2
Vahara baikoa tenaa komane Karisito,
enaa na kino ka nasu nom ameam amaa taba vai,
eam re goe tea paku ta hata.
Ei he be ta aba paku ta hata,
eara na tei me rara a aba to ante nana tea koara ki bene Hunavaan bona maa hata teara,
eove re umee me ka raara bona.
Eove e Jisu Karisito,
a aba vai a totobin.
2 Eove na hee ni bene eve potee bona va-asi,
mepaa mate suku bona maa hata teara.
Evehee saka maa hata teara koa haana.
Ahiki.
Eove na mate suku bona maa hata tea ta teo munana mee.
3 Meara na ante rara tea kona voen,
eara na nata vamataa ni rara e Hunavaan,
ei beara murina vamataa rara amaa lo teve.
4 Be ta aba boha vo naen,
“Enaa na nata ni nom e Hunavaan,”
beve saka murina pahi haana bona maa vamora te Hunavaan,
a aba bona a piipiku.
A omana saka tei haana teve.
5-6 A aba vai he to murina vamataa nana bona maa vamora te Hunavaan,
na uruuru mamana ni nana bene Hunavaan.
Me beara boha vo raen,
eara na tei rara te Hunavaan,
eara toro paku tavusu nia maa matapaku te Jisu Karisito tea maa tootoo teara.
Beara paku vo teebona,
eara repaa kona voen,
eara na tei rara teve.
Uruuru rio meho aba
7 Tobara aba tenaa!
A lo to kino nasu nom naa saka voon haana.
Ahiki.
A lo bona a tamuana.
Eam na baitono ni ma roho eve teo boni to vamanamana roho am e Jisu Karisito.
Mea lo bona ei,
a koara vai to paa baitono vaevuru ni maam.
8 Evehee a lo to kino nasu nom naa ei,
a voon vakisi mee.
A voon,
tea tabae,
eara na tara rara a omana nae tea tootoo te Karisito bara tea tootoo team mee.
Ei kou a mamana mamana paa para vaevuru,
mea booboni na kavara batana.
9 Be ta aba boha vo naen,
“Enaa na tei nom tea mamana,”
beve koma hata vakisi pahi ni nana bene keara teve,
a aba bona na tei vakisi nana tea booboni.
10 Eteie to uruuru ni nana bene keara teve,
na popo nana tea mamana.
Meve saka ante haana tea vaakuu ta aba teo matapaku hata.
11 A aba vai he to koma hata ni nana bene keara teve,
na popo nana tea booboni.
Meve na toku nana to kaakoo bata nae,
tea tabae a booboni to vaakehoo nana bona.
12 Vahara baiko tenaa komane Karisito!
Enaa na kino ka nasu nom ameam,
tea tabae e Hunavaan paa umee vaevuru me kameam bona maa hata team kaakoo te Jisu Karisito.
13 Enaa na kino ka nasu nom ameam,
to manoto nom teo koma vamanamana team,b
tea tabae eam na nata vamataa ni nom a aba vai to teitei komana roho,
o munana he mei nana tea tapaku.
Eam he tobara visoasi,
enaa na kino ka nasu nom ameam,
tea tabae eam paa oha mau a puana team mi bona aba vai a hata kurusu,
e Setan.
14 Vahara baiko tenaa komane Karisito,
enaa na kino ka nasu nom ameam,
tea tabae,
eam na kona ni nom e Hunavaan e Tamaraara.
Enaa na kino ka nasu nom ameam,
to manoto nom teo koma vamanamana,
tea tabae eam na nata vamataa ni nom a aba vai to teitei komana roho,
o munana he mei nana tea tapaku.
Tobara visoasi,
enaa na kino ka nasu nom ameam,
tea tabae eam o kikisi
bara koara te Hunavaan na tei nana vuhameam.
Ei meam paa oha ma a aba vai a hata kurusu,
e Setan.
Goe tea uruuru nio munana
15 Goe tea uruuru nia maa matapaku va teo munana bara maa taba va teo munana.
Eteie to uruuru ni nana bono munana,
saka uruuru haa ni nana bene Hunavaan e Tamaraara.
16 Eara na kona vo raen,
amaa matapaku va teo munana ei:
o manimanini va teo suini,
bara o manimanini va tea vaahito nia maamihu taba to tara raara,
ae o matapaku va tea hahaara tavusu nia maa taba vai to vaahito ni raara bara maa taba vai to paku raara.
A maamihu matapaku bona saka tavusu haa maana te Hunavaan e Tamaraara.
Ahiki.
Na tavusu maana teo munana.
17 O munana pasi kavara miu bona maamihu matapaku teve.
A aba vai he to paku nana bono manini te Hunavaan pasi tootoo vaneovoi nom u.
O aba vai to koma hata ni rori bene Karisito
18 Vahara baiko tenaa komane Karisito,
eara paa suguna vaevuru tea maa boni vagegeana.
Eam na baitono vo roho en,
“A aba to koma hata ni nana bene Karisitoc pasi nomau.”
Me nomana o bero to koma hata ni rori bene Karisito paa suguna vaevuru.
Ei meara nata vo raen,
eara paa suguna vaevuru tea maa boni vagegeana.
19 Eara na pate vavanoasi meri ma roho amaa tavaan bari,
meori paa tavusu kahi vahaa araara.
Eori saka vavanoasi mamana haa me ka ma roho araara,
tea tabae eori pari pate tei vakisi me kanom araara.
Eori he na kaokahi roho araara,
meara kona vo raen,
eori saka tei mamana haari teo vaagum teara.
20 Eam he saka paku haa vo nomen teori,
tea tabae e Karisito na vaovoi roho ameam bona Taun Penapena.
Ei meam kavara nata ni nom a koara vai a omana.
21 Menaa na kino ka nasu nom ameam,
suku bene eam na nata ni nom a koara vai a omana.
Enaa saka kino suku haa nom,
eam na toku ni nom a omana.
Ahiki.
Ei meam na nata vo nomen,
a koara vai a omana saka ante haana tea vaatavusu bono piku.
Ahiki.
22 Me eteie a piipiku?
A aba vai to voonihi vo naen e Jisu e Karisito a Sipoana.
A aba to voonihi ni nana bene Hunavaan bara Baiko teve na koma hata ni nana bene Karisito.d
23 Eteie to saka manaata haana bona Baiko te Hunavaan,
saka manaata haana bene Tamanae.
A aba vai he to manaata nana bona Baiko te Hunavaan,
na manaata nana bene Tamanae mee.
24 Eam toro vaupeupehe tamuana bata ni nom a koara to baitono momohu ni ma roho am,
eam he taneo tea vamanamana.
Beam ato vakikisi bata ni nom a koara bona,
a vavanoasi team mi bene Hunavaan bara Baiko teve repaa kikisi tamuana batana.
25 Rerau,
eara repaa gono a tootoo vaneovoi vai to sue vaovoi ni roho e Karisito.
26 Enaa na kino ka nasu nom ameam amaa taba vai,
eam re matatopo bata ri nom o aba vai to butara batari tea mee vahoara kahi ameam bona koara vai a omana.
27 Evehee Karisito na vaovoi ameam bona Taun Penapena,
meve na tei nana team.
Ei meam saka harusu haa ni nom ta aba vai toro vaasusu ameam.
Ei kou a Taun Penapena na vaasusu nom ameam bona maamihu taba.
Mea maa vaasusu teve amaa omana,
na hiki nana to piku teebona.
Meam toro murina amaa vaasusu tea Taun Penapena,
eam re tei vasuu te Karisito.
O baiko te Hunavaan toro aba totobin
28 Vahara baiko tenaa komane Karisito!
Eam toro tei vasuu te Karisito,
eara re ma goe tea ma naabu bara pote,
beve vaakaku vaha vo ma teo munana.
29 Eam na nata vo nomen,
eori to paku rori bono matapaku vai o totobin,
o baiko te Hunavaan,
tea tabae e Karisito a aba a totobin.