Vamanamana a Baiko te Hunavaan
5
Eori to vamanamana vo rien,
e Jisu Karisito a Sipoana,
eori o baiko te Hunavaan.
Eori to uruuru ni rori bene Hunavaan e Tamaraara,
na uruuru ri rori bono baiko teve mee.
2 Beara uruuru ni rara e Hunavaan bara beara murina rara amaa lo teve,
eara repaa nata voen,
eara na uruuru ri rara o baiko teve.
3 A uruuru te Hunavaan kou ei,
beara murina amaa lo teve.
Mea maa lo teve saka vatokutoku haa kanom araara tea murina,
4 tea tabae a maamihu baiko te Hunavaan na ante rori tea oha bona maa matapaku vahata va teo munana.
Meara na ante rara tea oha amaa matapaku hata va teo munana,
suku bono koma vamanamana teara vo te Hunavaan.
5 Eteie to ante nana tea oha bona maa matapaku va teo munana?
O aba vai koa to vamanamana vo rien,
e Jisu Karisito a Baiko te Hunavaan.
6 E Jisu Karisito a aba vai to nomaa vo roho teo munana.
Mepaa gono bona baptais ruene.
A revasin nae mee na oro roho teo naono taparom tea vaatagae araara.
E Jisu saka nomaa haa,
eove re gono koa bona baptais ruene.
Ahiki.
Eove na nomaa eove re gono bona baptais ruene bara a revasin nae re oro teo naono taparom tea vaatagae araara.
A Taun to sue tavusu ni nana bona.
Mea Taun na sue tamuana nana bona maa taba vai amaa omana.
7 Evei a kukan a taba to vataaree me kanom araara en,
e Karisito na nomaa taneo te Hunavaan:
8 A Taun bara ruene ae a revasin.
Meori a kukan na sue koari bona peha taba.
9 Eara na vamanamana rara amaa taba to sue tavusu ni rio aba.
Evehee amaa taba to sue tavusu ni nae Hunavaan,
na beera oha nana bona maa taba to sue tavusu ni rio aba.
Me Hunavaan na sue tavusu komana ni roho bona Baiko teve.
10 Eori to vamanamana rori bona Baiko te Hunavaan,
na baitono rori bona maa taba to sue roho e Hunavaan.
Mea maa koara bona na tei nana vuhariori.
Eori he to saka vamanamana haari bene Hunavaan,
na suu piipiku ni rori bene Hunavaan.
Ei kou e Hunavaan na sue tavusu ni roho bona Baiko teve,
eori he saka vamanamana haari bari.
11 Me Hunavaan na sue tavusu voen,
eove na hee araara bona tootoo vaneovoi kaakoo tea Baiko teve.
12 A aba to tei me nana bona Baiko te Hunavaan vuhanae,
na tei me nana bona tootoo vaneovoi.
A aba vai he to hiki ni nana bona Baiko te Hunavaan vuhanae,
na hiki ni nana bona tootoo vaneovoi.
Vaneanava
13 Enaa na kino ka nasu nom ameam,
to vamanamana nom a hena na Baiko te Hunavaan,
eam re kona voen,
eam na tei me nom a tootoo vaneovoi.
14 Meara na tei me rara o kikisi tea sun matane Hunavaan teo vaneanava.
Tea tabae eara na nata vo raen,
beara hino eve ta taba vai to vaamararae nana bona,
eve repaa baitono araara.
15 Suku bene eara na kona vo raen,
na baitono nana bona maa vaneanava teara,
eara toro vamanamana voen,
eara paa gono vaevuru a taba to paa hino vuara.
16 Be ta peha aba tara ta keara teve,
beve paku nana to matapaku hata vai to saka vamee haa vo nana tea mate,
eve toro vaneanava,
e Hunavaan re hee bona,
bona tootoo vaneovoi.
Evehee na tei nana a hata vai to vamee vo nana tea mate.
Enaa he saka sue haa kanom ameam tea vaneanava merio aba vai to paku rori bona hata vai to vamee vo nana tea mate.
Ahiki.
17 A maamihu matapaku vahata amaa hata,
evehee saka maamihu matapaku vahata haana to vamee vo nana tea mate.
E Hunavaan na kikira ri nana bono baiko teve
18 Eara na nata vo raen,
o baiko te Hunavaan saka ante haari tea paku tamuana bona maa matapaku hata,
tea tabae e Jisu Karisito,
a Baiko te Hunavaan,
na kikira ri na bari.
Me Setan saka ante haana tea teki ribari.
19 Eara mee na nata vo raen,
eara o baiko te Hunavaan.
O munana he na tei nana paana vamee te Setan.
20 Meara na nata vo raen a Baiko te Hunavaan na nomaa,
meve paa ma hee araara bono natanata,
eara re nata nie Hunavaan mamana.
Meara na tei rara te Hunavaan vai a omana,
suku bene eara na tei rara tea Baiko teve,
e Jisu Karisito.
Eove e Hunavaan mamana bara a tootoo vaneovoi.
21 Vahara baiko tenaa komane Karisito,
tei vaavaha kahi bata ri nom o hunavaan piipiku.