2
Ninive malca,
camacaycuśhüniqui jiꞌacaycayämunñamá.
Sumä murällayquicunacta täpalay,
caminucunäta awaytay,
ispädayquita wiyawniquiman watacuy,
pilyäniquicunactapis lluy juntuycuy.
2 Masqui Jacobta,
Israelta camacäluptiquipis,
übap pallaynintanu mana caśhanman muyüchiptiquipis
Tayta Diosmá chay sumä cayninta caśhan cutiycachinꞌa.
3 Alli-cama pilyäcunäpa atajachicuncuna
puca-pucamá cacuyalcan;
pilyäcunäpis muräduwan müdacälälishamá cacuyan.
Carritancunapis nina walayänümá chipipicyacuyalcan;
lluy allichaculcaptin lansancunapis chucchupäcunmá.
4 Carritacunaca mana śhaycuyculmi
caminucunäpa shiwyaylla-shiwyacuyalcäña;
läsacunämanmá mana-mana alacaculcäña.
Nina walayänümá malluyalcäña;
räyunümá wicman-cayman jiꞌacaycäliña.
5 Masqui Ninive alli-cama
pilyänincunacta ayachimuptinpis,
difindiculcänanpämari jalunacul-jalunacul
murällaman mana-mana śhapämuña.
6 Mayup puncuncuna quićhacacüluptinmá
palasyun mana caśhanman muyülun.
7 Camachishañamá cayan:
Ninivea prïsu puśhaśhamá canꞌa.
Sirbïnincuna maquillantapis tällalcul-tällalculb
ulpaynümá waꞌaculcanꞌa.c
8 Ninive malcaca yacunta mana tacyachï
aśhäśha ućhanümá cayan.
Chaymari “¡Amaña ayipäcuychu;
śhaycapäcuyña!”
nil ayaycaćhapäcuptinpis,
manaña mayanpis cutipämunñachu.
9 Canan má,
illayninta waycapäcuy;
ürunta suwapäcuy.
Ninivep cänincuna,
imaymana aläjancuna mana camacaycü,
munayllapämari timpuyan.
10 Pulumäśha,
chunyayä,
pampaman muyüchishañamá cayan.
Śhunꞌuncuna pasaypim chulluyan;
unꞌulnincunapis chucchuyanmá;
jinantin aychan catcatayanmá;
cäranpis manañamá cärañachu.
11 ¿Mayćhümá liyuncunap maćhaynin?
¿Mayćhümá liyunchacunap wasin?
Canan,
¿mayćhümá liyunca uña liyunchancunawan
jawcalla caycuśhan,
mana mayanpapis
manchaycachisha caśhanca cayan?
12 Ćhina liyunnincuna
micunanpä imactañapis wañuchilamá.
Liyunchancuna micunanpä liyunca
imactapis camacayculamá.
Aychacunawan maćhayninta sumämá juntachila.
Suwacuśhancunacta wasinman tawaculamá.
Lluy chaycuna ¿mayćhütá canan cayan?
13 Sumä munayniyu Tayta Diosmi nin:
“Canan,
ampa cuntrayquim śhayämú.
Carritayquicunacta cañayculmi ućhpaman licalïchishä.
Uña liyunchayquicunacta ispädawanmi camacaycüśhä.
Suwacuyniquitapis ampïta chincächishämá;
manañamá willacüniquicunap willacuyninta
mayanpis uyalinꞌañachu” nil.