O leta te Pol vo te
Pilimon
A uruuru te Pol bo Timoti vo te Pilimon
1
Pilimon!
Enaa e Pol to paa kino ki nasuu vuan o leta vai.
Enaa na karabusu suku nom a kiu te Jisu Karisito.
Enam bo Timoti,
e keara teara,
na vaanao nasu nom a uruuru tenam vo tean.
Enam na uruuru kurusu ni kiu noman to pate kiu vo raara.
2 Hee nia uruuru tenam te Apia,
e vavina raara,
bara te Akipus to pate kiu vakikisi bata me kanom araara,a
ae tea naba lotu vai to vaasunano rori bene Hunavaan komana inu tean.
3 O koma uruuru ae a murun te Hunavaan e Tamaraara ae te Jisu Karisito e Sunano teara,
na pate tei bata me kiu noman.
A uruuru bara o koma vamanamana te Pilimon
4 Pilimon!
Enaa na vaamataa tamuana ki nom e Hunavaan benaa upehe vuan tea maa vaneanava tenaa.
5 Tea tabae enaa na baitono nio koma vamanamana tean vo te Jisu Karisito ae to uruuru me noman amaa tavaan te Hunavaan.
6 Enaa na vaneanava me kiu noman,
ean re kikisi nom tea sue tavusu kirio meho aba bono koma vamanamana tean,
bara ean re nata vamataa nia maamihu taba matamataa vai to hee ara raara e Karisito.
7 Keara tenaa!
A uruuru tean vo teori to vamanamana rori bene Hunavaan na hee anaa bona moramora a beera sana bara na vaakikisi bono koma vamanamana tenaa,
ei kou ean na vaamararae ria vuha ria maa tavaan te Hunavaan.
E Pol na hino bene Pilimon tea manaata vahaa bene Onisimas
8 Ei menaa pari sue vakikisi kiu vuan a taba toro paku an,
tea tabae enaa na tei me nom o kikisi to hee anaa e Karisito.
9 Evehee suku bona uruuru to hee araara e Karisito,
menaa hino vasisio koa unoman.
Enaa e Pol,
a si sumeke bara enaa mee na karabusu suku nom e Jisu Karisito.
10 Menaa na rake vareko nom bean haihai e Onisimas.
Enaa na haihai eve tea nata ni bene Karisito,
enaa he tea tei inu karabusu.
Meve na potee kurusu nana bona si baiko tenaa mamana.
11 Eove saka paku haa ki roho vuan ta taba ta mataa tea maa vuri to oha.
Evehee nomana,
eove na ante vaha nana tea haihai vamataa araara a buaku.
E Pol na vaanao vaha bene Onisimas vo te Pilimon
12 Enaa vaanao vaha vai nasu e Onisimas vo tean,
a vuhanaa he na tei kurusu pahi batana teve.
13 Enaa paa rake nasu nom tea vaakisi nie,
eove re gono bona mahan tean tea haihai anaa,
voen to karabusu suku bata me nom naa o vaaree mataa ne Jisu Karisito.
14 Enaa he saka paa rake hau tea paku ta taba bean saka manaata haa nom.
Enaa saka rake haa nom tea ehau vuan tea haihai anaa.
Ahiki.
Ean toro haihai anaa teo manimanin tean komana.
15 Eam bo Onisimas na vakahi amaa si vuri vai.
A pusunae bau ei,
eove re vaakaku vaha nasu,
eam repaa pate tei vaovoi vahaa.
16 Ean toro goe tea tara vaha mie voen,
a too kiu kokoraa koa.
Ahiki.
Eove paa mataa ohau bona too kiu kokoraa.
Eove na potee nana bona si keara teara komane Karisito.
Enaa na uruuru kurusu ni nom ee,
evehee a uruuru tean vo teve toro beera va-oha.
Ei kou eve a too kiu kokoraa tean bara e keara tean komane Sunano,
17 me bean tara me kanom anaa en,
eara a bua too kiu te Sunano,
ean repaa vaavoosu eve,
voen to pasi ma vaavoosu me kavanaa an.
18 Beve paku ki roho vuan to matapaku hata ge beve dinao roho ta taba tean,
enaa na rake nom bean vaatei eve tea henanaa.
19 Enaa pasi pau vahaa vee.
Enaa komana e Pol to paa kino nasuu teo leta vai.
Ean komana toro paku kamanaa ta taba,
suku bene naa to haihai vuan tea gono a tootoo vaneovoi,
enaa he saka rake haa nom tea moroko nie.
20 Keara tenaa,
paku vareko kamanaa a taba to paa hino nasuu naa suku bene eara a bua tom keara komane Karisito.
Vaamararae ma a vuhanaa komane Karisito!
21 Enaa paa kino rova nasu veo leta vai,
enaa he na kona vo nomen,
ean pasi paku vea taba vai to paa hino nasuu naa,
bara ean mee pasi paku va-oha vakisiu o hino tenaa.
22 A meha taba mee,
eam toro vaamatatopo kanaa to hum goroho,
tea tabae enaa na matamatana vo nomen e Hunavaan kahi vaataenau bona maa vaneanava team,
enaa re voosu vahaa vo nasu team.
A uruuru vo te Pilimon
23 Enam bo Epapras na pate karabusu suku nom o vaaree mataa ne Jisu Karisito.
Eove na vaanao nasu nana bona uruuru teve vo tean.
24 Ere Maaka,
Aristakus,
Demas ae Luk mee na vaanao nasu rori bona uruuru teori vo tean.
Enam to pate kiikiu bata nom.
25 O koma uruuru te Jisu Karisito e Sunano teara,
pasi teiu tea vuhameam.