O leta to kino roho e
Jemis
vo tea ta Jiu to vamanamana rori bene Karisito
O moroko momohu te Jemis
1
Enaa e Jemis,
a too kiu kokoraa te Hunavaan bara te Jisu Karisito,
e Sunano teara.
Enaa na kino ka nasu nom ameam amaa tavaan vai to vamanamana nom e Jisu Karisitoa bara to tabura vo roho tea meha maa kantrii.
Enaa na vaanao nasu nom a uruuru tenaa vo team kurusu.
Sun vakikisi teo koma vamanamana
2 Tobara sahata,
beam vatatana mea maa kakukaku ponisi,
tara mie voen,
toro vaatavusu bona moramora.
3 Eam kou na nata vo nomen,
e Hunavaan na butara nana bono koma vamanamana teara,
eara re vaasusu tea sun vakikisi ae tea oha amaa ponisi.
4 Eara toro vaasusu tea sun vakikisi beara dee batara amaa ponisi,
eara re aba totobin ae manoto teo koma vamanamana teara,
bara eara re hiki to hum vai toro venevene raara.
Goe tea vovoeaka
5 Be ta peha team rake nana bono konakona,
toro hino bene Hunavaan,
eove repaa hee bona.
E Hunavaan na hee me nana bona kavara na vuhanae.
Eove saka ante haana tea sue vareasi ni ta aba be hino.
6 Evehee beam hino e Hunavaan,
eam toro vamanamana,
beam goe tea vovoeaka,
tea tabae o aba to vovoeaka rori na potee ri rori bono poha to hoa binubinu nana a iravata.
7 O kaku aba bari toro goe tea upehe voen,
pasi gono rori ta taba te Sunano.
Ahiki.
8 O vakokona teori na kevao nana,
saka tei vasuu haari tea maamihu taba to paku riori.
O hovihovi ae o bero taba
9 O hovihovi vai to vamanamana rori bene Hunavaan toro mararae voen,
eori o aba beera matane Hunavaan.b
10 Eori he o bero taba toro mararae voen,
e Hunavaan paa vataaree riu bari voen eori saka o aba beera haari.c
Eori pasi rova miu bona maa bero taba teori potee bono purupuru va mohina.
11 A roava na takae vahihivaa maana,
orepaa para vamarabi bono purupuru.
Rerau,
o taporohi nae repaa kuu,
a tara vamanin nae repaa rova.
Me na vaapeha nana,
a aba vai a bero taba pasi mateu tobina maa vuri peana teve.
Amaa harehare saka tavusu haa maana te Hunavaan
12 Eori to sun vakikisi rori tea maa vuri harehare bara tea maa vuri ponisi,
toro mararae suku bene eori paa ohau bona maa butabutara.
Meori pasi gonou bona voni teori,
ei a tootoo vaneovoi to sue vaovoi kiri roho e Hunavaan bene eori to uruuru ni rori bari.
13 Beam vatatana mea maa harehare,
goe tea boha voen,
“E Hunavaan to hare nom anaa.”
Ahiki.
Ei kou o matapaku hata saka ante haana tea hare bene Hunavaan.
E Hunavaan mee saka ante haana tea hare ta aba tea paku ta hata.
Ahiki.
14 Evehee amaa harehare to tatana raara na tavusu komana maana teo manimanini va teo suini.
15 Rerau,
amaa manimanini bona repaa mee araara tea paku bono matapaku hata.
Beo matapaku hata bona beera,
orepaa mee araara vo tea mate.
16 Tobara sahata,
goe tea vamanamana to piku.
17 A maamihu taba matamataa,
ae amaa taba heehee vai amaa tahavi na tavusu maana gina te Hunavaan.
Eove to paku bona mamana va teo suviri,
meve saka ante haana tea tapau potee bono abeabe to tapau binubinu nana.
18 E Hunavaan na rake nana beara gono a tootoo vai a voon kaakoo tea koara teve vai a omana,
eara re taba beera tea maamihu taba to paku rohoe.
Baitono bara paku suusue
19 Tobara sahata,
nata voen:
Kavara na aba toro nata tea baitono vakahu,
eori he toro goe tea moroko ae tea hevee vakahu,
20 suku bono hevee saka vaatavusu haana bono matapaku mataa vai to manini nae Hunavaan.
21 Ei meam toro vihana tea paku amaa matapaku vai to saka tahavi haana bara to saka mataa haana.
Eam he toro vaagunaha kia koara vai to paa taneba vuru vuhameam.
A koara bona na tei me nana bono kikisi va tea vatagae ameam.
22 Meam toro aba va tea paku suusue a koara te Hunavaan.
Goe tea baitono pinopino koai.
O aba to baitono koari,
beori saka paku suusue haari bona koara,
na piku komana rori bene eori voen e Hunavaan pasi vatagae riu bari.
23 Eteie to baitono koana,
be saka paku suusue haana bona koara,
na potee nana bona aba to sun nana matano siroakad tea tara to matamata vo nae.
24 Eove na siisira vamatamataa kurusu nana bene eve,
orepaa nao.
Evehee na umee vakahu vaha koana to tara vo nae.
25 Ei meam toro siisira bara upehe tamuana bata nom a lo te Hunavaan vai to baitono roho am,
beam goe tea umee eve.
A lo bona kou a totobin bara na rigarigaha ri nana bona maa tavaan.
Eam mee toro paku suusue bata nom amaa lo bona.
Beam paku vo teebona,
e Hunavaan repaa vaovoi ameam suku bona maa matapaku bona.
26 Be ta aba boha voen,
eove a aba va tea lotu,
beve paku pahi nana bona maa kaku moroko vai toro saka paku haa nae,
na piku komana nana bene eove.
O matapaku va lotu teve na taba pinopino koana.
27 A lotu vai a tahavi bara to hiki nana ta hata matane Hunavaan,
e Tamaraara ei:
tea kikira rio nagu bara o amoba vai to rake rori bona haihai ae tea kikira komana eara,
o matapaku va teo munana re goe tea vaparuparu araara.