Ninive lädu nunacunämi juchanpïta wanaculcan
3
Chaypïtam Tayta Dios yapañatac nin:
2 “Jonas,
canan Ninive jatun malcaman lil yaꞌa nishacta willacamuy” nil.
3 Niptinmi Tayta Dios nishanmannu Ninive malcaman Jonas licun.
Má,
chay malca jatun captinmari quimsa muyun puliycuylä intirunꞌa cacula.
4 Ñatac chayman ćhayculmi juc muyunllaña willacuśhtin Jonas pulila:
“Cay Ninive malcacta Tayta Dios camacaycünanpä tawa ćhunca (40) muyunllañam cacuyan” nil.
5 Niptinmi jinantin Ninive lädu nunacunaca Tayta Dios willacachishanta uyaliculcäla.
Jinalmi jatunpis uchuyllapis llaquicuypïta shicacü müdanacunawan ćhulaculcul ayunapäcula.a
6 Ninive lädup mandacüninman willacuyca ćhäluptinmi paypa śhunꞌunpis alalälun.
Chaymi dispächunpi śhalcuculcul,
müdananta lluśhtiycul,
shicacü müdanawan ćhulaculcul ućhpap jananćhu täcula.
7 Chaypïmi mandacüca lluy puydï yanapänintin camachicuyta camalcachil Ninive malcäman willacachila cay nil:
“Tayta mamacuna,
ima micuyllactapis lluy nunacunaca,
uywacunaca ama micapäcuchunchu.
Amatac michiypis,
yacu upyachiyllapis atipäcuchunchu.
8 Aśhwanpa shicacü müdanawan ćhulacalcälil llapan śhunꞌuyquiwan uywantin-cama Tayta Diosta mañaculcay.
Mana allin cawsayniquicunacta caćhaycäliy;
juyu lulayniquicunapi wanaculcay.
9 Jinaptinchic ichaläpis Tayta Dios sumä piñacuyninta manalcachinman,
jawcayaycunman;
jinal nï camacaycamachwanlächu” nin.
10 Chaynu Ninive malcaca mana allin lulaynincunapi wanaculcaptinmi,
Tayta Dios allin camacaycüśha niyäśhanpïpis manaculcula.b