tincüninman cutiycachï Tayta Dios caśhayquita licaycälichimay.

2 Jinantin allpäpa cäraycünin śhalcuyñari.

Nunatucücunäta tincüninman uycüluyñari.

3 Tayta Diosllay,

¿imaycamamá,

imaycamañamá

mana allin nunacunaca yaꞌacunacta cushipayalcämanꞌa?

4 ¿Imaycamañatá nana-nanay limaycunawan äśhaycaćhayalcanꞌa?

¿Imaycamañamá mana allin lulaśhancunapi alawacuyalcanꞌa?

5 Tayta Diosllay,

malcayquitamari jalutacuyalcan.

Aclacuśhayquitamari uyshulayalcächin.

6 Japanyäśhacunätapis,

yaꞌacunaćhu cä juc caśhtacunätapis wañülächinmá.

Mana taytayu mana mamayücunätapis camacaycülunmá.

7 Nipäcunlämi canpis:

“Tayta Diosninꞌa manamá licaycunpischu.

Jacobpa Tayta Diosninꞌa imactamá tantianꞌa” nil.

8 ¡Tullu umacuna sumäta uyaliculcayñari!

Pasaypi luclucunaca ¿imayñatá yaćhayniyu capäcunquiman?

9 Linlinchicta lulaycüca ¿manachun uyaliycunꞌa imatá?

Ñawinchicta lulaycüca ¿manachun licaycunꞌa imamá?

10 Jinantin malcacunäta tincüninman lawćhaycüca

¿manachun amta lawćhaycuśhunqui imatá?

Nunacunäta yaćhayta uycüca

¿manachun yaćhaycun imamá?

11 Tayta Dios lisinmá nunacunäpa tantiaynincunacta.

Chaycuna yanꞌalpä caśhantapis yaćhantacmá.^a

12 Tayta Diosllay,

maynu cushicuymi

imanuy cawsananpäpis piñapäshayqui nunacunäpá.

Maynu cushicuymi camachicuyniquita yaćhaycachishayquicunäpá.

13 Ñacay muyuncunaćhüpis paycunactá jawcallactam caycachinqui.

Mana allin nunacunäpäñatacmi ichá sipultüranta ućhcuyanqui.

14 Tayta Dios malcanta manamá jitälunꞌachu.

Aclacuśhancunacta manamá unꞌaycunꞌachu.

15 Aśhwanpam cäraycücunäpis mayanmanpis

mana śhalcullalña cäninman-cama licaycunꞌa.

Allin śhunꞌuyücunäpis chaymanmá chalapaculcanꞌa.

16 Mana allin nunacunäćhu

¿mayanllá yaꞌacta śhalcaycamanmanmá?

Juyu nunacunäćhu ¿pitan yaꞌapïta limalcunman?

17 Tayta Dios mana yanapämaptinꞌa

wañücuna canancäćhüñaćh cayäman cala.

18 “Ćhaquillämi lluchcacalpuyällan” nil ayacamuptí

am Tayta Diosllämi llaquipayniquićhu chalaycallämälanqui.

19 Sumä llaquicuycunawan intüśha

cayaptïpis cunsuylaycamalmi cushiycachimälanqui.

20 Am Taytallay,

¿mana allin cäraycücunäwan

śhunꞌuyqui tincunmanchun imamá?

¿Camachicuyta jalutacücunäwan jucllachacunquimanchun imatá?

21 Paycuná allin nunacunäpa cuntranmi limanaculcan.

Mana juchayu nunaca wañuchisha cananpämi camachinaculcan.

22 Ñatac Tayta Diosnïmi yaꞌacta licaycamäní.

Tayta Diosnïmi wancanu pacaycamäní.

23 Paymari chay mana allin lulaśhancunacta quiquinman cutiycächinꞌa.

Quiquincunap mana allinllanwanmá camacaycülunꞌa.

Tayta Diosninchicmá pampaman muyuchinꞌa.