Caśhan yanapaycunanpämi mañacun
“Liryucunap limalicuynin” nishan tünunwan taquinapä Asaf isquirbishan; taquïcunäpa puydïninpämi.
80
Israelpa michïnin,
niycallämayꞌari.
Joseta uwishtanu puśhaycüca,
uyaliycallämayꞌari.
Babulćhu querubin anjilcunap ćhawpinćhu cayäca,
camalachicuyꞌari,a
2 Efrainpa,
Benjaminpa,
Manasespa ñawquinćhu camalachicuyꞌari.
Sumä munayniquiwan śhalculcul salbaycü śhamullayñari.
3 Tayta Diosllay,
¡caśhanꞌari śhalcachipämay!
Salbaycuśha capäcunäpä allin ñawillayquiwan licaycälillämay.
4 Sumä munayniyu Tayta Diosllay,
¿imaycamaćh piñacuyniqui untayanꞌa,
malcayqui mañacuylla-mañacuy cayaptinpis?
5 Waꞌacuylläñamá micuynïcunapis.
Sumä wiꞌilläñamá upyaynïcunapis.
6 Muyülïnïćhu yaćhäcunaca asipapämänanpämá ćhulaycälälimanqui.
Ćhïnicünïcuna jamuyapämänanpämá jitaycälälimanqui.
7 Sumä munayniyu Tayta Diosllay,
punta capäcuśhämannuꞌari cutiycälichillämay.
Allin ñawiquiwan licaycälimal salbaycälillämay.
8 Egiptopïtamá üba lantactanu julaycamulanqui.
Juc nasyuncunäta alapaculculmá chayman lantayculanqui.
9 Ćhaclacunäta tuquicta pichayculmi lantayculanqui.
Chaymi allinta sapichacuycul jinantin allpäman juntälälin.
10 Llantuynincuna ulꞌucunätapis llantuyculamá.
Pallaynincuna jatućhaćha cedrocunätapis pampayculamá.
11 Lamarcäcamamá pallaynincuna maśhtacacüla.
Eufrates mayücamamá chillquincuna ćhaycula.
12 Canan,
¿imapïmá ćhaclap inćhancunacta pampaman muyüchinqui,
caminunninpa pasäcuna übap wayuyninta pallalcälinanpä?
13 Munti cuchicunämá mana cäman cutiyalcächin.
Munti uywacunämá lluy camacayalcan.b
14 Sumä munayniyu Tayta Diosllay,
yaꞌacunaman cutiycallämuy.
Janay pachäpïta licaycamullay.
Cay übayquita ñawillayquićhu caycachillämay.
15 Allï maquiquiwan lantacuśhayqui übacta,
quiquiqui tacyaycachishayqui chillquicta licaycullayꞌari.
16 ¡Lantayqui lluy cañaycüśhamá pulumayan!
¡Anyapayniquiwan camacaycüśhamá cayalcá!
17 Aclaycuśhayqui allin nunäta yanapaycuyꞌari.
Tacyaycachishayqui nunap milayninta yanapaycuyꞌari.
18 Jinaptiquim ampïta manaña imaypis laquiculcäśhäñachu.
Cawsayta uycälillämaptiquiꞌa amllactañamá alawapäcuśhayqui.
19 Sumä munayniyu Tayta Diosllay,
punta capäcuśhämannuꞌari cutiycälichillämay.
Allin ñawillayquiwan licaycälimal salbaycälillämay.