Malcacunaca chucchupäcuchun.

Querubin anjilcunap ćhawpinćhümá pay täcuyan.

Jinantin allpaca catcatapäcuchun.^a

2 Sionćhu Tayta Dios jatu-jatunmá.

Lluy malcacunap altuman juluycuśhamá.

3 ¡Śhutiqui,

sumä jatun munayniyu manchay caśhanpïta alawapäcuchun!

¡Tayta Dios sumä chuyamá!

4 Sumä munayniyu mandacü Tayta Diosllay,

tincüninman-cama licaycuycätamá cuyanqui.

Anmá allin rasuncällacta tacyaycachinqui.

Jacobpa milaynincunactapis allincämannu,

tincüllanman-camamá licaycunqui.

5 ¡Tayta Diosninchicta altuman julupäcuy!

¡Paypa ñawpäninmanꞌari unꞌulaycäliy!

¡Tayta Dios sumä chuyamá!

6 Moiseswan Aaronpis sasirdütincunamá capäcula.

Samuelñatacmi mañacünin cala.

Chaymi Tayta Diosta ayaculcaptin uyaliycula.

7 Paycunaman suytunpäśha pucutaycäpimi Tayta Dios limapäla.^b

Chay yaćhachishancunäta,

camachishancunätamá paycuna lulaycälila.

8 Tayta Diosnillay,

anmá uyaliyculanqui.

Mana allinnincunapïta lawćhaycünin cayalpis,

pampachaycünin Tayta Diosmá cayculanqui.

9 Tayta Diosninchicta altuman juluycuśhun,

chuya caśhan ulꞌuman unꞌulaycuśhun.

Tayta Diosninchicꞌa sumä chuyamá.