Carnictawan ulu capishtam suyñuyninćhünu Daniel lican
8
Chay Belsasar quimsa wataña mandacuyaptinmi yapañatac Tayta Dios licachimäśhanta yaꞌa Daniel licalá.
2 Chay licachimäśhanćhümari Elam lädup sumä Susa malcanćhu cayäñá,
Ulai nishan mayup patanćhu.
3 Chayćhu ñawïta pallalculmi mayup patanćhu juc carnicta licälú.
Ishcay wälanmi jatućhä-cama cacuña.
Chay jucnin wälan masqui ipactaña wiñämulpis mas jatunmi caña.
4 Chay carnim wälanwan tupaña inti yaycunan läduman,
nurti,
sur lädumanpis.
Manamá ima uywapis chay carnicta tupaćhacuñächu.
Manatacmá mayanpis pudirninpïta libraculcäñächu.
Chay carni munaśhanta lulalmi masta-masta jatunchacuña.
5 Chay licaśhäman tantiayalmi intip yaycunan lädupi ulu capish śhayämüta licälú.
Chaymi pampactapis mana jaluycul altullanpa jinantin allpäpa śhamuña.
Ulcunćhüñatacmi juc jatun wälan caña.
6 Chay capishmi mayup patanćhu licaśhá carnip cuntran sumä callpa-callpawan piñäśha paćhcaycüña.
7 Chaynu callpa-callpawan tupäluptinmi carnip ishcay wälan paquïña.
Jinäluptinmi chalanacunanpä carnip callpan manaña cañächu.
Chaymi ćhaćhaycachil munaśhanmannu jalutacüña.
Manamá carnicta libraycünin mayanpis cañächu.
8 Chay ulu capishca sumä callpasapamanñam licalïña.
Chaynu sumä munayniyu cacuyaptinmi jatun wälan paquïña.
Chaypa pudirninmi tawa jatućhaćhä wälacuna yalämuña.
Chay wälacunam tawan läduman licalayalcäña.
9 Chay jucnin wälanpïmi uchuy wälalla yalämuña.
Chay wälanmi wiñaña sur läduman,
inti yalamunan läduman,
sumä cä Israel allpanchic läduman.
10 Chay uchuy wälallam alli-allicta wiñäña,
sïlüćhu uyllurcunäpïpis mastalä canpis.
Chaymi waquin lusirucunactapis pampäman jitalpaycamul jaluypa pawäña.a
11 Uyllurcunäpa puydïninnu cayta munalmi Tayta Diospa alawana wasinćhu muyun-muyun uycunacunactapis manalcachiña.
Paypa jananmi alawana wasipis anlaman muyüchisha caña.
12 Pasaypi mana allin caśhan-laycumá Tayta Diosman uycunapä cäcunäpis,
pilyänincunapis paypa maquinmanña ćhulaycuśha caña.
Rasuncätapis pampamanmi muyüchiña;
imactapis munaśhantam lulaña.
Ima lulaśhanpis allinmá yaluña.
13 Chayćhümi uyalïlú juc anjil juc anjilcäta tapuyäta:
“¿Imaycamañamá muyun-muyun uycuna cäcunäwan caynu mana allin lulaśha cayanꞌa?
¿Imayñamá camacanꞌa cay alawana wasiwan?
¿Imaycamañamá pilyäcunäwan,
pasaypi luläśha,
jalutacüśha cacunꞌa?”
nil.
14 Niptinmi chay anjilca niña:
“Ishcay walanga quimsa paćhac (2,300) muyun pasanancamam chay uycunacunacta mana uycuśhachu canꞌa tardinpapis nï wälanpapis.
Chaypïtañam chuya carpa chuyanchaycuśha canꞌa” nil.
15 Chaynu Tayta Dios licachimäśhanta yaꞌa Daniel licaśhäca imapä caśhantapis tantiapacuyaptïmi ñawpänïćhu juc nunanu licalïmun.
16 Chayćhümi uyalïlú Ulai nishan mayupïta caynu nimüta:
“Gabriel,
cay nuna licaśhanta imapä caśhantapis tantiaycachiy” nil.b
17 Niptinmi Gabriel yaꞌaman aśhuycamuña.
Yaꞌañatacmi manchalicülul pampäman uyshucuyculá.
Payñatacmi niman:
“Wañucülla nuna,
chay licachishuśhayquica camacay timpucunäpä caśhanta tantiaycuy” nil.
18 Chaynu limapayämaptinmi mana tantiacul pampäman cäräpa cućhpäñá.c
Payñatacmi lichcalcachimal śhalcachimäña.
19 Jinalculmi nimäña:
“Cay licaśhayquitam tantiaycachishayqui;
cay cayan camacay timpucunaćhu Tayta Diospa piñacuynin imanuy cananpämari.
20 Anmi licalanqui juc carni ishcay wälayüta.
Chay wälacunam Media,
Persia lädup mandacünincuna.
21 Chay ulu capishcäñatacmi Grecia lädup mandacüninca.
Ulcunćhu cä jatun wälanñatacmi wamä mandacüca.
22 Punta cä wälan paquïluptin tawa wäla wiñamücunäñatacmi cayan,
chay nasyunpi tawa mandacü śhalcamücunaca,
masqui punta cäcänu sumä callpayu mana capäculpis.
23 “Chay mandacücunäpa camacaynin ćhämuptin,
sumä mana allincäpis pasa-pasaypiña cacuyaptinmi juyu-juyu mandacü śhalcamunꞌa.
Chayꞌa nunatucüśha,
sumä ishpisha-ishpishamá cacunꞌa.
24 Chay mandacüca sumä munayniyu caycunꞌa,
manamá quiquinpa munayllanwanchu.
Chay mandacüca äśhalayllaman camanapämi imactapis camacaycülunꞌa.
Ima lulaśhanpis allinmá yaluycunꞌa.
Sumä munayniyu puydïcunäta,
jinaman Tayta Diospa japächäśha malcantapis camacaycülunꞌamá.
25 Ishpisha-ishpisha cayninwan artipalmi mayantañapis ingañanꞌa.
Sumä munayniyütuculmá jawca allin cawsacücunätapis wañüchinꞌa.
Payꞌa puydïcunäpa sumänin Puydïninpa cuntranmá śhalcunꞌa.
Ñatac camacaycüśhamá canꞌa,
manamari nunacunäpa munayllanwanchu.
26 “Canan chay ishcay walanga quimsa paćhac (2,300) muyun,
imanuy cananpäpis Tayta Dios licachishuśhayquipis rasunpam canꞌa.
Amñatacmi ichá śhunꞌullayquićhu uywanqui;
achca watalämari lulacacunanpä cacuyan” nil.
27 Nimaptinmi yaꞌa Daniel mana callpayü-ima ishyäśha achca muyun quïdälú.
Allinyalculñatacmi mandacücäćhu imam lulanäcunacta lulayta allayculá.
Ñatac suyñuynïćhu licaśhäpïmi muspaynïćhünu cayälá;
chay imapä caśhantapis tantiayta manamá atipälächu.