Sumä milagrucunacta lulaśhanpi,

jatun munayninwan chuya cayninwan libraycuśhanpi alawapäcuy.

2 Tayta Diosmá salbaycunanpä sumä munayninta camalaycachin.

Tincüninman-cama licaycuśhanta

lluy nasyuncunämanmá licaycachin.

3 Pay yalpayan Israel malcanman:

“Imaypis cuyaśhayquim,

chalapacunam caśhä” nil nishantamá.

Jinantin allpäpa sapincamamá Tayta Dios libraycuśhanca licaycuśha cayan.^a

4 Jinantin allpäćhu cawsäcunaca Tayta Diosta cushisha alawapäcuy.

Cushicuypi taquicunawan apalilcul-apalilcul alawapäcuy.^b

5 Tayta Diosta arpacunawan alawapäcuy.

Imaymana tucanacunawan taquishtin alawapäcuy.

6 Curnitillacunawan trumpitacunawan

sumä cushisha-cama,

mandacü Tayta Diosta alawapäcuy.

7 Lamarcunäpis chayćhu lluy cänintin apalipäcuchun.

Cay allpäpis chayćhu lluy yaćhänintin apalipäcuchun.

8 Mayucunäpis cushicuypïta maquinta tällapäcuchun.

Lluy ulꞌucunäpis sumä cushisha taquipäcuchun.^c

9 Tayta Diospa ñawpäninćhu chaynu alawaycäliy.

Payꞌa jinantin allpäta cäraycümá śhamunꞌa.

Paymi tincüninman cay allpäta cäraycunꞌa,

mayanmanpis mana śhalcullalmá tincüninman-cama cäraycunꞌa.