llaquićhümi cayällá;

uyaliycallämayꞌari,

ćhasquiycallämayꞌari.

2 Amćhu masïsu caycuśhäpiꞌari ñawillayquićhu caycachillämay.

Am Tayta Dioslläman cay nunallayqui

chalapacuśhäpiꞌari salbaycallämay.

3 Tayta Diosllay,

anyaśh muyunmá

ayacamullac,

llaquipaycallämayꞌari.

4 Cay nunallayquipa śhunꞌullantari cushiycachillay,

am Taytallätamá llapan callpäwan mañacamullac.

5 Am Tayta Diosllá,

allin śhunꞌuyümi canqui,

juchacunactapis pampachaycümi canqui.

Ayacüniquicunapá jatun cuyacuyniyümá canqui.

6 Tayta Diosllay,

mañacuylläta uyaliycallämayꞌari.

Ruygacuylläta ćhasquiycallämayꞌari.

7 Llaquicuynïćhu uyaliycamäní

captiquimá ayacamullac.

8 Am Tayta Diosnïnuꞌa manamá juc dioscuna caycunchu.

Lulaśhayquicunactanuꞌa manamá juc dioscuna lulaycunmanchu.

9 Tayta Diosllay,

śhalcachishayqui nasyuncunämi

śhapämul ñawpäniquićhu alawaycälishunqui,

śhutiquita altuman julaycälishunqui.^a

10 Amllamari Tayta Dios caycunqui.

Amllamá sumä munayniyu,

äśhalayllaman camana

lulaycunacta lulaycüca cayanqui.

11 Tayta Diosllay,

rasuncämannu

yaꞌa puliycunäpä caminuyquita yaćhaycachillämay.

Amllacta manchacuywan licaycunacpä allin śhunꞌucta uycallämay.

12 Tayta Diosllay,

llapan śhunꞌüwanmi alawaycuśhayqui.

Wiña-wiñaypämi śhutiquita altuman juluycuśhä.

13 Sumä-sumätamá llaquipaycallämanqui.

Wañuypa patancunapïtamá julaycallämanqui.

14 Tayta Diosllay,

puydïtucücunämá cuntrá śhalcälälin.

Juyu nunacunämá wañuchimänanpä śhalcälälin.

Ampïta manamá imapis paycunacta uculcanchu.^b

15 Ñatac am Tayta Diosllay,

llaquipayniyu allin śhunꞌuyümá canqui.

Sasacta piñacü,

jatun cuyacuyniyu,

rasuncällacta lulaycümá canqui.

16 Licaycamalñari llaquipaycallämay.

Cay nunallayquitari callpanchaycallämay.

Sirbïniquip wawinta salbaycullay.

17 Llaquipayniquitari camalaycachillämay

ćhïnicünïcuna licapäcul uyshulapäcunanpä.

Am Tayta Diosllämá yanapaycamälanqui,

cunsuylaycamälanqui.