Nahúm
Willacü Nahum Isquirbishan
1
Elcos malcayu Nahummanmi suyñuyninćhünu Tayta Dios licachin,
Ninive malca camacaycüśha cananta willacunanpä.a
Ninive malcacta Tayta Dios piñacuywan cutichicunanpämi nin
2 Tayta Diosꞌa silüsu,
cutichicü Diosmi.b
Tayta Diosꞌa sumä walayä cutichicümá.
Pay ćhïnicünincunacta cutichicülunꞌamá;
cuntra partincunapä śhunꞌunpis sumä-sumämá timpuyan.
3 Tayta Diosꞌa ñacayta piñacü,
sumä munayniyümá;
juchayücäta mana mućhuycachishacta manamá caćhaycunmanchu.c
Tayta Diosꞌa lücu tamyacunaćhu,
sumä waywacunäćhüpis puliyanmá.
Pucutaycunäpisd pulishanpä pulbullanmá.
4 Pay,
lamarcäta piñapäluptin chaquïlunmá,e
mayucunäpis wapsiyalmá chaquïlälin.
Basan,
Carmelo läducunäpis awïlälinmá;
Libano ulꞌucunäćhu waytacunäpis lluymá chaquïlälin.
5 Paypa puntanćhuꞌa ulꞌucunaca chucchupäcunmá;
ulꞌunpalcücunäpis chullupäcunmá;
cay pachäpis,
allpäpis,
chayćhu lluy cawsäcunäpis
altu-altumanlämá paćhcatityapäcun.f
6 Paypa śhunꞌun timpuyaptin
puntanćhu ¿mayanmá caycunman?
¿Piñacuyninta mayanmá awantaycunman?
Sumä walayä piñacuynin ninanümari yalayämun;
paypa ñawpäninćhu wancacunäpis lluymá amshülun.
7 Ñatac Tayta Diosꞌa,
sumä allinmá;
llaquićhu cayaptinchic sumä murällanchicnümá caycun.
Payman chalapacücunäta ñawillanćhümá caycachimanchic.
8 Ćhïnicünincunactañatacmi ichá
sumä-sumä llüllanu camacaycülunꞌa.
Cuntrapartincunacta yanawyaycämanmá aticaćhanꞌa.
9 ¿Imactamá Tayta Diospa cuntran pinsayanqui?
Payꞌa jucllaćhümá camacaycüśhunqui.
Ćhïnicünincunacta jucllaćhümá pay chincächinꞌa.
10 Sumä-sumä shincäśhactanümi,
watanacüśha caśhactanümi,
pasaypi chaqui päśhactanümari chincächishunqui.
11 Ninive malca,
ampïtamari yalamula
Tayta Diospa cuntran śhalcüca,
mana allin juyu caminaycüca.
12 Chayurá Tayta Diosmi nin:
“Masqui Asiria lädu sumä-cama,
achca-achcawan cunchawänacüśha cayalcaptinpis
camacaycüluptinmá mana cäman muyupäcunꞌa.
Am Juda läductañatacmi ichá masqui anchap
ñacayächilpis manaña mastá ñacachishayquiñachu.
13 Cananꞌa ñacachishüniqui yüguctamá paquïshä;
ćhänalächishuśhayqui latiguctamá laćhüśhä” nil.g
14 Ninive malcactam Tayta Dios nin:
“Śhutiquita apaycunanpäpis milayniquicuna
manañamá quïdanꞌachu.
Taytachayquicunap capillanpïtapis ilupi,
jïrrupi cä taytachayquicunacta camacaycüśhämá.
Millachicuynu caśhayquipïtamari
sipultürayquita quiquí lulayá” nil.
Ninive malca camacaycüśha cananpämi nin
15 Licapäcuy,
jawcayaycäta,
allin willacuycäta apamücah
ulꞌucunämanñamá jiꞌacaycayämun.
Am Juda,
fistayquicunactari caśhan lulaycäliy,
limalicuśhayquicunamannuꞌari lulaycäliy.
Ćhïnicüniquicuna maquinćhu manañamá
cachipäcuśhunquiñachu;
pasaypipäñamá camacaycüśha canꞌa.