Malcanpämi Daniel mañacun
9
Chaypi Asuerop chulin Dariom Caldeo lädupa mandacünin yaycüla;
Media lädupïmari Dario cala.
2 Pay wamä watacta mandacuyaptinmi yaꞌa Daniel tantiaycuyälá Tayta Diospa willacünin Jeremias isquirbishanta.b
Chay librućhümi anćhish ćhunca (70) wata Jerusalen camacaycüśha cananta niña.
3 Chaymi micuytapis mana micul Tayta Diosnïta mañacuyta,
ayacuyta allacuyculá.
Llaquicuypi aćha-aćha müdanawan ćhulaculculmi ućhpacunawanpis umäman jillpuculá.
4 Lluypa mana allin lulaynïcunapïtamari Tayta Diosman willapaculá caynu:
“Sumä manchay cä Tayta Diosllay,
ama-pacha nishüniquicunaman,
camachicuyniqui nishanmannu cawsäcunäman limalicuśhayquita,
chalapacuna cayniquita camalaycachinquimá.
5 Yaꞌacuna mana allintamá,
cuntrayquimá śhalcälälillá.
Pasaypi cullu linli juchasapam capäcullá.
Yaćhachicuyniquipi,
camachicuyniquipi japächacälälillämá.
6 Sirbï willacüniquicuna ampïta willaculcäśhanta manamá uyaliculcälächu.
Paycunamari mandacünïcunacta,
puydïnïcunacta,
awquillücunacta,
jinantin malcäta willapämäla.
7 Taytallay,
amꞌa tincüllanmanmi lulaycunqui.
Yaꞌacunam ichá mana allinllacta lulal sumä pinꞌaypä cayalcällá.
Awari,
amta mana uyalicul ipanchäläliptïmari juc lädu nasyuncunaman pinꞌaypä alapacälälimanqui:
Juda läducunacta,
Jerusalenćhu cäcunäta,
lluy Israel läducunäta,
masqui calućhu-sircaćhu cacuptinpis.
8 Tayta Diosllay,
cuntrayqui mana allinta lulapäcuśhäpïmá yaꞌacuna,
mandacünïcuna,
puydïnïcuna,
awquillücunapis pinꞌaypä cayalcällá.
9 Am Tayta Diosnillämi masqui cuntrayqui śhalcäläliptïpis llaquipayniyu,
pampachaycü caycunqui.
10 Am Tayta Diosní nipämäśhayquita manamá uyaliculcälächu.
Sirbïniqui willacüniquicunawan yaćhaycälichimäśhayquita manamá cäsuculcälächu.
11 Jinantin Israel lädumá camachicuyniquipi japächacalcälil nishayquita mana uyaliculcälächu.
Yaꞌacuna am Tayta Diospa cuntrayqui mana allinta lulapäcuśhäpïmá mana allinca ćhäläliman.
Sirbïniqui Moises isquirbishanćhu willachipämäśhayquimannümari mana allinca,
limalicuśhanca ćhäläliman.
12 Yaꞌacunaman,
mandacünïcunaman ćhuncay-ćhuncayta nipämäśhayquinüllamá am lulaycunqui,
sumä mana allintapis pasaycälichimanqui.
Chaynu Jerusalenwan pasaśhannuꞌa cay pachäćhu manamá imaypis pasayculachu.
13 Moises isquirbishanćhu nishancunämari cay mana allincunaca ćhäläliman.
Chaynu cayalcalpis Tayta Diosní llaquipaycälimänanpä manamá mañaculcälächu.
Mana allin lulaynïcunacta manamá caćhaycapäculächu;
nïtac rasunniquitapis uyaliyta ashipäculächu.
14 Chaymari am Tayta Diosní,
juchäcunacta licaycul yaꞌacunaman mana allincäta caćhamulanqui.
Yaꞌacuna amta mana cäsuculcaptïmá tincünïman lawćhaycälimanqui.
15 Tayta Diosllay,
sumä munayniquiwan Egiptopïta malcayquita julaycamuśhayquiwanmi canancama lisisha-lisisha cayanqui.
Chaynu cayaptinpis yaꞌacuná mana allintam,
juchactam lulapäculá.
16 Taytallay,
tincüniquiman licaycuśhayquinuꞌari cananꞌa piñacuyniquitawan rabyacuyniquita Jerusalenpïta japächaycullay.
Cayꞌa malcayquimari,
chuya ulꞌuyquimari cayällan.
Yaꞌacuna juchaculcäśhäpi,
awquillücuna mana allinta lulapäcuśhanpïmá malcayquip muyülïninćhu cä nasyuncunaca pinꞌayman yaꞌacunactapis Jerusalen malcayquitapis ćhulapäman.
17 Tayta Diosllay,
cay nunallayquip mañacuylläta,
ayacuylläta uyaliycallämayꞌari.
Allin caśhayqui-laycuꞌari pulumäśha cä alawana wasiquita allinpä yalpalcullay.
18 Tayta Diosllay,
linliquita quićhaycul uyaliycälillämay.
Amta ayacalcämuśhá malcayqui pasaypi pulumäśha caśhantari ñawiquita quićhaycul licaycälillämay.
Caynu mañacalcämullac manam allin capäcuśhäpachu,
sinuꞌa am llaquipayniyu caśhayqui-laycullam.
19 Taytallay,
uyaliycälillämay.
Taytallay,
pampachaycälillämay.
Tayta Diosllay,
licayculꞌari yanapaycälillämay.
Taytallay,
cuyacü caśhayqui-laycuꞌari jucllaña śhaycamuy.
Tayta Diosllay,
malcayqui japächacuśhayqui śhutiquita apaśhan-laycuꞌari lulaycullay” nil.
Anćhish ćhunca (70) simänapïtam nin
20 Chaynüllalämi Tayta Dioslläta mañacuyälá,
ayacuyälá.
Awari yaꞌapa,
Israel malcäpa juchantamari willapacuyälá.
Jinaman chuya ulꞌunpäpis mañacuyälämari.
21 Chaynu mañacuyaptïmi juc cuti suyñuynïćhünu licalimü Gabriel,
yaꞌaman juclla päliyämuña.
Chay üra caña,
tardi uycunacta uycuna üramá.
22 Ćhaycamulmi niman:
“Daniel,
canan yalamulá yaćhayta,
tantiayta uycunacpämi.
23 Am mañacuyta allaycullaptiquim Tayta Dios uyaliycuśhulanqui.
Am sumä cuyaśha captiquimá tantiaycachï śhamulá.
Chayurá suyñuyniquićhünu licaśhayquica imapä caśhantapis tantianayquipä uyaliycamay.
24 “Chay anćhish ćhunca (70) simänam nasyunniquipä,
japächäśha cä malcayquipä timpu cayan,
mana allin lulaynincunacta,
jucha lulaynincunacta camacananpä.
Jinaman jucha lulaśhancunapïta pampachaycuśha cananpä,
tincüllanman cäcällactaña wiñaypä tacyaycachinanpä,
suyñuyniquićhünu licachishuśhayquita tacyaycachinanpä,
jinaman willacünin willacuśhanca tacyalpunanpä,
chaynütac sumä chuya cäcäpis Tayta Diosllapäña japächäśha cananpäpis.
25 “Daniel,
sumäta tantiaycuy:
Jerusalen caśhan śhalcachisha cananpä camachishanpi,
aśhta Caćhamuśhan Salbacü Puydïca ćhämunancama anćhish simänam pasanꞌa.
Chaypïta süta ćhunca ishcayniyu (62) simäna maslämi pasanꞌapis.
Chaypïlämi Jerusalen malca,
caminuncuna,
murällancuna caśhan śhalcachisha canꞌa.
Chaycuna ñacay timpućhümá lulaśha canꞌa.
26 “Chay süta ćhunca ishcayniyu (62) simänapïtam Caćhamuśhan Salbacucäta wañülächinꞌa.
Jinaptinmi mana imayüña quïdälunꞌa.
Juc lädu mandacü puydï śhamücäñatacmi malcacta,
alawana wasicta camacaycülunꞌa.
Llülla śhamücänümá pampaman lluy muyüchinꞌa.
Gïrra camacänancamam camacanacuyca mana camacanꞌachu.
27 “Chay mandacüca juc simänam achca nunacunawan limalinaculcanꞌa.
Chay simäna ćhawpichayaptinmi Tayta Diosman uycunacunacta,
cañaywan uycunacunactapis lluy manalcachinꞌa.
Uycuna patacmanpis millachicuycunactamá ćhulaycunꞌa.c
Chaynu canꞌa quiquin Tayta Dios camacaycüśha cananpä unanchaśhancamamá” nil.