Yesusi Kinie Nikodimasi-selo Kerepale Niringili Temanemoa
3
(Pulu Yemonga ungumu. Kolomongo-kanga wane.)
˻Juda-yembomanga ye mare Parisi moloringi. Aku˼ ye Parisimenga ye te, imbi ‘Nikodimasi’, yu Juda-yemboma nokorumu kanjollo ye te,b
2 yu Yesusi molorumune ipuluelic ombalie nirimumuni, yundu nimbendo: “Rapai,d ‘Nu Pulu Yemo pea molkololie ungu-mane sinindu orunu.’ nimbu pilimolo. Ye te ‘Pulu Yemo-kinie naa molkanje Pulu Yemone ulu-tondoloma telemo mele nuni teleno aku-sipe yuni manda naa telka. Ulu telenomane Pulu Yemo pea molembele mele lipe ora silimo.’e nimbu pilimolo.” nirimu.
Jesus speaks with Nicodemus (John 3:1-21)
3 Yesusini topondopa yundu nimbendo: “Nane nundu paa sike nimbu sikiru: “Yembore kelko naa mengi liemof kanu yembomone Pulu Yemo ye-nomi-kingimu molopa yemboma nokolemo koleamog manda naa kanopa, yunge talapena manda naa molomba.” nikiru.” nirimu.
4 Nikodimasini yundu nimbendo: “Yembo te anda lepa molemo kinie yu nambeko mengeye? Yu anumunge olona altopa manda suku pumbe, anumuni yu manda membaye?” nirimu.
5 Yesusini topondopa nimbendo: “Nane nu paa sike nimbu sikiru: “Yembo te nomone kepe Minimuni kepe mei naa mengili liemo kanu yembomo Pulu Yemonga ambolangoh naa molopa, Pulu Yemo ye-nomi-kingi molopa nokolemo koleana suku manda naa pumbe, mólo!” nikiru.
6 Méle kangimuni melemó méle akumu kangimu, yu mana molomba mélemo mindi; méle Pulu Yemonga Minimuni melemó méle akumu minimu, aku mélemo mindi Pulu Yemo molemona manda pupe molomba.
7 “Akumunge nane nundu nimbondo: “ ‘Pulu Yemo ye-nomi-kingimu molopa nokolemo koleana pamili!’ ninge yemboma pali ou altoko meangi!” nikirumundu konopu awisili naa lieyo!
8 Poporomemo yuyu pilipe kolea lupe-lupemanga tolemo kinie enone yunge ungumu pilku, mélema lope-lape telemo kanolemele, nalo yu naa kanoko yu wendo olemona kepe pulimona kepe naa kanolemele. Pulu Yemonga Minimu aku-sipela. Minimuni melemó yemboma mini konde pepili eno paa yembo lupe mele molemele yembomane kanolemele, nalo ˻Pulu Yemonga˼ Minimuni kanu yemboma mini kondema silimo kanu Minimu naa kanolemele.” nirimu.
9 Nikodimasini yundu nimbendo: “I ulume nambepa wendo okomoye?” nirimu.
10 Yesusini yundu nimbendo: “Nu Isirele-yembomanga ungu-mane sili ye te nalo i nikiru mele naa pilkinu lepamo.
11 Nane nundu paa sike nimbu sikirumu: Olio pilimolomando nilimolo; kanolemolomando nimbu silimolo. Nalo i ungu nilimolo ungume enone pali pilku limele yembo te mólo!
12 Ya ma-koleana ulume eno nimbu silio kinie enone ‘Kolo tokomonje.’ ningu pilimelemonga pe kinié mulú-koleana ulume nimbu sindu liemo ‘Sike nikimu.’ ningu nambeko manda tondolo-munduku pilingeye? Manda naa pilinge lemo.
13 Yembo telu kepe olando-siku mulú-koleana suku naa puringi. Ye telumu mindi, mulú-koleana maniendo-sipe orumu yemo mindi ou mulú-koleana molorumu. Yu Manie Omba Mana-Ye A Lierimu Yemo.i
14 “Ou Mosisini yembo naa peli kolea kune kongi-ka-wambiye kou-kapane telimu lipe ola uku topa panjerimu melej aku-siku yembomane Manie Omba Mana-Ye A Lierimu Yemo liku ola uku toko panjinge.k
15 Kanu-kinie, ˻ou yembo wambiyemane nongo kondoringi kolonge teringi yembomane Mosisini lipe ola uku topa panjerimu wambiye kapane telimu kanokolie konde puringi kanu mele˼ pe kinié aku-siku ‘Yembomane yu-mele-mele ‘Manie Omba Mana-Ye A Lierimu Yemo yu ulume tepa molemo mele sike.’ ningu tondolo-munduku pilingel yemboma pali molko kondoko mindi pangi!’ nimbe Pulu Yemone ‘Yu unjona ola uku toko panjengi!’ nimbé nirimu.” nimbe Yesusini nirimu.
16 “Pulu Yemone mana-yemboma konopu paa awili-tepa mondopalie yunge Malo telumu mindi molorumu nalo yu ˻mana-yemboma˼ sirimu. ‘Yembomane yu-mele-mele ‘Yu sike ˻Pulu Yemone sirimu, olio lipe tapondopa nokopa kondoli yemo˼.’ ningu yu tondolo-munduku pilku molonge yemboma mindili nongo molko kenjinge koleana naa puku, alieli molko kondoko mindi pangi!’ nimbe yunge Malo sirimu.m
17 “Pulu Yemone Malondo “Nuni mana-yemboma kote pilku eno ka-ulkena liku mundeni pu!” ni naa nirimu. ‘Nanga kangomo eno lipe tapondopa mindili nolemela aulkena wendo lipe na-kinie molko kondonge aulkena lipe mondopili!’ nimbe yuni Malondo “Ma-koleana manie pu!” nimbe yu lipe mundorumu.n
18 Yembo “Yu sike ˻Pulu Yemonga Malo, olionga nimbe tenderimu yemo˼.” nimbe tondolo-mundupe pilipe molomba yembomonga kote naa pemba. Nalo yembo tene ‘Yu aku-sipe naa molemo. Nanga nimbe ulu te naa tenderimu.’o nimbe pilimbe yembomo, yunge kotemo koronga wendo okomo. Kanu yembomone Pulu Yemonga Malo telumu mindi molemo kanumundu ‘Yu sike Pulu Yemonga Malo mólo!’ nimbe, yu nimbe naa piliemu-ne kanu yembomo kote pilimo yemone lipe kote tendepa “Yu kolopili!” nimbe koronga-ou tenderimu.
19 “Kotemonga ungu-pulumu i-sipe: Pa telimu mana wendo orumup nalo mana yembomane ulu-pulu-kerime mindi tekolie pa telimu konopu naa mondoko sumbulu tolimu mindi konopu mondolemele.
20 Yembo ulu-pulu-kerime telemelemane pa telimu kanoko keri kanokolie, ‘Pa telimuni nanga ulume mona lendemba.’ ningu pa telimunge wendo naa olemele.
21 Nalo yembo ulu sikema telemo yembomone ‘Pulu Yemone na lipe tapondolemo-na i ulu-pulu-sikema telio kene telio ulume yembomane kanangi!’ nimbe pa telimunge yu wendo olemo.” nirimu.
No-Lindeli Jonone Yesusi Molorumu Mele Nimbe Sirimu Temanemo
22 Pe Yesusi kinie yunge lombili andoli yema kinieq kolea Judia-Disiriki lierimu kolea tenga pukulie niringimuni, akune wale mare yu eno-kinie molkolie, yuni yemboma no linderimu.r
John testifies about Jesus (John 3:22-36)
23 Jono yu yemboma no lindipe molorumula. Kolea Sellimi nondopa kolea Inono no awisili omba purumu kulu Jono yuni akune yemboma no linderimu, yembo awisili yu molorumune no linge oringi.
24 (Jono yu ye-nomi-kingi Erotene ka ou naa sipilis aku tepa molorumu.)
25 Walse ˻No-Lindeli˼ Jononga lombili andoli yema kinie Juda ye te kinie anjo-yando tondolo kere-pale ningulie, “Olio nambepo kimbu ki kangime kulumiye tomolo kinie Pulu Yemone olio kake temba kanombaye?” ningu kere-pale niringi.
26 Pe Jononga lombili andolime Jono yu molorumune ongolie ningendo: “Rapai,t ye te No-Jodane nekendo nu pea moloringili kinie nuni yu molemo mele ningu sirinu kanu yemone no lindipe molemona yembo awisili pukumili.” niringi.
27 Aku niringi pilipelie Jonone topondopa nimbendo: “Mulú-koleana Pulu Yemone ‘Ye te ulu te tepili!’ ni naa nilkenje kanu yemone manda naa telka.
28 Nane eno ou nimbu sirindu pilieringi mele i-sipe: Nane nimbondo: “Pulu Yemone ‘Olio nokopa kondomba ye te lipu mundumbo.’ nimbe mako torumu ye-nomi Kirasimuu na mólo! Pulu Yemone ‘Ye-nomi Kirasimu molomba yemo yu ombá.’ nimbe na ou kumbi lepa lipe mundorumu.” nirindu pilieringi kanumu.
29 Ye ambo limbe ambomo yemo yunge mindi. Ye ambo limbe yemone ungu nimbé mele yemo yunge pulu lemba yemone pilimbendo komu tendepa molomba. Yunge ungumu pilipelie paa konopu simbe. Akumunge yemo-kinie pulu lemba yemo konopu simbe mele na aku-sipu kamu konopu silio.v Ambo limbe yemo olandopa. Yunge pulu lemo yemo yu-kinie we tapu topa molemo, aku yemo maniendopa.
30 Aku-sipe mele ne no lindipe molemo yemo yunge imbimu sike paa olandopa pumbe. Nanga imbimu sike manie pumbe.” nirimu.
31 Ye wi-ola molopalie maniendo orumu yemo yembomanga pali yu olandopamo. Olio mana-yembo molemoloma mana-mélemanga mindi molopo, mana-mélemanga mindi imbime nimbu sipu temane tolemolo. Olio maniendopa, mulú-koleana molopalie manie orumu yemo yu yembomanga pali olandopa.
32 Yuni mulú-koleana kanopa pilierimu mele nimbe silimo nalo yembomane “Kolo tokomo.” ningu liku su siku naa pilimele.
33 Yembo tene yunge ungumu pilipe lipe “Sike nikimu.” nimbé yembomone aku-sipe “Pulu Yemone sike nilimo.” nimbéla.
34 I Pulu Yemone lipe mundorumu yemo Pulu Yemo yunge Minimu paa awili-tepa silimo konopune pepa kapola telemo-kolo yuni Pulu Yemonga ungumu sumbi-sipe nilimo.
35 Lapane Malo konopu mondopalie ‘Mélema pali Malone nokopili!’ nimbe ty sirimu.
36 Yembo tene ‘˻Yu sike nikimu.˼ Yu sike Pulu Yemonga Malo.’ nimbe tondolo-mundupe pilimbe yembomo alieli konde molopa mindi pumbe, nalo yembo te Malo bulu sipe yunge ungumu lipe su sipe naa pilimbe yembomo konde mololi ulu pulumu naa limbe. Aku yembomo kinié kepe pe kamu-kumu kepe Pulu Yemone mindili lipe simbe ulu-pulumu yu-kinie pelemo.