3
Omana rakaha!
E Hunavaan e Tamaraara na uruuru kurusu ni kanom araara,
meve dao nom araara bono baiko teve.
Na mana nana – eara o baiko teve mamana!
A ta teo munana he saka tara inana haa nom araara,
tea tabae eori na toku ni rori bene Hunavaan.
2 Tobara aba!
Eara o baiko te Hunavaan nomana,
eara he saka nata vakisi haara to pasi ma matamata vo raara teo vamurina.
Eara he na nata vo raen,
be Karisito vaakaku vaha ma,
eara repaa matamata voen teve,
tea tabae eara pasi ma tarau havee kurusu to matamata vo nae.
3 Mea kavara na aba vai to vamanamana vo rien,
eori pasi matamata vo rien te Karisito,
toro popo vatahavi rori tea maa tootoo teori voen to tahavi vo nae Karisito.
4 Eori to paku rori bono matapaku vahata,
na kaku rori bona lo te Hunavaan.
Tea tabae o matapaku vahata na kaku nana bona lo.
5 Eara he na nata vo raen,
e Jisu Karisito na gunaha vo ma teo munana,
tea vaarudaha kahi araara bona maa matapaku vahata.
Mea ahiki ta hata to tei nana teve.
6 A aba vai to tei mi nana bene Karisito tea tootoo teve saka ante haana tea paku tamuana bono matapaku hata.
A aba vai he to paku tamuana nana bono matapaku hata,
saka tara inana haana bene Karisito tea tootoo teve,
bara na toku ni nae.
7 Vahara baiko tenaa,
goe tea vaamanaata ki ta aba,
eve re mee vahoara kahi ameam bona omana.
A aba to paku nana bono matapaku mataa,
a totobin voen to totobin vo nae Karisito.
8 A aba vai he to paku tamuana nana bono matapaku hata,
a aba te Setan.
Ei kou e Setan na taneo paku komana ma roho bono matapaku vahata tea tanetaneo no munana.
Evehee a Baiko te Hunavaan na nomaa tea teki bona kiu te Setan.
9 A aba vai to paa tavusu baiko te Hunavaan vaevuru,
saka ante haana tea paku tamuana bono matapaku hata,
tea tabae a tootoo te Hunavaan na tei nana teve.
Aige,
suku bene eve a baiko te Hunavaan,
saka ante haana tea paku tamuana bono matapaku vahata.
10 Eara na ante rara tea nata voen,
a aba vai a baiko te Hunavaan ge te Setan,
kaakoo tea maa matapaku teve.
A aba vai to saka paku haana bono matapaku totobin bara to saka uruuru haa ri nana bona ba keara teve,
saka baiko te Hunavaan haana.
Va-uruuru vatatana
11 Eam na baitono ni ma roho a koara vai teo boni to taneo vamanamana roho am e Karisito:
Eara toro va-uruuru vatatana.
12 Eara toro goe tea paku voen te Kein to asun vamate roho bene keara teve.
Eove kou a aba te Setan.
Sovee kurusu meve asun vamate roho bene keara teve?
Ei kou o matapaku teve o hata,
o matapaku te keara teve he o totobin.a
13 Ba keara bara ba vavinanaa komane Karisito!
Goe tea babara,
bea ta teo munana ma koma hata ni kameam.
14 Eara na nata vo raen,
eara o taun mate roho,
evehee suku bene eara na va-uruuru vatatana rara,
meara tei me rara a tootoo vaneovoi.
Eteie to saka uruuru haa ni nana bona ba keara teve,
a taun mate vakisi.
15 Eteie to koma hata ni nana bene keara teve,
na potee nana bona aba vai a asuasun vamate aba.
Meam na nata vo nomen,
a aba vai a asuasun vamate aba,
na hiki ni nana bona tootoo vaneovoi vuhanae.
16 E Jisu na hee kokoraa ni bona tootoo teve,
mepaa ma mate karaara teo naono taparom.
Eove na ma vataaree araara bono matapaku va tea uruuru kaakoo tea mate teve.
Ei meara toro hee vaaruu nia tootoo teara tea haihai ria ba keara teara.
17 Bea aba vai a bero taba tara pinopino koana bona si aba vai to harusu nana,
beve saka haihai haana bona,
na hiki ni nana bona uruuru te Hunavaan vuhanae.
18 Vahara baiko tenaa komane Karisito!
Eara toro goe tea boha voen,
eara na uruuru ri rara a ba keara teara teo moroko koa.
Ahiki.
Eara he toro vataaree mamana nia uruuru teara beara haihai riori.
19 Beara paku vo teebona,
eara repaa nata voen,
eara na murina mamana rara a koara vai a omana.
Bara eara mee re saka paa haraa vahata haa tea sun matane Hunavaan teo vaneanava.
20 Beara haraa vahata rova rara,
eara he pasi tei mi veo kikisi tea vaneanava kie Hunavaan.
Eove kou to beera oha nana bona maa haraharaa teara bara to nata ni nana bona maamihu taba.
21 Tobara aba!
Beara ahiki ta hata vai toro haraa vahata suku ara,
eara repaa tei meo kikisi tea sun matane Hunavaan teo vaneanava.
22 Me beara hino e Hunavaan ta taba teo vaneanava,
eove repaa hee araara bona.
Eara kou na murina rara amaa vamora teve,
bara eara na paku rara amaa taba vai to vaamararae nana bona.
23 Mea lo te Hunavaan ei:
Eara toro vamanamana a hena na Baiko teve,
e Jisu Karisito.
Bara eara toro va-uruuru vatatana,
voen to boha me ka roho araarae.
24 Eori to murina rori bona lo te Hunavaan na tei rori te Hunavaan,
e Hunavaan he na tei nana teori.
E Hunavaan na hee roho araara bona Taun Penapena,
ei meara nata vo raen,
eove na tei nana teara.