YESUSI MINDILI NOMBA KOLOPALIE, LOMBOROPA OLA MOLOPA MULÚ-KOLEANA KELEPA PURUMU TEMANEMO
Kolomongo-Awili 11–16
Ye-Nomi-Kingi Te Kolea Tenga Suku Pumbe Purumu Kinie Teringi Mele Yesusi Jerusalleme Suku Pumbe Purumu Kinie Aku Siku Teringi Temanemoa
11
(Kolomongo-kanga wane. Pulu Yemonga ungumu.)
˻Yesusi kinie yu lombili andolime kinie˼ eno kolea-awili Jerusalleme nondoko ongo, ma-pangi te ‘Ma-Pangi Unjo-Ollipi Ponie’ nili akune lemo kolea kanga talo, Betepasi kinie Betani-selonga oringi. Kanu-kinie Yesusini yu lombili andoli ye talo lipe mundupelie,b
2 elondo nimbendo: “Ne kolea-kanga kanokombelena pukululie kongi-dongi walo te, yembo te yunge bulu-mingine walsikele kepe naa molopa andorumumu ka teko panjingemo ne sukundu molomba kanongele, kanumu puku posiku yando mengo wangili pale!
3 Posingele teko molongele kinie yembo tene elondo “Aku nambemune tekembeleye?” nimu liemo elone i-siku niengili: “Awilimuc yu ‘Dongimuni mepili!’ nimu-ne ombo likimbulu. Yu dongi-walomo altopa nondopa yando lipe mundumbe.” niengili!” nimbe elo lipe mundorumu.
4 Lipe mundorumu yeselo pukulu, kongi-dongi walo te, ulke-kerepulune ka teko panjeringimu kanokololie kongi kanumu puku poseringili. Aku-siku tengele teringili kanokolie
5 akune angilieringi yembo marene elondo “Kongi-dongi walomo nambemune posikimbiliye?” ningu walsieringi kinie
6 elone, Yesusini ‘i-siku i-siku niengili!’ nirimu mele niringili kinie “Kapola, ˻dongi-walomo˼ mengo pangili!” niringi.
7 Kanu-kinie elone kongi-dongi walomo Yesusi molorumune mengo ongololie, enone enonga mulumbalema kulku dongimunge bulu-mingine ola pauwe toringi kinie Yesusi kanune ola molorumu.
8 Yembo awisilini enonga mulumbalema kulku yu ombá aulkena pauwe toliku puku, marene unjo-kipiyala poniena puku kipiyala-gomo langoko liku yu ombá aulkena pauwe toliku puringi.
9 Kumbi-leko puringi yembomane kepe akiliku puringi yembomane kepe naka leko unjo ambololiku pukulie ningendo:
“ ‘Yunge imbi ola molopili!’ niemili!
‘Pulu Ye Yawene lipe mundorumu-ne
yunge kongonomo tendemba okomo yemod
molopa kondopili!’e Konana 118:25-26
10 Olionga anda-kolepa ye-nomi-kingi Depisi˻ni
kalopa lsimu yemo˼
ye-nomi-kingi molomba tekemo yemof
Pulu Yemone tepa kondopa
‘Yu tondolo pupili!’ nipili!
Mulú-koleana ola yu imbi ola molopili!”g
niliku puringi.
11 Kanu-kinie Yesusi Jerusalleme suku pupelie Pulu Yemo popo toko kaloringi ulke-tembelena pupe akune suku ˻teko moloringi ulume˼ pali kanorumu, nalo kolea kalá torumu-ne kanopalie ˻‘Isili-ou ulu te naa teambo!’ nimbe˼ yu lombili andoli ye engaki rurepo kinie ˻Jerusalleme˼ ulsukundu puku, kolea-kanga Betani ˻pengé˼ puringi.
Yesusini Unjo-Piki Te Iri Torumu Kinie Kolorumu Temanemoh Kinie
Ulke-Tembelena Bisinete Teko Kou Liku Moloringi Yema Yesusini Topa Makororumu Temanemoi
12 Ipulueli-ou ˻Jerusalleme nondopa lierimu˼ kolea-kanga Betani munduku siye kolkolie ˻kelko Jerusalleme punge puringi kinie˼ Yesusi yu engele terimu.
13 Kanu-kinie yu unjo-piki te gomo tepa angilierimumu sulu tepa kanopalie ‘Mongo te tomunje.’ nimbe nondopa pupe kanorumu nalo, piki-mongo torumu walemo ou wendo naa orumumunge unjo-mongo te topa naa perimu, gomoma mindi terimu kanorumu.
14 ˻Gomo mindi terimu kulu˼ kanopalie “Nu altoko yembomane nonge mongo te naa tani!” nirimu. Aku nirimumu yu lombili andolimene pilieringi.
15 Jerusalleme kamu oringi kinie Yesusi yu Pulu Yemo popo toko kaloringi ulke-tembelena ˻“Juda-yembo naa molemele yemboma ‘Pulu Yemo popo tamili!’ ningu máku tolemele kolea” niringi akune˼ suku pupe kanopalie akune mélema makete teko moloringi yemboma kinie, mélema topo-toko liku moloringi yemboma kinie, akume kanopalie eno pali topa makoropa, kou-mone lupe-lupema alowa teko anjo siringi yembomanga poloma kinie, kera-waembono makete teko manie moloringi poloma kinie, lipe topele topa, topa bulu-balu sipelie,
16 yembomando nimbendo: “Yemboma kou-mone linge makete tenge mélema kolea tenga lupe makete tenge pungendo ulke-tembele palana naa pangi! ˻Anekale teko pangi!˼” nirimu.
17 Eno mane sipelie nimbendo: “Pulu Yemonga bokune ungu te i-sipe nilimo:
‘Yembomane nanga ulkemondo
“Koleamanga pali yembo-talapemanej
Pulu Yemo-kinie popo topo ungu nilimolo ulkemo.” ninge.’k
kanumu eno naa pilimeleye? Aisaya 56:7
Ungu aku-sipe molemo nalo enone i ulkemo
‘wa nolemele yemboma lopi teko molemele ulkemo’
melel ningu pilkulie aku-siku telemele.” nirimu. Jeremaya 7:11
18 Yesusini aku nirimu kulu pilkulie Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie,m eno yu toko kondonge aulke te kororingi. We-yemboma yuni mane sirimu mele pilkulie mini-wale mundoringi-kulu kanokolie kanu Juda-yembomanga ye-awilimene yu pipili kolko yu toko kondonge aulke te kororingi.
19 Pe ipupene, kolea kala tomba terimu kinie ˻kolea-awili Jerusalleme˼ ulsu pupe ˻tengan pe-porumu˼.
20 Ipulueli-ou, ˻unjo-piki angilierimu koleana˼ ongo pukulie kanu unjo-pikimu kamu pulu pali kolorumu kanoringi.
21 Aku-sipe terimu mele Pitane kanopalie ˻Yesusini unjomondo oleangakondo nirimu mele˼ kelepa pilipelie yundu nimbendo: “Rapai,o kána! I unjo-piki nuni ˻oleanga˼ iri tonumu ˻walsikele˼ kolomu.” nirimu.
22 Yesusini topondopa nimbendo: “Pulu Yemone nanga ungumu sike pilimbe˻monga nimbo mele ‘Paa sike wendo ombá.’ ningu˼ tondolo-munduku piliengi!
23 Nane eno paa sike nimbu sikirumu: “Yembo tene ‘nane nimbo mele paa sike wendo ombá.’ nimbe konopu talo-tepa naa pepili ne ma-pangimundu “Ungú toko nomú-kusana sukundu pu!” nimbé kinie yu nimbé mele paa sike wendo ombá.” nikiru.
24 Akumunge eno i-sipu nimbu siembo: “ ‘Olio ˻Pulu Yemone paa sike lipe tapondombamonga ‘Teamili!’ nimolo mele sike manda aku-sipu temolo.’ molo ‘Nimolo kinie sike aku-sipe wendo ombá.’ ningu˼ tondolo-munduku pilkulie Pulu Yemo-kinie popo toko ungu ningu mawa tenge mele pali Pulu Yemone sike tendembamonga kanu ulume sike wendo ombá.” nikiru.” nirimu.p
25 “ ‘Ulu-pulu-keri temulume olionga Lapa, mulú-koleana molemomone ‘We manie pupili, siye kolambo!’ nipili!’ ningu, Pulu Yemo-kinie popo toko ungu ningu angilkulie yembomane eno teko kenjingemonga konopu keri panjiku molonge ulume ‘We manie pupili! Siye kolamili!’ niengila.q
26 (Nalo yembomane eno teko kenjinge ulume ‘We manie pupili!’ ningu siye naa kolongi liemo enonga Lapa, mulú-koleana molemomone kepe enone ulu-pulu-keri tengema ‘Manie pupili!’ naa-la nimbe siye naa-la kolomba.)”r nirimu.
Yesusi Namba Sirimumunge Kerepale Niringi Temanemos
27 Jerusalleme altoko oringi kinie Yesusi yu ulke-tembelena suku andorumu kinie ye mare, Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie, Juda-yembomanga tápu-yema kinie,t
28 eno ongo yu walsiku pilkulie ningendo: “Nu namba nambolka nambamo likulie i kongonomo telenoye? Nawene i kongonomo ‘Te-pou!’ nimbe nu nambamo sipe lipe mundorumuye?” niringi.
29 Yesusini enondo topondopa nimbendo: “Nane eno ungu te walsipu piliembola! Pe nane eno walsimbo mele na sumbi-siku topondoko ningi liemo ‘Na i kongonomo teambo!’ nimbe namba sirimumunge pulumu eno nimbu simbola.
30 ˻Nane i-sipu eno walsipu pilkiru:˼ Ou ˻No-Lindeli˼ Jono omba yemboma no linderimu kinie yu mulú-koleana molemo yemonga kongonomo tendembando yemboma no linderimu molo ya mana-yembomanga kongonomo tendembando yemboma no linderimuye? ˻Nawene “Tei!” nirimu-ne terimuye?˼ Ningu siee!” nirimu.
31 ˻Yuni aku-sipe walserimu mele pilkulie˼ enone enono kere-pale ningulie ningendo: “Yuni walsikimu mele olione topondopo, ‘˻Jono˼ yu mulú-koleana ˻molemo yemonga kongono tendembando yemboma no linderimu˼.’ nímulu liemo yuni oliondo nimbendo: ‘Aku liemo eno Jonone nirimu ungumu nambemune ‘I ungumu sike.’ ningu naa pilku lsingiye?’ nimbé.
32 Molo olione nimolondo: ‘Yu mana-yembomanga ˻kongono tendembando yemboma no linderimu˼.’ nímulu liemo “We-yembomane olio tongenje.” ningu aku-siku ningendo pipili koloringi. We-yembomane ‘˻No-Lindeli˼ Jono yu paa sike Pulu Yemone ungu-umbu tondorumumu pilipe yemboma nimbe sirimu ye te molorumu.’u ningu pilimele kene olio nambe-emolonje?” ningu enono aku-siku kere-pale niringi.
33 ˻Enono aku-siku anjo-yando kere-pale ningulie˼, Yesusindu topondoko ningendo: “˻Nuni walsikinu mele˼ olio naa pilkimulu.” niringi.
Aku-siku niringi kinie pilipelie Yesusini enondo nimbendo: “Kapola. ˻Nane eno walsikiru ungumunge ungu te topondoko naa nikimilimunge˼ enone na walsikimili ungumunge ungu te topondopo, nando i kongonomo ‘Te-pou!’ nimbe na lipe mundupe namba sirimu yemonga imbimu eno naa nimbu simbola.” nirimu.