Tayta Diosllay salbaycüca
Corepa milaynincunap isuirbishan taqui. Taquïcunäpa puydïninpämi.
85
Tayta Diosllay,
allpayquiwan maynu allinmi cayculanqui.
Jacobta allinmanmi caśhan cutiycachimulanqui.
2 Malcayquip mana allinninta pampachayculanquimá.
Lluy juchancunacta manañamá yalpalculanquichu.
Selah
3 Lluy piñacuyniquita pasachicülanquimá.
Sumä rabyacuyniquita aśhuycachilanquimá.
4 Salbaycamaní Tayta Diosllay,
caśhanꞌari śhalcachipämay.
Amañari yaꞌacunawan piñacüśha callayñachu.
5 ¿Yaꞌacunawan pasaypipächun piñacüśha cayanqui?
¿Milaycuna pasaptinpis jinallachun piñacüśha cayanqui?
6 ¿Manachun cawsayta caśhan uycunqui
malcayqui amćhu cushisha caycälinanpä?
7 Tayta Diosllay,
mana camacaycü llaquipayniquita
licaycälichillämay,
salbacuyniquita uycälillämay.
8 Tayta Dios nishanta uyalicuśhämi.
Chalapacü malcanmanmá jawca cawsayta limalicun
chay luclu lulaynincunaman manaña cutiycuyalcänanpä.
9 Altuman juluycünincunawan Tayta Dios cayalmá salbaycun.
Paycunawanmá cay allpäćhu sumä cayninta camalaycachinꞌa.
10 Llaquipaycuycäwan rasuncämi tincupulälun.
Jawcayaycäwan allin licaycuycämi muchanacülun.
11 Cay allpäpïmá rasunca wiñaycunꞌa.
Janay pachapïñatacmá tincüllanman licaycuyca anculpamunꞌa.
12 Quiquin Tayta Diosmi allincunäta uycamäśhun.
Chaymi ćhaclanchiccuna sumä wayuycunꞌa.
13 Tincüninman licaycuycämi paypa ñawpäninta
puntaycunꞌa,
pulinanpä caminunta allichaśhtin.