Israelpa mana allin lulayninwan Tayta Diospa llaquipaynin
Gitit nishanwan taquinapä Asaf isquirbishan. Taquïcunäpa puydïninpämi.
81
Callpanchamäninchic Tayta Diosta cushicuywan alawapäcuy.
Jacobpa Tayta Diosninta cushicuywan jatunchapäcuy.
2 Pandirïtacunawan,
tuqui-tuqui waꞌä arpacunawan,
uchuchä cuirdayu tucanacunawanpis taquipäcuy.
3 Llullu quillaćhu curnitillacta tucapäcuy.
Puꞌuśha quilla fistanchicćhüpis tucapäcuy.a
4 Israelcunaca chaynu lulananpämari
Jacobpa Tayta Diosnin camachila.
5 Cay camachicuytamá Egiptopi
yalapämuptin Joseman uycula.
Mana uyalishá shimictam uyalïlú caynu niyämäta:
6 “Waśhayquipïmi ipiquita juluycú.
Llasä lulayniquicunapïtam jacyalpachic.
7 Llaquicuyniquićhu ayacamaptiqui librayculacmá.
Räyu caśhancäpïtamá limapaycamulac.
Meriba nishan yacup ñawpäninćhümá
imanuy caśhayquitapis yaćhapänacpä licaycälilac.b
Selah
8 “Aclacuśhá malcallay,
cay anyapäśhacta sumäta uyaliycamay.
Israel,
uyaliycamalꞌa maynu allinćha canquiman.
9 Amcunaćhu juc dioscuna ama cachunchu.
Yanꞌal taytachacunacta amari alawapäcuychu.c
10 Egiptopi juluśhüniqui Tayta Diosmi yaꞌa cayá.d
Shimiquita quićhaycäliyꞌari maćhaycälinayquicama micaycälichinacpä.
11 “Ñatac malcá shimïta manamá uyaliculcälachu.
Israel manamá cäsupämälachu.
12 Chaymi lumi śhunꞌun munaśhanćhu capäcunanpä caćhaycülá,
wañupaculcäśhanmannu cawsaculcänanpä.
13 Sïchuśh malcá uyaliycamanman cala,
nishämannümi Israel cawsaycälinman cala.
14 Chaynütac ćhïnicünincunacta
ñawi imchiycuyllaćhüćha uyshulächïman cala,
cuntracünincunacta lawćhaycachïmanćha cala.
15 Tayta Diosta ćhïnicücunaca,
manchacuypïmá
uyshuycälinman cala.
Wiña-wiñaypä lawćhaycuśhamá capäcunman cala.
16 Ñatac am malcätañatacmi ichá allinnin trïguctalä uycuśhayqui.
Yacunayniquitapis wancaćhu cä mishquicunawanlämi
pasaycachishayqui” nil.