Tayta Diostam Jonas mañacun
2
Chay jatun challwap patanćhu Jonas winalayalmi Tayta Diosninta mañacücuyan:
2 “Tayta Diosllay,
jatun llaquicuynïćhu mañacuptí
uyaliycallämälanquimá.a
Wañuycäpa patanćhu cayal ayacamuptïpis
uyaliycallämälanquimá.
3 Cay yacup luli-lulinmanmi,
lamarcäpa śhunꞌunmanmi wicapalpämanqui.
Altu-altuman mächicacücunäpis ñiticalpamanmá,
janänïpam wicman-cayman pasaycaćhacun.b
4 Chaymi ‘Tayta Diosní manañaćh
licaytapis munamanñachu;c
alawana chuya wasintapis manañaćh licaycuśhäñachu’ niyá.
5 “Yacucá lluy-lluyñatacmi millpacalpaman.
¿Mayćhüñaćh cachicamanpis?
Cay luli-luli yacućhu cä ulacunäpis
ächäman lluy-lluyñamá watacacülun.
6 Ulꞌucunäpa sapincamañamá jiꞌacalpú.d
Allpaca millpacalpamaptin wićhacuncuna
wiña-wiñaypäñamá wićhacacülun.
Ñatac am Tayta Diosnillämi
wañuycäpi julaycallämanqui.e
7 Wañuyca janänïćhüña cacuyaptinmá,
am Tayta Diosnïta yalpälul mañacamullalac.
Chay mañacuyllá chuya alawana wasiquiman ćhaycamulamá.
8 Yanꞌal mana bälï taytachacunaman chalapacücunacá
llaquipayniquita ipanchälälinmá.
9 Yaꞌañatacmi ichá sumä anradisicüśhä
sirbicuśhayqui,
alawaycuśhayqui.
Limalicuśhätapis imam nishätanüllamá lluy lulayculläśhä.f
Am Tayta Diosllämá salbaycüca canqui” nil.
10 Chaynu mañacuptinmi Tayta Dios challwäta lamar manyanman lilcachil Jonasta ätüchimun.