Joel
Willacü Joel Isquirbishan
Lluy-lluy camacaycüśha cananpämi nin
1
Petuelpa chulin Joeltam Tayta Dios cay willacuyta niycun:
2 “Yaśhacuna,
cayta uyalipäcuy.
Jinantin allpäćhu cä nunacuna,
caycunacta uyalipäcuy:
¿Cay timpucunaćhu ütac taytayquicunap
timpuncunaćhu caynücuna pasalachun imatá?
3 Caycunactari chuliquicunaman willaycuy,
chuliquicunañatac chulincunaman,
chulincunañatac śhamü milaynincunaman willaycälichun.
4 Puyu caćhaycuśhantamá
siñaśhca micucülun.
Siñaśh caćhaycuśhantañatacmi
utushca micülun.
Utushca caćhaycuśhancätañatacmi
paćhcaśhca camacalpülun.a
5 “Chayurá shincäśha cäcuna licaćhacul waꞌapäcuyña.
Mishqui bïnuca shimiquipïta quitäśhañamá cayan.
Bïnucta lluy upyäcuna apalcaćhapäcuyñari.
6 Manaña yupayta atipana achca-achca nunancunawanñamá
sumä munayniyu nasyunca,
malcäman yaycaycälimul duyñuchacaycälin.
Paycunap quilunpis liyunpa quilunnümá;
wäsunpis liyunpa wäsunnülämá.b
7 Üba lantäcunactamá camacaycülun;
ïgus lantäcunactamá pampaman muyüchin.
Alannincunactapis pasaypi calanllantamá caćhaycülun.
Pasa-pasaypictamá camacaycülun.
8 “Má,
wayapan müsullalä wañucuśhanpi
shicacü müdanawan ćhulaculcul
waꞌayä wamlanu apalcaćhapäcuy.
9 Tayta Diospa alawana wasinćhu uycunapä,
ćhacla micuycuna,
jićhaywan uycunapis manamá canñachu.
Chayurá Tayta Diospa sirbïnincunawan
sasirdüticunaca llaqui-llaquictam waꞌapäcun.
10 Ćhaclacunaca pasaypi calanllanñam cayan.
Jinantin allpaca pasaypi llaquillañamá cayan.
Trïgucunaca camacaycüśha,
üba lantacunaca chaquïsha,
ulïbus lantacunäpis chincäśhañamá cayan.
11 “Ćhaclaćhu luläcuna,
waꞌapäcuy.
Üba lantacta licäcuna,
awćhupäcuy.
Trïguwan siwäca manañamá ishpinñachu.
12 Üba lantawan ïgus lantaca awïlunñamá.
Granadillacunaca,
palmïracunaca,
mansanacunäpis chaquïlunñamá.
Jinantin ćhaclaćhu cäcunämari lluy-lluy chincacun.
Rasunpa,
nunacunäpa cushicuyninpis lluy-lluyñamá chincacun.c
13 “Sasirdüticuna,
shicacü müdanawan müdacalcälil llaqui-llaquicta waꞌapäcuy.
Uycuna patacćhu sirbïcuna awćhupäcuy.
Tayta Diosnïpa sirbïnincuna śhapämuy;
shicacü müdanacunawan puñupäcuy.
Tayta Diosniquip wasinćhu uycunapä cä ćhacla micuypis,
jillpuywan uycunapis manañamá canñachu.
14 Ayünucta lulapäcunayquipä ayachimuy.
Tayta Diosniquip wasinmanꞌari yaśhacunäta,
jinantin malcantinta juntuycamuy.
Chayćhuꞌari Tayta Diosta ayaculcay.
15 “¡Ay,
imanuylä chay muyun canꞌa!
Tayta Diospa muyunnin cayllaćhüñamá cacuyan.
Sumä Munayniyüca camacaycamänanchicpä
jananchicćhüñamá cacuyan.d
16 “¿Manachun micuyninchiccuna
ñawinchicpïta chincacunña imamá?
¿Manachun Tayta Diosninchicpa wasinpïta cushicuycäwan
jawca cayca chincacunña imamá?
17 Allpäpa śhunꞌunćhümá mujucunaca lluy ismülälin.
Cusicha chincäśhañamá cayan;
pilwacunaca pulumäśhañamá cayan.
Ćhulacunapä cäcunaca pasaypi chincächishañamá cayan.
18 Uywacunäpis sumä-sumämá apalcaćhayalcan.
Maycäćhüpis micunanpä mana captinñamá
wäcacunaca wicta cayta pasal cürricaćhayalcan.
Uwishcunäpis micuypïmá tupacaycaćhayalcan.
19 “Tayta Diosllay,
yanapaycälillämayꞌari.
Chunyäcäćhu pastucunäta ninamá camacaycülun.
Ćhaclacunäćhu lantacunätapis lluy-lluymi camacaycülun.
20 Pucyucunaca chaquïluptinmá,
pastucunäta ninaca lupäluptinmá
munti uywacunäpis amta ayaycaćhapämun.e