E Jemis to kino roho teo leta vai.

Eove e keara te Jisu Karisito.

Eove a too Jiu to vamanamana bene Karisito.

Eara na ante rara tea ahe o moroko to sue nana bene Jemis teo buku Aposol,

bara tea meha maa buku va teo Niu Testamen.

Meara na kona vo raen,

e Jemis na kare vamanamana mana bene Jisu,

e Jisu he tavusu ki bona,

murina mate teve (1 Kor 15:7).

Ahiki beve vamanamana roho bene Jisu tea maa vuri momohu (Jon 7:5).

Eara mee na tara vo raen,

e Jemis a too vamee tea naba lotu (Aposol 21:18,

Gal 2:9).

Eara na kona vo raen,

e Jemis na kino bono leta vai,

eara he mei rara tea suguna teo vinu 62 AD,

tea tabae na asun vamate ori teo vinu 62 AD.

Evehee a naba natanata na toku kurusu ni rori bono vinu to kino e Jemis bono leta vai.

A meha papana na boha vo rien,

e Jemis na tei vai roho nana Jerusalem eove he kino bono leta vai.

A meha papana he na boha vo rien saka maaraa koa haa ni rori bono hum to tei vai roho nae,

eove he kino bono leta vai.

A ves 1 na sue nana bono vaagum aba vai to kino kiri nae Jemis bono leta vai:

“amaa tavaan vai to vamanamana rori bene Jisu Karisito bara to tabura vo roho tea meha maa kantri.”

Teo va Grik,

na takino vo naen,

‘a peha saavun buaku (12) a vuaba va Israel,’

mea bero teori o natanata na boha vo rien,

a peha saavun buaku (12) a vuaba va Israel,

ei eori a ta Jiu vai to vamanamana rori bene Jisu Karisito.

O bero teori o hovihovi bara o bero taba to teitei teo vuri te Jemis.

Eori o bero taba na vavaakisi ni bona maa bero taba teori.

Meori saka hahaihai haa ribene eori o hovihovi.

Me Jemis na moroko kiri nana bene eori o bero taba bara o hovihovi teo leta vai (1:9-11; 2:1-7; 5:1-6).

E Jemis na vaakikisi ri nana bene eori to vamanamana rori (1:2-8; 5:7-19),

bara na haihai ri na bari tea popo murina bene Jisu.

Eve na sue vakikisi vo naen,

eara toro simatoto a taba to sue raara (3:1-12).

Eara mee toro goe tea hahaara ge tea vaabeera eara komana (3:13-18; 4:13-17).

A meha taba mee to sue eve,

o meho aba toro tara bono koma vamanamana teara kaakoo tea maa matapaku to paku raara (2:14-26).

Beara saka paku tavusu haa ni rara o koma vamanamana teara,

o koma vamanamana teara na taba pinopino koana (2:14).