Eara toro kikira a mearaara
3
Tobara sahata,
eara toro goe tea kavara tavusu siisia va tea lotu,
tea tabae a tarare to pasi ma gono veo siisia a beera va-oha.
2 A kavara raara na paku vahoara tamuana rara tea maa taba to paku raara.
A aba to saka sue vahoara haana ta taba teo moroko teve,
a totobin.
Na ante nana tea simatoto bona kavara na suini nae.
3 Beara vaatei e ta kapa rivo ne hoosu,
eara repaa rahi o kara kanono vai to kisi ni raara tea ta kapa bona,
e hoosu repaa bin me bona kavara na suini nae voen to rake vo raara.
4 Ean repaa tara pete teo toro seere vai o beera.
A iravata vai a beera toro hoa vakikisi tea vaakao bona.
Evehee a vohe to vakarovo ni nana bonaa vo teo hum to rake vo nae kepten,
o hum rutaa kurusu.
5 Na vaapeha nana,
o meanab o si rutaa hum va tea suini na aba,
evehee na hahaara nana bona maa taba bebeera.
Tara teo geto suraa,
o si rutaa rova,
evehee na ante nana tea asi bona rasuu vai a beera.
6 Mea meana aba mee na potee nana bono geto suraa.
Kavara na maamihu matapaku vahata va teo suini na tavusu maana tea rivo na aba.
Eve to teki nana bono suini bara to mirao nana bona tootoo tea aba.
O suraa vai na taneo maana teo suraa va hel.
7 Amaa tavaan na ante rori tea vaaraarau ribona maamihu kaku enimol,
o naovana vai to naovo rori gina,
o kuruu ae amaa kakukaku iana.
8 Ahiki he ta aba to ante nana tea vaaraaraau bono meana.
O meana na vaatavusu tamuana nana bona maa vakoara vahata vai amaa hata kurusu bara na potee nana bona kuruu vai to koto vamate nana bona aba.
9 Eara na vamatamataa rara e Hunavaan e Tamaraara bono meana bona.
O meana bona mee to kaesi hata ri raara o meho aba vai to paku ri roho e Hunavaan,
eori re matamata voen teve.
10 Tobara sahata,
a vamatamataa ae a kaesi hata na tavusu koa maana teo peho rivona.
Eara toro saka paku haa voen.
11 Ta ruene vai bene ta mataa bara ta hata na ante maari tea pate oro tavusu kaakoo teo peho boana koa?
Ahiki.
12 Tobara sahata,
o naono piig bene na ante nana tea vaatavusu bono vua oliv?
Ahiki.
O naono voaen na ante nana tea vaatavusu bono vua piig?
Ahiki.
Meara saka ante haara tea kana a ruene vai a mataa tea kokoe vai a tatahiana.
O buaku o kaku konakona
13 Eteie a konakona ae a natanata varirovana meam?
Eove toro vataaree ni bona,
kaakoo tea tootoo vai a mataa.
Eve toro vaagunaha beve paku batana bona maa matapaku mataa vai to tavusu maana teo konakona.
14 Ei he bean tei me nom a puuhio vuhaman bara bean manini nom tea oha rio meho,
goe tea varavihi a omana kaakoo teo matapaku va tea hahaara ae piku.
15 O kaku konakona bona na tavusu maana teo kasuana,
ei te Setan.
Saka va teo suviri haana bara saka va tea Taun Penapena haana.
16 Ei kou bea binin ae o manimanin va tea oha rio meho aba tei nana tea aba,
eove repaa piroto nana bona maamihu taba bara eve repaa paku nana bona maa kakukaku matapaku hata.
17 Amaa tavaan vai he to tei me rori bono konakona vai to tavusu maana te Hunavaan na paku rori bono matapaku mataa.
Momohu na popo vatahavi rori bara na rake rori bona murun,
a vasisio,
ae o vavaagunaha.
Eori na hapusu ni rori bono koma uru bara o matapaku mataa.
Eori na hiki ni rori bono piku bara saka uruuru va-oha haa ni rori bona meha papana,
a meha papana he ahiki.
18 Amaa tavaan vai to kiu rori tea paku bona murun,
na neba ni rori bono vua va tea murun,
meori pasi ma kabuu bono matapaku mataa.