Sumä llaquipayniyu caśhanpïtam Tayta Diosta sulpäta uycun
136
Allin caśhanpïta Tayta Diosta sulpäta uycapäcuy.
Llaquipäcuynin wiña-wiñaypämá.a
2 Lluy taytachacunapïtapis rasunpa cä Tayta Diosta sulpäta uycapäcuy.
Llaquipäcuynin wiña-wiñaypämá.
3 Lluy taytacunap sumänin Taytanninta sulpäta uycapäcuy.
Llaquipäcuynin wiña-wiñaypämá.
4 Sumä-sumä lulaycunacta luläcäta sulpäta uycapäcuy.
Llaquipäcuynin wiña-wiñaypämá.
5 Sïlucunäta sumä yaćhaywan lulaycücäta alawapäcuy.b
Llaquipäcuynin wiña-wiñaypämá.
6 Yacucunäpa jananman allpacunäta maśhtaycücäta sulpäta uycapäcuy.c
Llaquipäcuynin wiña-wiñaypämá.
7 Intïta,
quilläta lulaycücäta alawapäcuy.
Llaquipäcuynin wiña-wiñaypämá.
8 Muyuncäta acchinanpämá intïta lulala.
Llaquipäcuynin wiña-wiñaypämá.
9 Tutäta acchinanpämá quillätawan uyllurcunäta lulala.d
Llaquipäcuynin wiña-wiñaypämá.
10 Egipto nunacunäpa wamä chulincunacta
camacaycücäta sulpäta uycapäcuy.e
Llaquipäcuynin wiña-wiñaypämá.
11 Egiptop maquinpi Israelcunäta julaycamücäta alawapäcuy.f
Llaquipäcuynin wiña-wiñaypämá.
12 Sumä munayninwan maquinta
pallalcul julaycamücäta sulpäta uycapäcuy.
Llaquipäcuynin wiña-wiñaypämá.
13 Puca Lamarta wicman-cayman laquïcäta alawapäcuy.
Llaquipäcuynin wiña-wiñaypämá.
14 Chay mayup ćhawpinpa israelcunäta pasaycachïcäta sulpäta uycapäcuy.
Llaquipäcuynin wiña-wiñaypämá.
15 Puca Lamarćhu Faraoncätawan
lluy pilyänintinta anuachïcäta alawapäcuy.g
Llaquipäcuynin wiña-wiñaypämá.
16 Malcanta chunyäninpa puśhaycücäta sulpäta uycapäcuy.h
Llaquipäcuynin wiña-wiñaypämá.
17 Puydï mandacücunäta llalliycücäta alawapäcuy.
Llaquipäcuynin wiña-wiñaypämá.
18 Sumä-cama mandacücunäta wañuchïcäta sulpäta uycapäcuy.
Llaquipäcuynin wiña-wiñaypämá.
19 Amhor lädup mandacünin Sehonta wañuchïcäta alawapäcuy.i
Llaquipäcuynin wiña-wiñaypämá.
20 Basan lädup mandacünin Ogtaj wañuchïcäta sulpäta uycapäcuy.
Llaquipäcuynin wiña-wiñaypämá.
21 Chay mandacücunäpa allpancunacta
Israelman uycücäta alawapäcuy.
Llaquipäcuynin wiña-wiñaypämá.
22 Tücäninta sirbïnin Israelman uycücäta sulpäta uycapäcuy.
Llaquipäcuynin wiña-wiñaypämá.
23 Uyshulächisha cayaptinchicpis
mana unꞌaycamäninchiccäta alawapäcuy.
Llaquipäcuynin wiña-wiñaypämá.
24 Ćhïnicüninchiccunap maquinpi
julaycamäninchiccäta sulpäta uycapäcuy.
Llaquipäcuynin wiña-wiñaypämá.
25 Lluy cawsayniyu cäcunäta micuyta
taliycachïcäta alawapäcuy.
Llaquipäcuynin wiña-wiñaypämá.
26 Cananꞌari,
janay pachäćhu cä Tayta Diosta sulpäta uycapäcuy.
Llaquipäcuynin wiña-wiñaypämá.