O aba vai o bero taba pasi ma tarareu
5
Baitono sin,
eam o bero taba!
Eam toro tamaka ae oga suku amaa taminoto to pasi tatana nomeam.
2 Amaa bero taba team na koava,
a ravarava he na ani o pehura.
3 Amaa gol ae silva team na pura.
A pura bona pasi vataaree ni kavameam voen,
eam na hata.
Amaa bero taba team pasi aniu bona suini meam potee bono suraa.a
Nomana amaa boni vagegeana,
eam he na vatamari pinopino vakisi nom amaa bero taba team.
4 Baitono ham!
Eam na vaakiu ri roho amaa tau kiu tea kabuu bona mohina team,
meam saka paa hee haa riori bona voni teori.
Mea voni teori na tahi sue nom ameam.
A naba kabuu na oga ki bene Sunano vai a Kikisi Va-oha,
meve na baitono ri na bari.
5 A popo team va teo kasuana na varuruva koa ma.
Eam na pirasi ni ma amaa taba amaa bero,
bara eam na upehe koa ma tea vaamararae amaa manimanin team komana.
Eam na ani vaponoto ni ma a suini meam,
meam ponoto potee ri nom o burumakao vai to matatopo ri riori tea asun vamate.
6 Eam na rare ria maa tavaan vai o totobin,
meam paa asun vamate riori,
ahiki he beori pau ameam.
Tei meo vuha masuu tea maa vuri taminoto
7 Tobara sahata,
eam toro tei meo vuha masuu,
ore suguna be Sunano nomaa vahaa.
Upehe a too neba – eove na tei me nana bono vuha masuu tea ihuana bono vuri siko tea huan,
ore vaapura bona maa vua teve.
8 Eam mee toro tei meo koma masuu bara eam toro sun vakikisi teo koma vamanamana team,
tea tabae sihum koa e Sunano re nomaa vahaa.
9 Tobara sahata,
goe tea vavorivori nia meha si aba.
E Hunavaan to mene ma rare ameam.
Tara ham!
A Too Raarare na sun koa maana teo matavusu.
10 Tobara sahata tenaa,
upehe nao o matapaku teo poropita vai to sue tavusu ni roho bona koara tea hena ne Sunano.
Eori na vataaree ara raara bono matapaku va tea tei meo vuha masuu.
Eori na siitore rova,
eori he na tei me bono vuha masuu.
11 Eara na kona vo raen,
amaa tavaan to sun vakikisi rori tea maa vuri siitore to tatana riori,
na mararae rori.
Tara te Job,
eove na tatana bona maa siitore sana,
eove he na sun vakikisi teo koma vamanamana teve,
meara paa tara to haihai vaavaha me roho e Sunano bona.
E Hunavaan kou na hapusu ni nana bona koma ove bara koma uru.
12 Tobara sahata,
a taba beera toro matatopo bata nomeam ei,
eam toro goe tea pokaa a hena no suviri ge o kasuana beam tau boha voen,
na mana nana ge o suuna.
Ahiki.
Eam toro goe tea pokaa ta hena na meha taba mee.
Eam toro sue koa voen,
“Aige,”
be aige,
ge “Ahiki” be ahiki.
Eam to mene ma sue,
“Omana teo suviri,”
e Hunavaan repaa ma rare ameam.
O kikisi teo vaneanava
13 Ta peha team na dee ponisi nana?
Eove toro vaneanava.
Ta peha na mararae nana?
Eove toro aheahe bona aheahe va tea vamatamataa.
14 Ta peha team na kamisi viravira nana?
Eove toro dadao ribona naba bebeera va tea lotu,
eori re vaneanava me bari,
beori havi bata ni rori bono vaanomo suini nae tea hena ne Sunano.
15 Beori paku bono vaneanava me bono koma vamanamana,
e Sunano repaa vatagae bara gae vasun bona aba vai a kamisi.
Beve paku roho ta hata,
e Hunavaan repaa rudaha bona hata teve.
16 Ei meam toro sue tavusu ki rio meho aba bona maa matapaku hata to paku am,
eam repaa pate vaneanava.
E Hunavaan repaa vatagae ameam.
O vaneanava tea aba vai a totobin na tei me nana bono kikisi,
me na ante nana tea paku bona maa taba bebeera.
17 E Ilaeja,
a aba to vaapeha koa me kara raara.
Eove na vaneanava,
a huan re goe tea siko.
Mea huan saka paa siko haa bono kukan o vinu ae a peha totoka (6) a sivao.
18 Rerau,
meve paa vaneanava vaha bana,
meo suviri paa vaasiko ma bona huan,
meo kasuana paa vaapura vamataa vahaa bona maa mohina taba-ani.
A aba to kao vahoara nana
19 Ba keara bara ba vavinanaa,
be ta peha team kaokahi bona koara vai a omana,
ta peha aba toro mee vaha ma bona.
20 Eam toro nata voen,
eteie to bin vaha maana bona aba vai to kao vahoara batana teo matapaku hata,
na vatagae nana bona taun na aba bona.
Me beve paku bono matapaku vai,
e Hunavaan repaa rudaha bona maa hata vai amaa bero sana kahi bona aba vai to kao vahoara batana.