Jinantin allpäćhu cäcuna Tayta Diosta alawapäcuy.

2 Tayta Diosta alawapäcuy,

payllacta taquipäcuy.

Salbacüninchic caśhanta muyun-muyun willaculcay.

3 Sumä cayninpïta nasyuncunäćhu willaculcay.

Äśhalayllaman camana lulaynincunapïta

lluy malcacunäćhu willaculcay.

4 Tayta Diosꞌa sumä jatunmá;

maynu alawaycunamá.

Payꞌa lluy diostucücunäpa manchayninmá.

5 Lluy malcacunäpa diosnincuna taytachacunallamá.

Tayta Diosñatacmi ichá sïlütapis luläca.

6 Pay caśhancäćhuꞌa sumä cayninmi chipipicyayan.

Pay yaćhaśhancäćhuꞌa sumä munayninwan

sumä tuqui caynin juntamá cayan.

7 Jinantin allpäćhu ayllucuna Tayta Dios caśhanta tantiaycäliyꞌari.

Sumä munayninpïta,

sumä cayninpïta Tayta Diosta altuman julaycäliy.

8 Tayta Diospa śhutinpa tincüninmannuꞌari altuman julaycäliy.

Uycälinayquita apacuśhari paypa wasinman yaycaycäliy.

9 Sumä chuya caśhancäćhu Tayta Diosta alawaycäliy.^a

Jinantin pachäćhu lluy cäcuna paypa ñawpäninćhu chucchupäcuy.

10 Nasyuncunäta nipäcuy:

“Tayta Diosmi lluy-lluyta mandacun.

Paymá jinantin pachäta sumä tacyaycachila.

Manamá imapis cuyuchinmanchu.

Paymá jinantin malcacunäta tincüninman-cama cäraycunꞌa” nil.

11 Janay pachäpis cay allpäpis cushiculcächun.

Lamarcäpis chayćhu lluy cäcunäpis apalipäcuchun.

12 Ćhaclacunäpis chayćhu lluy cäcunäpis cushiculcächun.

Munticunäćhu jaćhacunäpis cushicuywan alawapäcuchun.

13 Śhamü Tayta Diospa ñawpäninćhuꞌari alawapäcuy.

Jinantin pachäta mandananpämá śhayämun.

Jinantin pachäta tincüninman-camamá cäraycunꞌa.

Lluy malcacunäta rasunninmannümá licaycunꞌa.