Tayta Diosta altuman julaycäliy.

Tayta Diosta sirbïcuna,

alawapäcuy.

2 Tayta Diosninchicpawasinćhu sirbïcuna,

wasinpa patyunćhu cäcuna alawapäcuy.

3 Tayta Dios allin caśhanpïta alawapäcuy.

Taquicunawan alawayca mishqui caśhanpïta śhutinta altuman julaycäliy.

4 Tayta Diosmá quiquinpä Jacobta aclaycula.

Israeltamari maquinćhu caycunanpä aclaycula.

5 Tayta Dios sumä-sumä munayniyu caśhanta yaćhaycümá.

Tayta Diosninchic lluy-lluy taytachacunapïtapis mas munayniyümá.

6 Tayta Dios lluy munaśhantamá lulaycun cay pachäćhu,

janay pachäćhu,

lamarcunäćhu,

lamarpa luli-lulinnincunaćhüpis.

7 Cay allpäpa manyancunapïtamá pucutaycunäta śhalcachimun.

Tamyamunanpäpis räyucunactamá licalichimun.

Ćhulalänancunapïtamá waywacunätapis yalachimun.^a

8 Paymá Egiptoćhu nunacunäpa wamä chulincunacta wañüchila.

Uywancunap wamä wawincunactapis camacaycülamá.

9 Am Egipto nasyunpa ćhawpiquićhümá

Faraoncäpa cuntran milagrucunacta lulaycula.

Awari,

Faraonpa lluy yanapänincunap cuntranmá

admiracuypä cäcunacta lulaycula.^b

10 Achca-achca nasyuncunätamá camacaycüla.

Sumä puydï mandacücunätamá wañüchila:

11 Amhor lädu mandacü Sehonta,

Basan lädu mandacü Ogta,^c

Canaan lädućhu lluy mandacücunätapis.

12 Paycunap allpancunactañatacmi

Israel malcanpa tücänin cananpä uycula.

13 ¡Tayta Diosllay,

wiña-wiñaypämi śhutiqui!

¡Tayta Diosllay,

wiña-wiñaypä yalpaśhamá canqui!

14 Tayta Diosmá malcanta tincüninman-cama cäraycunꞌa.^d

Sirbïnincunacta llaquipaycunꞌamá.

15 Chay nasyuncunap taytachancuna

ürullapïta,

illayllapïtam cayan.

Nunacunap lulaśhancunallamari cayan.

16 Shiminꞌa caytá cayanmi,

manatacmá limanchu.

Ñawinpis caytá cayanmi,

manatacmá licanchu.

17 Linlin caytá cayanmi,

manatacmá uyalinchu.

Shiminpis caytá cayanmi,

manatacmá jamalcuyllapis jamalcunchu.

18 Chaynümá chay taytachacunap lulänincuna cayalcan.

Chaynümá payman chalapacünincuna cayalcan.^e

19 Canan má,

Israel malca Tayta Diosta alawapäcuy.

Aaronpa milaynincuna,

Tayta Diosta altuman julaycäliy.

20 Levi ayllu,

Tayta Diosta alawapäcuy.

Tayta Diosta manchacuywan cäsucücuna,

altuman julaycäliy.

21 Jerusalenćhu yaćhä Tayta Dios alawäśha cachun.

Sion ulꞌupiꞌari Tayta Dios alawäśha cachun.

¡Tayta Diosta alawapäcuy!