Chuya alawana wasiquitamá anlaman muyülächin.

Jerusalentamá pampaman muyüchishacta caćhaycülun.^a

2 ¡Chay wañuchipäcuśhan nunayquicunactamá

ancacunäca micunanpä wicapaycälälin!

¡Aclacuśhayquicunap aychantamari munti uywacunäman alaycälälin!

3 Yawarnintapis jinantin Jerusalenmanmá yacuctanu jićhälälin.

Wañücunäta mayan pampaycüllanpis manamá caycunchu.

4 Muyülïnïćhu yaćhäcunäpa asipäcunanmanmi licalïlälí.

Bisinücunap jamuyänanmi muyülälí.

5 Tayta Diosllay,

¿imaycamamá ñacayäśhun?

¿imaycamamá piñacüśha cayanqui?

¿Wiña-wiñaypächun śhunꞌuyqui timpuyanꞌa?

¿Nina lupayänüchun sïlacuyniqui cayanꞌa?

6 Mana lisishüniqui malcacunäman piñacuyniquita ćhaycachiy.

Śhutiquita mana ćhasquicücunämanꞌari rabyacuyniquita ćhaycachiy.

7 Paycunamari Jacobpa milaynincunacta camacaycülun.

Malcantapis lluymá pulumälächin.^b

8 Awquillücunap mana allinninpïta

amari yaꞌacunawan cutichicuychu.

Pasaypiñam cayalcällá,

jucllañari llaquipäcuyniqui ćhaycamullächun.

9 Salbaycamäní Tayta Diosllay,

śhutiqui sumä caśhan-laycu yanapaycalillämay.

Altuman juluycuśha caśhayqui-laycu

libraycul juchäcunacta pampachaycälillämay.

10 ¿Imapïmá ćhïnicü malcacunaca niyämäśhun

“¿Mayćhütá Tayta Diosnin cayan?”

nil?^c

Malcayquita wañulcachil yawarninta jićhapäcuśhanpi,

tincüninman cutiycachishayquitari licaycälichillämay.

Chaynütac chay juyu malcacunäpis lawćhaśhayquitari licapäcuchun.

11 Taytallay,

prïsu puśhaśha cäcunäpä ayacuyllätari uyaliycälillämay.

Wañuchinanpä cäcunätapis maquiquiwanꞌari salbaycullay.

12 Tayta Diosllay,

muyülïnïcunaćhu yaćhäcunätari jalutacuśhuśhayquipïta

anćhish cutictalä tincüninman cutiycachiy.

13 Yaꞌa uwishniquicunañatacmi,

malcayquiñatacmi

wiña-wiñaypä alawapäcuśhayqui.

Lluy ipa śhamü milaynïcunapis taquicunawanmá alawapäcuśhayqui.