Paku vaapeha kia kavara na aba
2
Tobara sahata,
to vamanamana me raara e Sunano teara,
e Jisu Karisito vai a mamairaka,
goe tea upehe voen,
o meho aba na mataa oha ri rori bono meho.
Ahiki.
2 Be ta aba hovo ma inu lotu team beve a va-uvu-uvu vamataa,
me bona gol ring kubisi kurinae,
a meha repaa hovo pete ma,
a hovihovi bara va-uvu-uvu vahata,
3 eam repaa tara inana koa a aba vai a va-uvu-uvu vamataa,
eam repaa sue kie,
“Ma hio tea sia vai,”
beam sue kia aba vai a hovihovi,
“Sun bata ma nom en rau,”
ge “Hio bata koa teo barandaa.”
4 Eam kou tavusu potee vuru a too raarare vai to tei me nana bono matapaku hata,
tea tabae o matapaku vai na vataaree vo naen,
eam na rake va-oha koa ri nom o peho vaagum aba,
o meho vaagum he ahiki.
5 Eam baitono sin,
tobara sahata.
E Hunavaan bene saka viana haa ribene eori o hovihovi va teo munana vai,
tea tei me bono koma vamanamana o beera bara tea vaahito ni bona vuabaa vai to sue vaovoi kiri rohoe bona maa tavaan to uruuru ni rori bari?
6 Eam he saka vasisio haa ri nom o hovihovi.
Saka o aba vai haari bene o bero taba to butara tamuana batari tea vamee ni bona tootoo team?
Saka eori haari to rahi nom ameam tea kot?
7 Saka eori haari to sue vahatahata ni rori bono hena mataa tea Aba vai to vaahito ni kanom ameam?
8 A peha lo te king teara,
e Hunavaan,
na tei nana teo Buku Penapena.
Na boha vo naen,
“Ean toro uruuru nia too noasimanb voen to uruuru me noman ean komana.”c
Me beam murina vamataa a lo bona,
eam na paku nom o matapaku mataa.
9 Evehee beam uruuru va-oha koa ri nom a meha papana,
a meha papana he ahiki,
eam na paku nom o matapaku hata.
Mea lo na rare nom ameam voen eam o aba hata suku bene eam paa kakuu a lo.
10 Bea peha aba murina vamataa kurusu nana bona kavara na lo te Hunavaan,
eove repaa kaku koa bona peha,
eove na vaapeha me nana bona aba vai to kaku nana bona kavara na lo.
11 Tea tabae e Hunavaan vai to boha voen,
“Ean toro goe tea varevaren,”
eove mee to sue voen,
“Eam toro goe tea asun vamate ta aba.”
Me bean saka varevaren rova haa nom,
ean he paa asun vamate vea aba,
ean na kaku vakisi nom a kavara na lo.
12 Ei mean toro moroko bara popo potee a aba vai to pasi ma rare vea lo vai to rigarigaha ri nana bona maa tavaan kahi bono matapaku hata.
13 Tea tabae bean saka koma uru haa ri nom o meho aba,
e Hunavaan mee re saka paa ma koma uru haa ni ki vuan teo boni rare.
Evehee bean koma uru ri nom o meho aba,
e Hunavaan repaa ma koma uru vaaruu ni ki vuan beve ma rare vuan.
O koma vamanamana tean o mate bean saka paku tavusu haa nie
14 Tobara sahata,
bean boha voen,
ean na tei me nom o koma vamanamana,
bean saka paku tavusu pahi haa ni nom ee,
o koma vamanamana bona na taba pinopino koana.
O kaku koma vamanamana bona saka ante haana tea vatagae vuan.
15 Be keara ge vavina raara harusu ni nana to hobohoboo ge ta taba-ani,
16 ta peha team repaa sue ki bona,
“Bara nao tea murun;
no ani vamahun bara no vaahihivaa nao a suini man,”
beve saka hee haana bona ta taba vai to harusu ni nae mene haihai bona suini nae,
a tabae a mataa to vaatavusu nae?
17 Na vaapeha nana,
bean tei koa me nom o koma vamanamana,
bean saka paku tavusu haa ni nom ee,
o koma vamanamana bona,
o mate bara na taba pinopino koana.
18 Ei he be ta aba boha voen,
“A meha papana na tei me rori bono koma vamanamana,
a meha papana he o matapaku mataa.”
Enaa repaa boha voen,
“Me havee to kahi vataaree vaavaha me noman o koma vamanamana tean bean hiki ni nom to matapaku mataa?
Enaa kahi vataaree uvuan o koma vamanamana tenaa kaakoo teo matapaku mataa tenaa.”
19 Ean na vamanamana vo nomen,
a peha Hunavaan koa to tei nana.
Mataa tea tei meo vamanamana bona.
O taun hata mee na vamanamana vo rori teebona,
meori totororoo me rori bono naabu.
20 Ean a babaaruu bean toku vo nomen,
bean saka paku tavusu haa ni nom o koma vamanamana tean,
o koma vamanamana bona na taba pinopino koana.
21 E suburaara,
e Ebraham,
na tavusu aba totobin matane Hunavaan suku bona taba to pakue,
eove he vaobete bona baiko teve,
e Aesak,
toon na poka va-asi,
ore va-asi ni bona.
22 Meve na maaraa nana,
o koma vamanamana te Ebraham bara taba to pakue na pate kiu.
O matapaku teve na vataaree voen,
o koma vamanamana teve o suuna.
23 Mea Koara te Hunavaan paa tavusu vasuuna,
ei to boha vo naen,
“E Ebraham na vamanamana bene Hunavaan,
me suku bono koma vamanamana teve,
me Hunavaan paa dao bona,
bona aba totobin.”
Eori mee na dao bari bene maagee te Hunavaan.
24 Ean tara vai,
a aba na tavusu aba totobin nana matane Hunavaan,
kaakoo tea maa taba to paku nae.
Saka teo koma vamanamana koa haana.
25 Na vaapeha nana te Rehab.
Eove a moon va tea varevaren,
eove he na tavusu aba totobin kaakoo teo matapaku to pakue,
eove he varavihi ribona tau sisiikoorud inu teve,
mepaa vaanao vahaa ribari kaakoo tea meha hanana.
26 Ei me beo suini hiki ni nana bona taun,
o suini bona o mate.
Na vaapeha nana,
bea aba saka paku tavusu haa ni nana bono koma vamanamana teve,
o koma vamanamana bona o mate.