9
(Kolomongo-kanga wane. Pulu Yemonga ungumu.)
Yesusi yuni enondo ungu te pea nimbendo: “Nane enondo paa sike nimbu sikirumu: “Eno ya angilkimilimenga mare ou kolou naa kolangi Pulu Yemo ye-nomi-kingimu omba,a enge nimbe molopa, mélema kinie yemboma kinie pali nokomba ombá kanonge,” nikiru.” nirimu.b
Yesusinge Kalumu Te-Lupe A Lierimu Temanemoc
2 Yesusini ˻yu lombili andolimendo aku-sipe nimbe sirimu kinie˼d pe koro te omba purumu kinie Pita keme Jemisi keme Jono keme eno lipe meli pupe mulúe paa olandopa polorumu tenga ola purumu. ‘Olio-oliolio mindi molamili!’ nimbe eno akune lipe memba purumu. Akune puringi kinie eno kanoko molangi yunge kangimu alowa tepa,
3 yu pakorumu mulumbalema ena tondolo topa mongo paa takele telemo mele aku-sipe paa kake terimu. Ya mana yembo tene wale-pakoli te sópone kulumiye topa kake tendemba mele kapola molo! ˻Yunge mulumbalema kake terimu mele paa olandopa.˼
4 Yu aku-sipe molopili, ˻Juda-yembomanga koronga-ou moloringili ye-awili talo,˼ Illainja kinie Mosisi-selo ongolo Yesusi-kinie ungu ningulu mona angilieringili kanoringi.
5 Kanu-kinie Pitane Yesusindu nimbendo: “Rapai,f olio ya molopamolo peanga lepamo. Olione ulke-takaye yepoko takondamili! Te nunge, te Mosisinge, te Illainjanga takondamili!” nirimu.
6 (Nalo aku nirimumu eno pipilini paa koloringi-kulu yuni nimbé mele naa pilipe ungu te walu nirimu.)
7 Kanu-kinie kupe te omba eno aki torumu kinie kupena suku ungu te wendo ombalie nimbendo: “I yemo nanga konopu mondolio Malomo. Yuni ungu nimbéma pilku liengi!” nirimu.
8 Pe walsikele, eno mongo male-male teko kanokolie yeselo altoko naa kanoringi. Yesusi yu-mindi eno-kinie molorumu kanoringi.
9 Múlu polorumumunge manie onge oringi kinie Yesusini eno mane sipelie nimbendo: “Enone kinié kanongi mele isili-ou yembo teluri kepe ningu naa siengi! Pe mindi, Manie Omba Mana-Ye A Lierimu Yemog kolopalie altopa lomboropa ola molomba kinie temanemo toko anjo siengi! Ou molo!” nirimu.
10 Aku nirimu kinie eno yunge ungumu pilku liku ou anjo naa niringi nalo “yu “kolopolie altopo lomboropo ola molombo.” nikimu ungu kanumunge pulumu nambolka ulurindu nikimunje?” ningu eno-enono kere-pale niringi.
11 Kanu-kinie yu lombili andolimene ˻yu sike molorumu mele ningu kanokolie˼ yundu walsiku pilkulie ningendo: “˻Pulu Yemone ‘olio nokopa kondopa lipe tapondomba.’ nimbe mako torumu ye-nomi Kirasimu nu liemo˼ Pulu Yemonga ungu-manemanga pulume pilku mane silimele yemane “Illainja ˻kelepa˼ kumbi-lepa ombá. ˻Ye-nomi Kirasimu pe akilipe ombá.˼” nilimele akumu nambemune nilimeleye? ˻Illainja kelepa naa opili nu koronga orunu moleno kanumu.˼” niringi.
12 Yesusini topondopa nimbendo: “ “Illainja ˻kelepa˼ kumbi-lepa ombalie mélema pali tepa mimi temba.” nilimele kanumu sike nilimele. Aku liemo Manie Omba Mana-Ye A Lierimu Yemo kanoko keri kanoko mindili liku singe mele ˻Pulu Yemonga˼ bokune nambemune imbi toringi molemoye?
13 Nalo ˻akumunge ungu te pea nimbu sikiru.˼ Pilieme! Illainja koronga orumu. Yu orumu kinie ˻kanu yemane yu kanoko imbi naa siku˼ ‘Yu we-yere.’ konopu lekolie ‘yu-kinie temolo.’ ningu pilieringi ulume pali teringi.h Yu-kinie aku-siku tenge mele ou bokune imbi toringi molemola.” nirimu.
Yesusini Kuru Te Makororumu Temanemoi
14 ˻Yesusi kinie yu lombili andoli ye yepoko kinie˼ eno yu lombili andoli ye wema moloringine yando ongo, yembo paa awisili akune kakapu teko máku toko moloringi kanoringi. Pulu Yemonga ungu-manemanga pulume pilku mane siringi yemanej Yesusi lombili andoli ye wema-kinie ungu ningu, ungu mare walsiku pilku moloringi kanoringila.
Jesus Heals a Boy with an Unclean Spirit (Mark 9:14-29)
15 Yesusi orumu kinie kanokolie kanu máku toko moloringi yemboma suru awili-teko ningu yu orumune lkisiku ongo yundu “˻Awilimu,˼ nu okonoye?” niringi.
16 Kanu-kinie yuni enondo “Enone ungu nambolka ungumu kere-pale nikimiliye?” nimbe walserimu kinie
17 kanu máku toko moloringi yembomanga ye tene topondopa yundu nimbendo: “Ungu-Mane Silimu, nanga kangomo kuru te yunge konopune molemomonga ungu manda naa nilimo-na nu molonu ˻konopu lepolie˼ membo ondu.
18 Kurumuni kangomo wale marenga ambolopalie yu topa manie mundulimo kinie yu kuru kopari topa, kere apoupu memba, ungú kinirokó lipe telemo. Nu lombili andolimendo aku temanemo topo sipu enone kanu kurumu ‘Makorangi!’ nimbu mawa tendu nalo eno manda naa tengi.” nirimu.
19 Aku nirimu kinie pilipelie Yesusini yemboma ˻iri topalie˼ nimbendo: “Kinié molemele yemboma eno ˻‘Pulu Yemone ulume sike manda temba.’ ningu˼ tondolo-munduku naa pilku molemele yemboma, na eno-kinie molopo, wale nambe-tepo mane sipu ulu mare lipu ora simbo kinie mimi-siku pilingeye? ˻Na eno-kinie siye tekemo.˼” nimbelie
“Na moliona kangomo mengo waa!” nirimu kinie
20 kangomo yu molorumune mengo oringi. Mengo oringi kinie ˻kangomonga konopune molorumu˼ kurumuni Yesusi kanopalie kangomo topa manie mundorumu kinie kangomo kimbu-kime peue mundupe kere apoupu merimu.
21 Aku terimu kinie kanopalie Yesusini kangomonga lapa walsipelie nimbendo: “Kangomo i kurumu te-wale pulu polorumuye?” nirimu.
Lapane nimbendo: “Yu kokele anumuni merimu kinie aku-sipe terimu.
22 Wale awisili yu kopari topa tepena topa mundupe, nona topa mundupe telemo kene nuni manda liku tapondoni liemo olio kondo kolko liku tapondou!” nirimu.
23 Yesusini nimbendo: “Nuni nambemune “Manda liku tapondoni molo móloye?” nikinuye? ‘Nane nu manda lipe tapondomba.’ ningu tondolo-munduku pilienu liemok ulume pali sike wendo ombá.” nirimu.
24 Yesusini aku nirimu kinie pilipelie kangomonga lapane tondolo ru nimbelie nimbendo: “Nane ‘sike nuni liku tapondoni.’ nimbu pilkiru nalo ‘Sike.’ nimbu pilkiru ungumu tondolo-mundupu ambolombo mele manda naa tekemo kene ‘Sike.’ nimbu pilkiru mele ‘tondolo pupili!’ ningu liku tapondani!” nirimu.
25 ˻Kanu-kinie˼ yemboma lkisiku sukundu-sukundu kanonge onge oringi kanopalie Yesusini kurumu iri topalie nimbendo: “Kere pipi siku, komu pipi siku teleno kurumu, kangomonga konopune ongo wendo puku, altoko paa naa ongo molani! Kamu pu!” nirimu kinie
26 kurumuni kangomo tondolo topa manie mundorumu kinie yu kimbu-kime peue mundorumu kinie kurumu kalle nimbe yunge konopune wendo orumu. Kanu-kinie kangomo yu kolopa lierimu none terimu kanokolie yembo awisilini “Yu kolomu lémo.” niringi.
27 Nalo Yesusini yunge kimu ambolopalie yu ola lsimu kinie ola angilierimu.
28 ˻Kanu-kinie Yesusini kurumu topa makoropa pora sipelie˼ ulkena sukundu ˻yu lombili andolime-kinie˼ purumu kinie lombili andolime enone Yesusi pea enono molkolie yu walsiku pilkulie ningendo: “Kuru akumu olione nambemune manda naa makoromuluye?” niringi kinie
29 Yesusini topondopa nimbendo: “I ulumu mele temolondo (langi mi lepo naa nombo)l Pulu Yemo-kinie ungu nimbu mawa temolomone mindi manda temolo. We manda naa temolomo.” nirimu.
Yesusini Yu Toko Kondonge Kinie Kolopalie Lomboropa Ola Molomba Mele Wale Talo-Sipe Nimbe Sirimu Temanemom
9:30-33ekendo
30-31 ˻Yesusi kinie yu lombili andolime kinie˼ eno aku koleamo munduku siye-kolko ˻yemboma moloringi koleama naa puku˼ kolea Gallilli-Disiriki sumbi-siku ongo punge puringi. Akune punge puringi kinie yu lombili andolime ungu-mane silipe purumu-kulu ‘Na lombili andolime ungu-mane sikiru mele we-yembomane naa piliengi kene olio we yembomane naa kanangi, pea naa pamili!’ nimbe yu kinie yu lombili andolime kinie enono kiyengo ningu puringi. ˻Yu-kinie pe wendo ombá mele˼ yuni eno ungu-mane silipe purumu mele i-sipe:
“Manie Omba Mana-Ye A Lierimu Yemo ka sikulie ˻yu toko kondonge˼ yema anjo singe kinien enone yu toko kondonge. Kolopalie wale yepoko-sipemonga yu lomboropa ola molomba.” nirimu.
32 Nalo yuni nirimu ungumu pilku sundukulie, ‘I ungumunge pulumu nambolkarenje, naa pilkimulu.’ niringi nalo “Nambolka ningu nikinuye?” ningu walsiku pilingendo pipili kolko naa walseringi.
33 ˻Ongolie˼ kamu Kapeniame taonona suku oringi.
Pulu Yemo Ye-Nomi-Kingi Molopa Nokolemo Yembomanga Yembo Paa Imbi Olandopa Molemomonga Ungu Teo
9:33ekendo-37
Molonge ulkena suku puku moloringi kinie Yesusini yu lombili andolime walsipe pilipelie nimbendo: “Eno aulkena ungu nambolkarenga kere-pale niliku ongiye?” nirimu.
34 Nalo enone ‘Olionga ye nawe paa olandopa molemoye?’ ningu kere-pale ningu kere-kuru lsingi kulu Yesusindu eno niringi mele ningu para singemonga pipili kolkolie molko duma lsingi.
35 Kanu-kinie Yesusi yu manie molopalie yu lombili andoli rurepondo “Na moliona waa!” nimbelie nimbendo: “Yembo tene ‘Yembomanga awilimu molambo!’ nimbelie yu we-yembomo molopa yembomanga kendemandemo molopili!” nirimu.p
36 Aku nimbelie ambolango kanga te lipe eno moloringine mondopalie nirimumuni, aku ambolangomo yuni kangulupe enondo nimbendo:
37 “Yembo tene ‘Na Awilimunge yembomo molio.’ nimbeq i ambolangomo mele lipe tapondomba kinie kanu yembomone aku tembamonga na lipe tapondombala. Na lipe tapondomba yembomone na manjipe naa lipe tapondomba. Ambolangomo lipe tapondombamonga kanu yembomo yuni na lipe mundorumu yemo lipe tapondombala.” nirimu.r
Yesusini Nimbendo: “Olio-Kinie Opa-Pulue Naa Molemele Yemboma ‘Olionga Opa-Lkerayema.’ Niemili!” Nirimu Temanemos
38 ˻Yesusi lombili andoli ye˼ Jonone Yesusindu nimbendo: “Ungu-Mane Silimu, olio kanomulu, ye tene nunge imbimu lepat walsipe kuru mare yembomanga konopune molongime “Ongo wendo paa!” nimbe topa makoropa molomu kanomulu. Kanopolie yu olio pea tapu-topo naa molemolo kene yundu “Nu aku-siku naa tei!” nímulu.” nirimu.
39 Aku nirimu kinie pilipelie Yesusini yundu ˻kanu yemone terimu ulumundu˼ nimbendo: “Yembo tene nanga imbi lepa walsipe ulu-tondolo te tepalie yuni kelepa nondopa nando ungu te manda nimbe naa kenjimbe kene enone yundu “Mólo!” naa niengi!
40 Yembo te olio-kinie opa-puluemo naa molemomo olionga opa-lkerayemo molemo kanumu.” ˻nirimu.˼
41 “Nane enondo paa sike nimbu sikirumu: “Eno no waka lemba kinie yembo tene ‘Eno ye-nomi Kirasimunge yemboma molemele kene no te nangi kolopo siembo!’ nimbe eno te kolopa simu liemo, Kirasinge kongono tendenge yemboma yuni méle kalomba kinie kanu yembomo kepe komu naa sindipe yu konopu lipe mundupe méle kalombala,” nikiru.” nirimu.
Olio Kirasinge Yemboma Kondi Tolemele Ulume Kinie, Olio Ulu-Pulu-Keri Telemolo Ulume Kinie, Aku Ulumenga Yesusini Mane Sipe Ungu-Iko Torumu Temanemou
42 “Yembo tene i ambolangomonga ˻mele yembo˼ te na ‘Sike’ nimbe tondolo-mundupe pilimo ambolangomov ‘Ulu-pulu-kerime tepili!’ nimbe kondi tombamonga kanu ambolangomo tondolo-mundupe pilimo mele mundupe siye kolopa bulu simu liemo ˻ambolangomo ou kondi naa topili˼ kanu yemo kou paa awili tew moko toko nomine lendeko ‘Yu kamu kolo-popili!’ ningu paka toko nomúne paa maniekondo mundulimelanje paa papu.x Aku-siku toko mundulimela kinie yu kolopalie pe yu Pulu Yemonga ambolango tendo ‘Ulu-pulu-kerime tepili!’ nimbe kondi manda naa tolka. Nalo yu aku-siku nomúne naa mundulimela kinie yu yemboma kondi tombamonga yu Pulu Yemo-kinie mongo awili pelka kene enone yu nomúne papu paka toko mundulimela.
43-44 “Nunge kiselone ulu-pulu-keri te temu liemo aku kiselo kari leko lteani! Nu konde mololiku mindi puni koleanay kiselo naa angiliepili puni kinie peangamo. Nunge ki talo we angiliepili nu tepe kolea,
(‘akune Pulu Yemo teko kenjilimele yembomanga korowama
kolou naa kolopa nolipe mindi pulimo,
tepe toko kumundou naa kumundulimele kolea’)z
akune suku toko mundunge kinie kerimu.
45-46 “Molo nunge kimbuselone ulu-pulu-keri te temu liemo aku kimbuselo kari leko lteani! Nu konde mololiku mindi puni koleana kimbuselo naa angiliepili puni kinie peangamo. Nunge kimbu talo we angiliepili nu tepe kolea,
(‘akune Pulu Yemo teko kenjilimele yembomanga korowama
kolou naa kolopa nolipe mindi pulimo,
tepe toko kumundou naa kumundulimele kolea’)a
akune suku toko mundunge kinie kerimu. Aisaya 66:24
47-48 “Molo nunge mongoselone mélte kanokolie konopuni ‘liemboa!’ ningu pilku ulu-pulu-keri te tenu liemo aku mongoselo akuku lteani! Nu Pulu Yemo ye-nomi-kingimu molopa nokolemo koleanab mongoselo naa angiliepili puni kinie peangamo. Mongo talo we angiliepili nu tepe kolea,
‘akune Pulu Yemo teko kenjilimele yembomanga
korowama kolou naa kolopa nolipe mindi pulimo,
tepe toko kumundou naa kumundulimele kolea’c
akune suku toko mundunge kinie kerimu. Aisaya 66:24
49 “Yembomane Pulu Yemo popo toko kalemele mélema singendo ‘Pulu Yemone kanopalie ‘Langi kake telime.’ nimbe kanopili!’ ningu api-kusa mundukulie silimeled aku-siku-mele yemboma molongena tepémo, api-kusa mele, yemboma-kinie pali wendo ombá.e
50 Api-kusa yu méle peangamo nalo yu songo naa temba kinie ‘Yu kelepa songo tepili!’ ningu ulu te manda telemeleye?f ˻Api-kusa langimenga mundulimele kinie songo telemo aku-siku˼ eno api-kusa mele molko yemboma-kinie anjo-yando konopu telune pupili taka liku molangi!”g nirimu.