¡Wanca luminu cä salbaycamäninchic

pacaycamäninchicta taquicunawan altuman juluycuśhun!

2 Payman sulpäta ucuywan aśhuycuśhun.

Taquicunawan altuman juluycuśhun.

3 Tayta Diosꞌa sumä-sumänin Diosmi.

Lluy diostucücunäpïpis sumä-sumänin Mandacümi.

4 Paypa maquillanćhümá cay pachäpa luli-lulincunapis cayan.

Paypa maquillanćhütacmá altu-altu ulꞌucunäpis cayan.

5 Paypatacmá lamarcunäpis;

paymari camaycula.

Chaqui allpacunäpis maquinwan lulaycuśhanmá.^a

6 Tayta Diosninchicman śhapämuy alawä.

Lulamäninchicpa ñawpäninman śhapämuy unꞌulacuycul alawä.

7 Paymari Tayta Diosninchic.

Yaꞌanchicñatacmi malcan,

ñawillanćhu caycachimäśhanchic uwishnin canchic.

Cay nishuśhayquita canan-pacha uyaliculcalꞌa:

8 “Meriba nishan lädućhünu śhunꞌuyquita

ama lumiyachipäcuychu,^b

ütac chunyä Masah nishan

lädućhünu śhunꞌuyquita ama ishcayyachipäcuychu.

9 Awari,

masqui chayćhu awiluyquicuna

lulaśhäta licayalcämalpis pruybaycaćhapämälamá.

10 Chaymi tawa ćhunca (40) wata cay malcawan piñacüśha calá.

Chayćhümi nilá:

‘Cay nunacunaca,

śhunꞌun pantäśham cawsapäcun.

Pasaypi pintïsham pulipäcun.

Manamá nishäcunactapis uyaliculcanchu’ nil.^c

11 Chaymi piñacuynïćhu limaliculá:

‘Jawca allin jamay^d uycuśhäcäman manamá imaypis yaycapäcunꞌachu’ ” nil.^e