Goe tea vaamararae o manimanini va teo suini
4
A tabae to vaatavusu nana bona maa vaasuasun ae vaasue varirovana meam? Saka tavusu haa maari bene tea maa manimanini va teo suini vai to vaneasun maari vuhameam? 2 Eam na rake nom a taba to hiki ni nomeam, ei meam asun vamate ri nom o meho aba. Eam na binin ri nom o meho aba, tea tabae eam saka ante haa nom tea gono a taba to tei me riori, ei meam vaasue bara vasuasun nom tea gono kahi riori bari. Eam na hiki ni nom a taba to rake nomeam, suku bene eam saka hino haa nom e Hunavaan. 3 Beam hino rova, eam he saka ante haa nom tea gono a taba to hino nomeam, tea tabae eam na hino me nom o vakokona vai o hata. Eam na rake koa nom tea gono taba mene vaamararae bono manimanin va teo suini.4 Eam to saka murina vamataa haa nom e Hunavaan!a Eam bene na toku vo nomen, beam uruuru nio munana, eam na vakomakoma hata me nom e Hunavaan? Bean viana tea uruuru nio munana, ean na vakomakoma hata me nom e Hunavaan. 5 Teo kona team, sovee mea koara te Hunavaan boha vo naen, “A Taun Penapena vai to vaatei roho e Hunavaan vuharaara na binin nana bea meha aba vaahito ni karaara”?b 6 E Hunavaan he na koma uruuru kurusu ni kanom araara. Eve a pusunae mea koara te Hunavaan boha vo naen,
“E Hunavaan na vaagunaha ri nana bene eori to hahaara rori,
eove he na koma uruuru ri nana bene eori to vaagunaha rori.”c
7 Ei meam toro vaagunaha kie Hunavaan. Gani e Setan, eove re rosin kahi ameam. 8 Kao vahusu vo nao te Hunavaan, e Hunavaan repaa kao vahusu vo ma team. Eam o aba hata toro garuhu a kurimeam, eam re popo vatahavi. Eam to buaku vakokona nom tea murina e Hunavaan, toro vaatahavi a vuhameam, o vakokona team re totobin tea murina vamataa e Hunavaan. 9 Eam toro tamaka bara beeben suku amaa matapaku vahata to paku nomeam. A haesi team toro taverete oga. A moramora he toro taverete tamaka. 10 Eam toro vaagunaha kie Sunano, eove repaa vaabeera ameam.
Goe tea rare rio meho aba
11 Tobara sahata, goe tea sue vahatahata rio meho aba. Eteie to moroko vahatahata ni nana bona meha aba ge to rare nana bona, na moroko vahatahata ni nana bona lo te Hunavaan bara na rare nana bona. Bean rare a lo, ean saka murina haa nom a lo, ean he na potee nom a too raarare. 12 E Hunavaan koa to hee ni nana bona lo bara eove koa a too raarare. Eove koa to ante nana tea vaatagae bara tea teki. Mean eteie to kahi rare nom a too noasiman?
Goe tea hahaara nia subunubu
13 Bara baitono, eam to boha vo nomen, “Nomana ge subunubu enam repaa nao tea taon vai, ge tea taon vaoi, enam repaa tei ma o peho vinu teebona, benam vaavoni ni ma nom ta maa taba mene gono moonii.” 14 Eam bene na nata ni nom a subunubu? A tootoo team na potee nana bono aho – to aho va sihum koana, ore paa rova. 15 Eam he toro boha pahi voen, “Beo manini te Sunano, enam repaa tootoo nom, enam repaa paku nom amaa taba vai ge amaa taba vaoi.” 16 Eam he na hahaara bara kou me nom amaa taba to rake nomeam tea paku. O hahaara bona o hata.
17 Ei me bea aba saka paku haa bona taba mataa vai to nata ni nae, toro pakue, eove na paku nana bona hata.