Yemane Enonga Amboma “Kamu Paa!” Nilimelemonga Ungu Tea
10
(Kolomongo-kanga wane. Pulu Yemonga ungumu.)
Kanu-kinie Yesusi molorumu koleamo mundupe siye kolopa kolea Judia-Disiriki pupe No-Jodane lumbilipe nekendo purumu. Kanu-kinie altoko yembo awisili yu molorumune ongo máku toringi kinie alieli aku teringi kinie yuni yemboma ungu-mane sirimu mele máku toringime altopa mane sirimula.
2 Parisi-ye mareb yu molorumune ongo ‘Yu nambolka nimbénje? Nimbe kenjimbenje manda manjipu piliemili!’ ninguc yu walsiku pilkulie ningendo: “Ye tene yu-yuyu pilipelie yunge ambomo “Kamu pu!” nimbé kinie kapola temba molo aku temba kinie ungu-mane te pulue tombaye?” niringi.
3 Yuni anjo topondopa nimbendo: “Mosisini aku ulumundu ungu-mane sipe nambolka nirimuye?” nirimu.
4 Enone ningendo: “Mosisini nimbendo:
“Ye tene yunge ambomondo
‘Kamu pupili!’ nimbe makorombando
ambomo “Kamu pu!” nimbé mele
pepá tenga topa ambomo sipelie
yundu “Kamu pu!” nimbe aku tepili!”d
nirimu.” niringi. Ungu-Manema 24:1-4
5 Yesusini nimbendo: “Mosisini sike aku-sipe bokune torumu nalo eno kara puku Pulu Yemone ambo-yeselo kapola-kapola molongele mele ungu-mane sirimumu liku su-siku naa pilieringi kulu yuni “Aku teangi!” nirimu.
6 Nalo ou-pulu-pulu Pulu Yemone mélema tepalie
yuni yembo tembando
yemo kinie ambomo kinie terimu. Ou-Pulu-Pulu 1:26-27
7 ‘Aku-sipe terimumunge ye tene ambo te lipelie
yunge anumu-lapaselo mundupe siye kolopa
yunge ambomo-kinie elolo telune tapu toko peko,
8 kangi telumu mele ˻molkolo
elonga konopu telune pupili˼ molongele.’e Ou-Pulu-Pulu 2:7,18,22-24
Ye te ambo te limo kinie kangi telumu mele molembele-na elo altoko talo mele naa molembele, elo yembo telumu mele molembele.
9 Yembo telumu molembele kene Pulu Yemone ambo-ye talo ‘Telumu molangili!’ nilimo ambo-yeselo yembo tene liku lupe-lupe naa mundengi! Aku tengi liemo kapola naa temba.” nirimu.
10 Altoko ulkena suku puku moloringi kinie yu lombili andolimene Yesusi yundu aku ungumunge pulumu walsiku pilieringi kinie
11 yuni enondo topondopa nimbendo: “Ye tene yunge ou limo ambomo makoropa “Kamu pu!” nimbelie kelepa ambo te limo kinie aku yemone wa-ulu-kerinele tepa, ou limo ambomo tepa kenjilimo.
12 Molo ambo te yunge ou pulimo yemo mundupe siye kolopa wendo pupe ye te pulimo kinie aku ambomone wa-ulu-kerinele telemóla.” nirimu.
Yesusini Ambolangomando “Pulu Yemone Eno Sewe Anjepili!” Nirimu Temanemof
13 Kanu-kinie yembomane enonga ambolangoma ‘Yesusi yunge kimuni ambolopili!’ ningu yu molorumune mengo oringi. Nalo yu lombili andolimene iri toko ˻“Naa mengo waa!”˼ niringi.
14 ˻“Mólo!” niringi kinie˼ kanopalie Yesusini konopu keri panjipe ˻yu lombili andolime˼ enondo nimbendo: “Pulu Yemo ye-nomi-kingimu molopa nokolemo yembo-talape akumug i ambolangoma mele molemele yemboma enonga yembo-talapemo kene enone i ambolangoma na moliona wangi pipi siku “Mólo!” naa niee!” ˻nirimu.˼
15 “Nane enondo paa sike nimbu sikirumu: “Ambolangomane ‘Pulu Yemo olionga ye-nomi-kingimu molopili!’ ningu molemele mele aku-siku naa nilimele yemboma yunge koleana suku paa naa punge, mólo!” nikiru.” nirimu.h
16 Aku nimbelie yuni ambolangoma kangulupe yunge kimuni eno telu-telu nimbe pengena ambolopa eno tepa kondombando “Pulu Yemone “Eno molko kondangi!” nipili!” nirimu.
Ye-Kamako Tenga Temane Tei
17 Kanu-kinie Yesusi ola angilipe kolea marenga pumbe purumu kinie ye te yu pumbe purumune lkisipe omba yunge kumbikerena koporongo langopa yundu walsipe pilipelie nimbendo: “Ungu-Mane Sili Peangamo, na nambolka uluri tembo kinie na konde molopa kondopa mindi puli ulu-pulumu limboye?”j nirimu.
18 Yesusini yundu nimbendo: “Nuni na nambemune “Peangamo” nikinuye? Yembo peanga te mólo! Pulu Yemo mindi peangamo.” nirimu.k
19 ˻Aku nimbelie yemone walserimumunge topondopa nimbendo:˼ “Nu ˻Pulu Yemonga˼ ungu-manema ˻Mosisini yando nimbe sirimume˼ pilino. Aku ungu-manema i-sipe mele:
“Yembo toko naa kondangi!” nimbe,
“Ambo ye pulime molo ye ambo lilime
yembo-lupema kinie
wa-ulu-kerinele naa teangi!” nimbe,
“Mélema wa naa liengi!” nimbe,
“Yembomanga kote
kolo toko naa tendangi!” nimbe,
“Yembomanga mélema
kolo toko we naa liengi!” nimbe,
“Aminieli-lanieli kinie liku awi-siku,
ungu ninge mele pilku liku molangi!”l
nimbe,
ungu-mane akume sirimu pelemo kanumu.” nirimu. Wendo Oringi 20:12-16
20 Aku nirimu kinie pilipelie kanu yemone nimbendo: “Ungu-Mane Silimu, na kangomo molopolie aku ungu-manema pali pilipu lipu tepo molorundu mele yandopa kinié kepe tepo molioko.” nirimu.
21 Yesusini yu neme-neme nimbe kanopa konopu mondopalie yundu nimbendo: “Papu teleno nalo ulu telu mindi naa teleno. Nu puku nunge méle nosilinoma pali kou-mone li-pukulie, kou-mone linime yembo-koropama moke teko sikulie na lombili ou!” nirimu. “Nunge ˻mana-˼mélema aku teni kinie mulú-koleana nunge méle kande-kandema lemba.” nirimu.
22 Kanu yemo méle paa kande-kandema noserimu kulu Yesusini yundu aku nirimu kinie pilipelie yu kumbi-kere tepa konopu keri panjilipe anjo purumu.
23 ˻Aku terimu kulu kanopalie˼ Yesusi topele topa yunge lombili andolimendo nimbendo: “Pulu Yemo ye-nomi-kingimu molopa nokolemo koleanam suku pungendo yembo-kamakoma paa mindili-siku sukundu punge.” nirimu.
24 Aku ungumu nirimu ˻kinie pilkulie˼ yu lombili andolimene mini-wale mundoringi. Nalo Yesusini altopa enondo nimbendo: “Kangoma, Pulu Yemo ye-nomi-kingimu molopa nokolemo koleana suku pungendo yemboma paa mindili siku punge.
25 Kongi-kemele ˻kongi paa awili te nalo˼ kalé suru-toline suku pumbendo mindili kanga-mele sipelie pumbe. Nalo yembo-kamakoma Pulu Yemo ye-nomi-kingimu molopa nokolemo koleana suku pungendo mindili paa awili mele siku punge.” nirimu.
26 ˻Aku nirimu kinie pilkulie˼ yu lombili andolime paa mini-wale munduku suru ningu anjo-yando ungu-mele tekolie ningendo: “Aku liemo pe kamu mindili nolemela aulkena nawe manda wendo pupe, molopo kondopo mindi pumolo aulkena pumbeye?n Te mólonje?” niringi.
27 Yesusini eno neme-neme nimbe kanopalie nimbendo: “Sike yemboma enono manda mólo, nalo Pulu Yemone manda tendemba. Pulu Yemo yuni ulume pali kapola telemo. Ulu te yuni manda naa temba te mólo!”o nirimu.
28 Yuni aku nirimu kinie pilipelie Pitane yundu nimbendo: “˻Pe olio-kinie nambolka uluri wendo ombáye?˼ Olio olionga mélema pali mundupu siye kolopo nu lombili purumulu mele pulimolo kanumu.” nirimu.
29 Yesusini nimbendo: “Nane enondo paa sike nimbu sikirumu: “Yembo na konopu mondoko nanga kongono tendeko temane peangamo toko siliku andongendo enonga ulkema, angenupili, kemulupili, anupili, lapali, ambolangoma, koleama, akume munduku siye koloringi yemboma pali
30 ya mana paa olandopa méle awisili likulie, pe punge koleana konde molko kondoko mindi puli ulu-pulumu lingela.p Ya mana ulkema, angenupili, kemulupili, anupili, ambolangoma,q koleama kinie, akume pali awisili olandopa lingela; ˻na konopu naa mondonge yembomane˼ eno mindili singela.” nikiru.
31 Nalo kinié awili molemele yembomanga awisili pe ˻Pulu Yemo ye-nomi-kingimu molopa nokomba koleana˼r yembo-koropama molonge; kinié koropa pupili molemele yemboma pe yembo-awilime molonge.” nirimu.
Yesusini Yu Kolopalie Lomboropa Ola Molomba Mele Altopa Wale Yepoko-Sipe Nimbe Para Sirimu Temanemos
32 Kanu-kinie ˻Yesusi kinie yu lombili andolime kinie˼ eno kolea-awili Jerusalleme punge puringi. Yesusi kumbi lierimune lombili andolime paa konopu awisili liku munduliku yu lombili puringi. We-yembo akiliku lombili oringime kepe mini-wale munduku pipili kololiku puringi.
Yesusini ˻yu lombili andoli˼ ye engaki-rurepo ‘na kinie eno kinie oliolio molamili!’ nimbe eno lipe anjo memba pupelie yu-kinie wendo ombá mele altopa pulu polopa nimbe sipelie nimbendo:
33 “Pilieme! Olio Jerusalleme pumolo pukumulu. Akune pumolo kinie Manie Omba Mana-Ye A Lierimu Yemo ye tene ‘Toko kondangi!’ nimbe Pulu Yemo popo tondoli ye-awilime kinie, Pulu Yemonga ungu-manemanga pulume pilku mane sili yema kinie,t lipe simbe. Kanu-kinie enone yu kote tendeko pilkulie ‘Yu kolopili toko kondangi!’ ningulie Juda-ye naa molemele ye-lupema liku singe.u
34 Kanu-kinie kanu ye-lupemane yu ungu-taka tondoko yunge kumbikerena olkambe toko yu ka-pulsene toko yu toko kondonge. Yu toko kondonge kinie wale yepoko-sipemonga lomboropa ola molomba.” nirimu.
Jemisi Kinie Jono-selone Yesusi Mawa Tekololie “Nu Mulú-Koleana Puku Moloni Kinie Olto Nu-Kinie Awiliselo Molambili!” Niringili Temanemov
35 Kanu-kinie Seperi malo Jemisi kinie Jono-selo elo Yesusi molorumune ongololie ningelendo: “Ungu-Mane Silimu, nuni ‘Olto ulu te teani!’ nimbu mawa tembolo okombolo.” niringili.
36 Yuni elondo nimbendo: “Nambolka uluri ‘nane elo-kinie tendambo!’ ningu nikimbiliye?” nirimu.
37 Elone topondoko ningelendo: “Nu pe nunge kolea tondolo pa teline ˻ye-nomi-kingimu molkolie ninimuni, ‘olto nu-kinie pea ye-nomime molamili!’ ningu˼ ‘olto te nunge ki-umbukundu mondoko te nunge ki-tarokondo mondani!’ nimbu mawa tekembolo.” niringili.
38 Yesusini elondo nimbendo: “Mawa tekembele mele elo pilku naa kondokombele. Na no-mingine no nombomo elo manda nongeleye? Molo na no limbomo elo manda lingeleye?” nirimu.w
39 Elone yundu topondoko ningelendo: “Manda tembolo.” niringili.
Yuni elondo nimbendo: “Na no-mingine no nombomo pe elo sike nongelela. No limbomo pe sike lingelela.
40 Nalo nane elo “Nanga wanguselonga ongo molangili!” nimbomo kapola naa temba. ˻Pulu Yemone yuyu˼ akune molongeleselo koronga mako torumu.” nirimu.
41 Jemisi Jono-selone ˻‘Yesusinge wanguselonga molambili!’˼ ningu mawa teringili mele pilkulie lombili andoli rureponga talox wemane elo-kinie konopu keri panjeringi.
42 Kanu-kinie Yesusini eno “Waa!” nimbelie nirimumuni, enondo nimbendo: “Olio Juda-yembomanga ulsu molemele yemboy-talapemanga ye-nomime enonga yemboma tondolo-munduku nokoko kongono enge nilime alieli silimele. Ye imbi ola molemo yema enonga yemboma ‘Mindili nangi!’ ningu nokolemele. ˻Yembomane enonga ye-nomimenga ungume liku su singe aulke te naa lemo mele˼ eno pilimele.
43 Nalo ˻we-yembomanga ye-nomimene enonga yemboma tondolo-munduku nokolemele mele na lombili andoli yema˼ eno-enono aku-siku anjo-yando naa teangi! Enonga ye te ‘Na imbi olandopa molopili! Na ye awilimu molambo!’ nimbé yemo enonga kongono tendeli yemo molopili!
44 ‘Na enonga ye-nomimu molopo eno nokambo!’ nimbé yemo enonga pali kongono-kendemande tendeli yemo molopili!z
45 Aku-sipela, Manie Omba Mana-Ye A Lierimu Yemo kepe ‘Yembomanga ye-awilimu molopo eno nokambo! Enone nanga kongono tendeli kendemande-yemboma molangi!’ nimbe naa orumu. ‘Yembomanga kongono tendeli kendemande-yemo molopo eno lipu tapondopo, ulu-pulu-kerimene eno ka sipe nokolemo mele naa tepili kapola molangi kene na yembo awisilinge nimbu pundu tondopo nanga kangimu sipu, kolo wangopo kolondambo!’ nimbe orumu.”a nirimu.
Yesusini Mongo Keri Lierimu Ye Te Tepa Konde Lsimu Temanemob
46 Kanu-kinie Yesusi kinie yu lombili andolime kinie eno kolea-awili Jeriko oringi. Ongolie eno kinie we-yembo awisili kinie Jeriko munduku siye kolko punge puringi kinie mongo keri lierimu ye te, imbi Ba-Timiasi, (akumunge pulumu Timiasi-Malo,) aulke alselsena molopa yemboma “Kou-mone siee!” nimbe mawa terimu.
47 Kolea Nasarete ye Yesusi omba purumu mele pilipelie mongo keri lierimu yemo yuni pulu-polopa tondolo ru nimbe walsipelie nimbendo: “Yesusi, ˻ye-nomi-kingi˼ Depisini kalopa lsimu yemo,c na kondo kolou!” nirimu.
48 Yembo awisilini yu iri toko “Nu ungu naa nili taka liku molou!” niringi.
Nalo yuni paa tondolo ru nimbe walsipelie nimbendo: “Depisini kalopa lsimu yemo, na kondo kolou!” nirimu.
49 Yesusi we angilipelie “Yu opili niee!” nirimu.
Aku nirimu kulu eno mongo keri lierimu yemo walsikulie ningendo: “Yuni “Nu ou!” nikimu kene konopu waengo siku ola angilku ongo pu!” niringi.
50 Yu popenge tepa ola pakorumu wale-pakolimu kulupe ola angilipe Yesusi molorumune orumu.
51 Yesusini yundu nimbendo: “Nane nu nambe-eambo konopu lekenoye?” nirimu kinie
mongo keri lierimu yemone nimbendo: “Raponai,d na mongone mélema kanambo nanga mongoselo teko peanga tendani!” nirimu.
52 Yesusini nimbendo: “ ‘Nane nunge mongoselo kapola tendembo!’ ningu pilienumunge nu umbu-mongo kapola angilkimu kene pu!” nirimu. Yesusini aku nirimu kinie yu tamburumbu mongoselo peanga lierimu, mélema kanopalie, Yesusi purumu aulkena lombili purumu.