Camacaycunan muyunca ćhämunanpïmi nin
2
“Yaꞌa Tayta Diospa muyunní cayllaćhüñamá cacuyan.
Tayta Diospa ćhämuynin jiꞌacaycayämunñamari.
Chayurá chuya Sionćhu curnitillacta tucapäcuy;
chuya ulꞌüćhu willaculcay.
Jinantin allpäćhu cäcuna chucchupäcuy.
2 Chay muyun pasaypi itiwyayä muyunllañamá cacunꞌa.
Sumä yanawyayä pucutayllañamá cacunꞌa.
Jinantin ulꞌucunäman wäla achicamücänümá jiꞌacaycayämun.
Sumä-sumä cä malcamá achca-achca pilyänincunawan śhamunꞌa.
Chaynüta manamá imaypis licalanchicchu;
nï śhamü watacunäćhüpis manamá canꞌachu.
3 “Nina walayäcänümari puntanćhu ima cäcunactapis camacaycülunꞌa.
Ipanpapis śhanśhay-śhanśhay ninamá pampaman muyüchinꞌa.
Manaläpis ćhäpämuptinꞌa malcaca Eden wirtanümá cala.
Chaypïtá pasaypi pulumäśha chunyäñamá quïdälunꞌa.
Paypa maquinpïta manamá mayanpis ayinꞌachu.
4 Paycuna cawallucunänümi capäcuña.
Cürripäcuñäpis cawalluman sillacüśhacunänülämá.
5 Ulꞌucunäpa jananpa paćhcapäcuptin
suynaynin gïrrapä cä carritacunänu,
ninaca paꞌaśhacunäta lapaćhaćhyaylla lupaśhancänümá cacuña.
Paycuna sumä munayniyu malca,
gïrrapä listu-listu cayäcänümá cayalcan.a
6 Paypa puntanćhu lluy malcacunämá chucchupäcun;
manchacuypïmá cäranpis yuläyäśha-cama cayalcan.
7 Sumä-cama pilyäcunänülämi cürripäcun;
cachacucunänülämi pilancunactapis ishpipäcun.
Maymanpis mana muyulcullalmá
lishanpa-cama yaycapäcun.
8 Manamá liwshï-masincunawan tanꞌanaculcanchu;
lishanpa-camamá lipäcun.
Masqui muyülïninman flïchacuna ćhaptinpis manamá chiꞌipäcunchu.
9 Malcamanmi lipäcun,
pilamanmi ishpipäcun,
wasicunämanmi wichapäcun,
suwacunänümi bintanancunap śhaticaculcan.
10 “Paycunap puntanćhu allpaca chucchunmá;
sïluca catcatanmá.
Intïwan quilläpis manañamá acchipäcunñachu;
uyllurcunäpa acchiyninpis wañucunñamá.b
11 Cachacuncunap ñawpäninćhümi
quiquin Tayta Dios räyunülä limalpämun.
Pilyänincuna achca-achcamá;
paypa nishanta uyalicücunaca sumä-camamá.
Tayta Diospa muyunnin sumä jatu-jatun manchaymá.
¿Mayantá tacyaycunman?”
nil.c
Tayta Diosman cuticalcämunanpämi nin
12 Má,
Tayta Diosmi nin:
“Llapan śhunꞌuyquiwan Tayta Diosman cuticalcämuy.
Micuytapis caćhaycul llaquicuywan,
waꞌacuywanꞌari cuticalcämuyña.d
13 Müdanayquita laćhyapäcunayquitá śhunꞌuyquitari laćhyaculcay.
Cuyacuyniyu,
llaquipayniyu,e
ñacayta piñacü,
jatu-jatun śhunꞌuyu,
lawćhaycuytapis manaculcü
cä Tayta Diosmanꞌari cuticalcämuy.
14 Jinaptiqui ichapis Tayta Diosniqui manalcul
allinpalä licaycuśhunquiman.
Jinal ćhacla micuytawan jillpuywan Tayta Diosman uycunacta
uycälinayquipä trïguctawan
bïnucta uycälishunquimanlämi canpis.
15 “¡Sion ulꞌućhu curnitillacta tucapäcuy!
¡Ayünucta lulapäcuy!
¡Juntunacunanpä ayachipäcuy!
16 Jinantin malcäta juntuycul
Tayta Diosllapäña japächaycuy.
Yaśhacunäta ayachimuy;
urucunäta aśhta iñachacunätapis puśhapämuy.
Chayllalä casaracücunäpis
puñupäcuśhanpi yalapämuchunñari.
17 Sasirdüticunäwan Tayta Diosta sirbïcunaca waꞌapäcuchun,
uycuna patacpi patyu läduman linaćhu cay nil:
‘Tayta Diosllay,
cay malcallayquita llaquipaycälillämay.
Ampa tücäniquita amari pinꞌayman ćhulaycälillämaychu;
amatac mana Israel caśhtacunap maquinman jitaycälillämaychu.
Juc malcacunaca amari niyalcächunchu
¿Mayćhütá Tayta Diosnin cayan?’ ”
nil.f
18 Jinaptinmi Tayta Dios malcanta llaquipaycul
juchanta pampachaycunꞌa.
19 Jinalculmi malcanta Tayta Dios ninꞌa:
“Maćhaycälinayquicamam trïgucta,
bïnucta,
asayticta uycälishayqui.
Cananpïtá manañamá juc nasyuncunap
asipäśha capäcunayquipä ćhulaycapäcuśhayquiñachu.
20 “Awari,
chay nurti lädupi alli-alli śhamücunätamari amcunapi japächalcul
pasaypi chaqui chunyä läduman alapacüśhä.
Puntamünintapis Wañüśha Lamarmanmá jitalpuycüśhä;
ipanpa śhamünintapis inti yalamunan lädu lamarcäćhümá camacaycüśhä.
Chay ismuśhanpa aśhnayninmi ishpimunꞌa.
Chaynu sumä lulaycunactamari Tayta Dios lulaycun.
21 “Am allpa,
sumä cushicuy;
ama manchacuychu.
Tayta Diosmá sumäcunacta lulaycunꞌa.
22 Am munti uywacuna,
ama manchaculcaychu.
Chunyäcäćhu pastucunaca chillquipämunꞌamá.
Lluy lantacunaca wayupäcunꞌamá;
ïguscäwan üba lantacunäpis sumätamá wayuycälinꞌa.
23 Am Sionćhu cäcunäpis cushiculcayꞌari;
Tayta Diosniquićhuꞌari sumä cushiculcay.
Paymá timpullanćhu tamyäta tamyaycachimunꞌa.
Punta caśhantanümá punta tamyactapis,
puꞌuy tamyactapis tamyaycachimunꞌa.
24 Lluy ïracunaca trïguwan juntächishamá capäcunꞌa.
Üba apchinapä cäcunäpis bïnuwan asaytiwan llüllayämá capäcunꞌa.
25 “Yaꞌamari alli-alli cachacucunactanu amcunaman
puyucunacta,
siñaśhcunacta,
utushcunacta,
paćhcaśhcunacta caćhamulá.
Chaycuna micapäcuśhantañatacmi ichá caśhallan yaꞌa cutiycachimuśhä.
26 Maćhaycälinayquicamamá micapäcunqui.
Tayta Diosniqui amcunawan sumäcunacta lulaycuśhanpïmá
paypa śhutinta altuman julaycälinqui.
Malcá manañamá imaypis pinꞌayćhu canꞌañachu.
27 Chayurá yaćhapäcunquim Israelpa ćhawpinćhu yaꞌa caśhäta;
jinaman Tayta Diosniqui yaꞌa caśhäta;
chaynütac yaꞌapïta juc mana caśhantamá yaćhapäcunqui.
Malcá manañamá pinꞌayćhu canꞌañachu.g
Tayta Diospa Ispiritun śhamunanpïmi nin
28 “Chaycuna pasäluptinmi jinantin nunacunäman
Chuya Ispiritüta ćhaycachimuśhä.h
Jinaptïmi walaśh wamla chuliquicuna willacuynïta willaculcanꞌa.
Yaśhacunäpis suyñuyninćhümi musyapäcunꞌa.
Müsucunäpis Tayta Dios licachishantamá licapäcunꞌa.
29 Chay muyuncunaćhütacmi lluy sirbïní wayapamanpis
walmimanpis Chuya Ispiritüta caćhaycamuśhä.
30 Cay allpäćhüpis sïlüćhüpis sumä-cama lulaycunallamá cacunꞌa;
yawarlla,
ninalla,
jinaman sumä-sumä untayllamá cacunꞌa.
31 Tayta Diospa sumä-sumä manchay muyunnin
manaläpis ćhämuptinmá intica tutawyayman muyunꞌa;
quilläpis yawarmannu licalinꞌa.i
32 Mayanpis Tayta Diosman ayacücunämá salbaycuśha canꞌa.j
Tayta Dios nishannümari Sion ulꞌućhu,
Jerusalenćhüpis salbaculcanꞌa.
Tayta Dios aclaśhancunäwan cuscamari salbacunꞌa” nil.