O leta momohu to kino roho e
Jon
A Koara na tavusu aba
1
Enam na kino ka nasu nom ameam,
tea sue tavusu nia koara vai to teitei komana roho,
o munana he mei nana tea tapaku.
A koara bona na baitono ni roho nam.
Na tara roho nam bona matamanam bara na ato roho nam bona kurimanam.
A koara bona,
e Jisu Karisito.
Eove a Koara vai a Tootoo.
2 Meve na gunaha vo ma roho teo munana,
menam paa tarae.
Ei menam sue tavusu kanom ameam voen,
eove a tootoo vaneovoi.
Eove na teitei komana roho mi bene Tamanae,
e Hunavaan nabunuu.
Evehee nomana paa tavusu vatataaree kavanam.
3 Enam na pate vavanoasi me nom e Hunavaan,
e Tamaraara,
ae a Baiko teve,
e Jisu Karisito.
Menam na sue tavusu kanom ameam a taba to tara bara to baitono ni ma nam,
eam re pate vavanoasi me kamanam.
4 Menam na kino ka nasu nom ameam tea sue vataaree nia maa taba vai,
eara re pate tei mea moramora tea vuharaara.
Pita tea mamana
5 Enam na sue tavusu kanom ameam a koara to baitono ni ma roho nam te Jisu Karisito.
A koara bona na boha vo naen,
e Hunavaan a mamana.
Ahiki kurusu sa booboni to tei nana teve.a
6 Eara na piku rara beara boha voen,
eara na vavanoasi mi rara e Hunavaan,
beara paku vakisi pahi rara amaa matapaku va tea booboni.
Eara saka paku tavusu haa ni rara a omana na koara te Hunavaan tea tootoo teara.
Ahiki.
7 E Hunavaan a mamana.
Me beara popo murina rara a mamana bona,
eara repaa vavanoasi vatatana me rio meho aba.
Rerau,
a revasin ne Jisu Karisito,
a Baiko te Hunavaan repaa vaatahavi araara kahi bona maa matapaku vahata teara.
8 Eara na piku komana rara eara,
beara boha voen,
eara ahiki ta hata.
A koara vai a omana saka tei haana teara.
9 E Hunavaan a totobin bara pasi paku tamuana bata nom bona maa taba to sue rohoe.
Me beara sue tavusu nia maa hata teara,
eove repaa umee me karaara bona,
bara eve repaa vaatahavi araara.
10 Eara na suu piipiku ni rara e Hunavaan beara boha voen,
eara saka paku haa roho ta hata.
A koara teve saka tei haana vuharaara.