopune no pikipe mindi molopa, konde molko mindi punge ulu-pulumu simbe.” nikiru.” nirimu.

15 ˻Yesusini ungu-iko torumu mele naa pilipelie nirimumuni,˼ ambomone yundu nimbendo: “Awilimu, na no altopa waka naa liepili, ya altopo taki-teki ombo no naa kolambo kene nuni no nikinumu nambo si!” nirimu.

16 Yuni yundu nimbendo: “Nunge yemo pea kelko wangili, puku walsi-pou!” nirimu.

17 Ambomone topondopa nimbendo: “Nanga ye te naa molemo.” nirimu.

18 Ou nu ye kise-pakera purunu. Pe kinié nu ye te pea pelembelemo nunge emena mólo! Nuni kinié ungu nikinumu sike nikinu.” nirimu.

19 Ambomone yundu nimbendo: “Awilimu, na pilkiru nu Pulu Yemone ungu-umbu tondolemoma pilku yemboma ningu silino ye te lepamo.^h

20 Olionga anda-kolepalimene i ma-pangine Pulu Yemo popo toko kapi niringi nalo eno Juda-yembomane ningendo: “Pulu Yemo popo toko kapi ninge koleamo paa Jerusalleme mindi.” nilimele.” nirimu.

21 Yesusini tondolo-mundupe nimbendo: “Ambomo, nane ya nikirumu nu pilku lieni! Wale te wendo ombá kanu walemonga i ma-pangine kepe Jerusalleme kepe yembomane Lapa popo toko kapi naa ninge.” nirimu. ˻Aku ungumunge pulumu i-sipe: “Koleamanga pali Pulu Yemo popo toko kapi ninge.” nimbe nirimu kanumu.˼

22 “Eno Sameria-yembomane popo toko kapi nilimele yemo pilku sunduku we nilimele. Olio Juda-yembomane popo topo kapi nilimolo yemo molemo mele pilipu kondolemolo. Nambemu-ne, mana-yemboma Pulu Yemone lipe tapondopa, mindili nolemela aulkena wendo lipe, yu-kinie pea molko kondonge aulkena lipe mondolemo ulu pulumu Juda-yemboma-kinie wendo ombá, enone koleamanga pali yemboma liku ora singemonga aku-sipe.

23 Nalo Pulu Yemo sike popo toko kapi ninge yembomane Tatanga ungumu ‘Sike ungumu.’ ningu pilku yunge Minimuni tondolo silimomonga Pulu Yemo popo toko kapi ninge wale wendo ombámo koronga wendo omu. Pulu Yemo aku-siku popo toko kapi ninge yemboma Tatane korolemomonga kanu walemo wendo omu.

24 Pulu Yemo yu minimu, akumunge yu popo toko kapi ninge yembomane yunge Minimuni tondolo silimomonga ‘Yunge ungumu sike-ungumu.’ ningu sumbi-siku aku tenge.” nirimu.

25 Ambomone nimbendo: “Ye-nomi Mesayamoⁱ ombá. Yu ombalie ungumenga pulume pali olio mimi-sipe nimbe simbe mele na pilipu molio.” nirimu. (Ipuru-Ungune ‘Mesaya’ niringi akumu, Giriki-Ungune ‘Kirasi’^j niringi aku unguselonga pulumu telumu. Unguselonga pulumu i-sipe: Pulu Yemone “Olio nokopa kondomba ye te lipu mundumbo.” nimbe mako torumu ye-nomi kanumu.)

26 Kanu-kinie Yesusini tondolo-mundupe nimbendo: “Nu “Ye-nomi Mesayamo ombá.” nikinu akumu na. Na nu-kinie ungu nimbu molkombolo-yemo kinie, nuni “Ye-nomi Mesaya” nikinu kanu yemo kinie, ye telumu.” nirimu.

27 Yu aku nimbe molopili yu lombili andoli yema kelko yando ongolie niringimuni, yu ambo te-kinie ungu ningu moloringili kanokolie mini-wale munduku konopu awisili liku mundoringi. Nalo enonga ye tene “Nu nambolka mélte lini tekenoye?”, molo “Yu-kinie nambemu-ne ungu ningu molembeleye?” ningu tene kepe naa walseringi.

28 Kanu-kinie ambo kanumu yunge no-mingimu mundupe siye kolopa yu kelepa kanu taonona yando pupe yembomando nimbendo:

29 “Na ulu terindume pali ye tene na nimbe simu yemo eno ongo kaname! Pulu Yemone “Olio nokopa kondomba ye te lipu mundumbo.” nirimu ye-nomi Kirasimu yunje.” nirimu.

30 Aku nirimu kulu pilkulie yemboma taono munduku siye kolko Yesusi molorumune onge oringi.

31 Aku teko molangi yu lombili andolimene yu paa karaye tekolie ningendo: “Rapai,^k langi te nou!” niringi.

32 Nalo yuni enondo nimbendo: “Na langi nombómo lemo, nalo akumu eno naa pilku naa kanolemele.” nirimu.

33 Aku nirimu pilkulie yu lombili andolimene anjo-yando kere-pale ningulie ningendo: “Yembo tene langi ou memba omba simunje?” niringi.

34 Yesusini nimbendo: “Nanga langi i-sipe: Na ‘kongono teani pu!’ nimbe lipe mundorumu yemone^l konopu silimo ulume tepo, yunge kongonomo tepo pora simbo. Akumu nanga langimu.^m

35 Enone “Oli kise omba pumbe kinie rasi-witi nou lemba, inie topo lipu nosimolo.” nilimele kanumu. Nalo nane enondo nimbondo: “Poniema kaname!ⁿ Langi pali koronga nou liemu.” nikiru.

36 Langi inie tondolemo yemo langi inie tondolemomonga méle kaloli koronga lipe, ‘Lepa mindi pupili!’ nimbe langime inie tondopa molemo. Aku tendelemomonga ponie tepa langi panjerimu yemo kinie langi inie tondolemo yemo kinie peaselo konopu singele.

37 Akumunge ungu te pelemomo sike. ‘Ye tene langi umbu tondolemo. Tene langi inie tondolemo.’ nilimele ungumu sike.

38 Langi enone umbu naa toringime nane “Eno inie to-paa!” nimbu lipu mundorundu. Yembo-lupemane ponie mindili siku teringi, nalo yembo-lupemane teringi langime eno inie tolemele.” nirimu.

39 Ambomone “Na ulu terindume pali yuni na nimbe simu.” nirimu kulu pilkulie kanu taonona moloringi Sameria-yembo^o awisili ‘Yu sike ˻Pulu Yemone ‘Eno nokopa kondomba ye te lipu mundumbo.’ nimbe ou mako torumu˼ ye-nomi Kirasimu.’ ningu tondolo-munduku pilieringi.^p

40 Akumunge Sameria-yemboma yu molorumune ongo, “Nu paa ya pea molamili!” niringi, kanu-kinie wale talo yu eno-kinie molorumu.

41 Kanu-kinie yembo awisili pea yu-yuyu ungu nirimumu pilkulie ‘Yu sike ˻ye-nomi Kirasimu omba molemo. Yuni sike nikimu.˼’ ningu tondolo-munduku pilieringila.

42 Enone ambomondo ningendo: “Nuni ou ungu ninumu pilipu ‘Yu sike ye-nomi Kirasimu.’ nimbu tondolo-mundupu piliemulu nalo kinié olio-oliolio yunge ungumu pilipulie ‘Sike i yemo olio mana-yemboma Lipe Tapondopa Mindili Nolemela Aulkena Wendo Limo Yemo^q molemo.’ nimbu tondolo-mundupu pilkimulu.” niringi.

43 Sameria-yemboma-kinie wale talo molopalie Yesusi eno mundupe siye kolopa kolea Gallilli-Disiriki pumbe purumu.

44 (Gallilli akumu Yesusi yunge pulu-koleamo. Ou walse Yesusi yuni nimbendo: “Pulu Yemone ungu-umbu tondolemoma pilipe yemboma nimbe silimo ye tene yunge pulu-koleamonga yemboma ungu nimbe silimo kinie pilkulie nilimelemone, enone ‘Yu olionga we-yere. Yu imbi mololi ye te mólo!’ ningu yu nilimo ungume naa pilku limele.” nirimu kanumu.)^r ˻‘We-koleamanga yembomane kanu yemonga ungumu limele nalo yunge pulu lemo yembomane naa pilku limele.’ nimbe nirimu.˼

45 Yu Gallilli suku purumu kinie Gallilli-yembomane yu orumu kanokolie “Papu okono.” ningu konopu siringi. Ou Pulu Yemone Juda-yembomanga anda-kolepalime Naa Topa We Omba Purumu mele^s pilieringi walema wendo orumu kinie eno Jerusalleme puku molangi yuni akune ulu mare terimu kanoringimunge enone aku-siku teringi.

46 Yesusi kolea Gallilli-Disiriki pupelie altopa Kena-taonona sukundu orumu. Kanu taonomonga ou yuni umbu-no koloringime no-waene a lenderimu.^t Kapeniame taonona ye-nomi-kingimunge kongono tendeli ye-awili te kanu kolea Kena omba molorumu, kanumunge malo kuru awili te torumu.

47 ‘Yesusi kolea Judia-Disiriki mundupe siye kolopa kolea Gallilli-Disiriki sukundu orumu.’ pilipelie nirimumuni, kanu yemo Yesusi molorumune pupelie nirimumuni, yundu mawa tepalie nimbendo: “Nanga kangomo nondopa kolomba tekemo kene maniendo ongo yu teko konde li!” nirimu.

48 Aku nirimu kinie pilipelie Yesusini yundu nimbendo: “ ‘Na sike ˻Pulu Yemo-kinie molopalie mana maniendo orumu˼.’ we ningu naa pilinge lemo. Pulu Yemone ulu-tondoloma telemo mele ‘Yuni aku-sipe mele temba kinie kanopolie ‘Yu sike ˻Pulu Yemo-kinie molopalie mana maniendo orumu˼.’ nimbu tondolo-mundupu pilimolo.’ ningu nando alieli “Ulu-tondoloma ongo tei!” ningu mawa telemele.”^u nirimu.

49 Kingimunge kongono tendeli ye-awilimuni yundu nimbendo: “Awilimu, nanga kangomo mini ou naa pupili nu welea maniendo ou!” nirimu.

50 Yesusini yundu nimbendo: “Marena konde pumu kene pu!” nirimu.

51 Maniendo pumbe purumu kinie yunge kendemandema aulkena ongo yu maniendo orumu kanoko likulie enone yundu ningendo: “Marena konde pumu.” niringi.

52 Kanu-kinie yuni enondo nimbendo: “Ena nambolkana kuru topa keliemuye?” nimbe walsipe pilierimu.

53 Lapane pilipelie Yesusini “Marena konde pumu.” nirimu kanu enamonga ‘Kangi nomba keliemu lepamo.’ nimbe pilipelie, yu kinie yunge ulke peringi yemboma kinie enone ‘Yesusi yu sike ˻Pulu Yemo-kinie molopalie mana manie orumu lepamo˼’ ningu tondolo-munduku pilieringi.

54 Kolea Judia-Disiriki mundupe siye kolopa^v kolea Gallilli-Disiriki omba molopalie Yesusini kangomo tepa konde lsimu kanu ulumu aku koleana yu molorumu mele lipe ora sirimu ulu-tondolo talo-sipe mele terimu. Te ou walse aku koleana umbu-no koloringime no-waene a lenderimu kanumu.^w