Goe tea vamanamana a maamihu taba to baitono nomeam
4
Tobara aba! Nomana o bero o poropita piipiku to vataviri rori teo munana. Meam toro goe tea vamanamana ria kavara no poropita vai to boha vo rien, eori na tei me rori bona Taun te Hunavaan. Eam he toro siisira vamataa kurusu amaa taba to sue riori, rerau, eam repaa ante tea tara inana a taun to tei nana teori. A Taun te Hunavaan ge ahiki. 2 Eam na ante nom tea tara inana voen, a Taun te Hunavaan na tei nana tea aba, ei bea aba sue tavusu voen, e Jisu Karisito na tavusu aba roho. 3 A aba vai he to saka sue tavusu haa vo naen, e Jisu Karisito na tavusu aba roho, na hiki ni nana bona Taun te Hunavaan. A taun vai to tei me nae, na koma hata ni nana bene Karisito.a Meam na baitono vo roho en, o kaku aba bari pasi nomau, eori he paa suguna vaevuru pahi.4 Eam he, vahara baiko tenaa, eam o baiko te Hunavaan. Eam paa oha vaevuru rio poropita piipiku, tea tabae o kikisi tea Taun Penapena vai to tei nana team, na beera oha nana bona taun va teo munana. 5 Eori a ta teo munana, mea maa vaasusu teori na sue koana bona maa taba va teo munana. Ei mea ta teo munana baitono ri rori bari. 6 Enam o aba te Hunavaan. Meori to nata ni rori bene Hunavaan, na baitono rori bona maa vaasusu tenam. Eori he to saka tei haari te Hunavaan, saka baitono haari bona maa vaasusu tenam. Evei to tara inana kaakoo me nom nam a taun va tea sue vasuuna bara taun va teo piku.
A uruuru na tavusu maana te Hunavaan
7 Tobara aba tenaa! A uruuru na tavusu maana te Hunavaan, meara toro va-uruuru vatatana. Ere teie to uruuru ri rori bono meho aba, o baiko te Hunavaan, meori na nata ni rori bene Hunavaan. 8 Ere teie to saka uruuru haa ri rori bono meho aba, na toku ni rori bene Hunavaan. E Hunavaan kou a uruuru.
9 E Hunavaan na vataaree araara bona uruuru teve, eove he vaanomaa bona peha koa a Baiko teve vo teo munana, eara re gono a tootoo vaneovoi kaakoo teve. 10 A uruuru mamana eiei: A uruuru to tavusu maana te Hunavaan vo teara. Saka uruuru teara haana vo te Hunavaan. Ahiki. Suku bona uruuru teve, mepaa hee ni ma roho bona Baiko teve potee bona va-asi, mepaa mate suku bona maa hata teara.
11 Tobara aba! E Hunavaan na uruuru kurusu ni kanom araara, meara mee toro va-uruuru vatatana. 12 Ahiki ta aba to tara roho bene Hunavaan. Evehee beara va-uruuru vatatana rara, eara repaa kona voen, e Hunavaan na tei nana teara. Mea kavara na uruuru te Hunavaan toro tara kaakoo meori teara.
13 E Hunavaan na hee roho araara bona Taun teve, meara nata vo raen: Eara na tei rara teve, eove he na tei nana teara. 14 Enam na tara a Baiko te Hunavaan. Ei menam sue tavusu vo nomen, e Hunavaan e Tamaraara na vaanomaa roho bona Baiko teve tea vatagae ribona ta teo munana. 15 Eteie to sue tavusu vo naen, e Jisu a Baiko te Hunavaan, na tei nana te Hunavaan, e Hunavaan he na tei nana teve. 16 Meara na nata bara na vamanamana rara a uruuru te Hunavaan vo teara.
E Hunavaan a uruuru, meori to tei me rori bona uruuru, na tei rori te Hunavaan, e Hunavaan he na tei nana teori. 17 Mea uruuru pasi taba beera mau tea tootoo teara, beara tei rara te Hunavaan. Rerau, eara repaa tei meo kikisi tea sun matane Hunavaan teo boni rare. Eara pasi tei mi veo kikisi bona, tea tabae a tootoo teara teo munana na vaapeha me nana bona tootoo te Karisito.
18 A aba vai to tei mi nana bona uruuru mamana vuhanae na hiki ni nana bona naabu. A uruuru kou na gani vaavaha nana bona naabu. A aba na naabu koana suku bene eove na upehe vo naen, e Hunavaan to mene vaherehereke bona. Meori to naabu ni rori bene Hunavaan, saka uruuru mamana haa ni rori bene Hunavaan. 19 E Hunavaan to uruuru momohu kurusu ni ka roho araara, ei meara va-uruuru vatatana rara.
20 Beara boha voen eara na uruuru ni rara e Hunavaan, beara saka uruuru haa ri rara a ba keara teara, eara o piipiku. Tea tabae, havee to pasi taagin uruuru koa mi rara e Hunavaan vai to saka tara haa raara, beara saka uruuru haa ri rara a ba keara teara vai to tara ri raara? 21 E Hunavaan na hee araara bona lo vai: “Eori to uruuru ni rori bene Hunavaan toro uruuru ribona ba keara teori mee.”