Malcan ipanchayaptinpis Tayta Diosmi ichá ñawillanćhu caycachin
Asafpa isquirbishan.
78
Má,
cuyaśhá malca,
yaćhachicuynïta uyalimayꞌari.
Linliquita quićhatyalcul limapäśhäta uyaliycamayꞌari.
2 Tincuchiyllap willayculmi yaćhaycachishayqui.
Una-unaypi pacaläśha cäcunätamá tantiaycachishayqui.a
3 Uyalishanchiccunäta,
yaćhaśhanchiccunäta,
taytanchiccuna willamäśhanchiccunätamá niycamuśhayqui.
4 Milayninchiccunapïta manamá pacaycuśhunchu.
Aśhwanpam śhamü milayninchiccunaman willaycuśhun,
Tayta Dios munayninwan sumä lulaycuśhancunacta,
äśhalayllaman camana lulaycuśhancunactapis.
5 Jacobmanmi camachicuyta uycula,
Israelmanmi yaćhachicuyta ćhulaycula.
Awquillunchiccunactamari caćhala milaynincunacta yaćhaycachinanpä.
6 Chaynu lulaycula ipa śhamücunäpis lluy yaćhapäcunanpämá.
Paycunapis chulincunacta,
chulicunäpis
willcancunacta willaycälinanpämá.b
7 Chayćha Tayta Diosllaman chalapaculcal
lluy lulaśhancunacta mana unꞌapäcunꞌachu.
Camachicuy nishantapis lulaycälinꞌamá.
8 Chayćha awquilluncunanu
pasaypi cullu linli,
mana cäsucü,
ishcay śhunꞌu,
Tayta Diostapis
ipanchä-cama mana capäcunꞌachu.
9 Canan má,
Efrain ayllucunaca masqui flïchacta
sumä ćhächï-cama cayalcalpis pilyuman lipäcul,
¿manachun ayiculcäla imamá?
10 Paycuna,
Tayta Dios limalicuśhantapis
juc lädumanmá ćhulaycälälila.
Yaćhachicuyninmannu cawsayta manamá munalachu.
11 Aśhwanpam Tayta Dios lulaycuśhancunacta,
sumä-cama lulaycuśhancunacta licapäcuśhantapis unꞌälälila.
12 Awquilluncuna Egipto nasyunpa Zoan lädućhu
cayalcaptinmi sumä lulaycunacta paycunaćhu Tayta Dios lulaycula.c
13 Lamarta wicman-cayman laquilculmi chayninpa pasachila.
Juntuyculmi yacüta śhaycaycachila.d
14 Muyunpam pucutaywan puśhaycula,
tutanpañatacmi nina walayäwan.e
15 Chunyäcäćhümi wancacta laꞌalalcachil
sumä-sumä wayupi yacucta upyaycachila.
16 Wancapïta achca-achca yacucta
yalächimuptinmi mayunu sumä lila.f
17 Chaynu lulaycuyaptinpis paycuna caśhantacmi juchaculcäla.
Chunyäcäćhümari sumä munayniyücäpa cuntran śhalcälälin.
18 Śhunꞌun munaśhallan micuyta mañaśhanwanmá
Tayta Diosta yaćhapayta ćhapapäcula:
19 “¿¡Cay chunyäcäćhu Tayta Dios
micuyta uycamachwanchun imatá!?
20 Aw rasunpa,
wancacta Tayta Dios
wipyaycuptin mayunu yacu yalämul allpäta bundülamá.
Chayurá ¿micuyta uycämachwanlächun imamá?
¿Malcanta aychacta uycamachwanlächun imatá?”
nil.
21 Chayta uyalilmi Tayta Dios sumä piñacüla.
Jacobpämi piñacuynin latäla,
Israelpämi rabyacuynin waläla.
22 Chaynu cala Tayta Diosman mana chalapaculcaptinmi,
pay salbaycunantapis manamá quiripäculachu.
23 Chaynu cayalcaptinpis Tayta Diosꞌa
pucutaycunäta niycuptinmi janay pachaca quićhacacüla.
24 Jinaptinmi Maná nishan micuyta tamyaycachimula.
Janay pachäpi tantactamág micunanpä uycula.
25 Anjilcunap tantantalämi paycuna micaycälila.
Maćhaycälinancamamá micuyta uycuśha capäcula.
26 Inti ishpimunan lädu waywactam altu sïlüpi waywachimula.
Munayninwanmi sur lädu waywacta licalichimula.
27 Jinalculmi allpactanüña paycunaman aychacta tamyachimula.
Lamarćhu aꞌuctanüñam culluśhcunactah uycula.
28 Jamapäcuśhanpa ćhawpinman,
carpancunap muyülïninmanmi palpaycachimula.
29 Jinaptinmi aminancama micapäcula.
Chaynüpam śhunꞌun munaśhancunacta Tayta Dios uycula.
30 Chayta cushisha-cama micuyalcaptinmi,
shimincunaćhu-cama cayalcaptinlämi,
31 Tayta Diospa piñacuynin paycunaman ćhämula.
Jinaptinmi sumänin callpasapacunätalä wañüchila.
Jinantin Israelćhu aclaśhan nunancunactamá camacaycüla.i
32 Jinayaptinpis yapatacmi juchacta lulälälin.
Tayta Dios milagru lulaśhancunactapis mana cäpämá licapäcula.
33 Chaymi jäcalcuynüllacta paycunacta camacaycüla.
Sumä ñacayta unꞌaypi ćhaycachilmá cawsayninta camacaycüla.
34 Tincüninman mućhuycachillaptinmi Tayta Diosta ashiycälila.
Chaylämi filtalcul muyulcul wañuy-wañuy ashiycälila.
35 Chaynäluptinlämi Tayta Dios wancanu
pacaycünin caśhanta yalpaćhaculcäla,
sumä munayniyu Tayta Dios libraycünin caśhanta licaćhaculcäla.
36 Janä shimillanwanꞌa alawaycaćhapäculam.
Limayninwanpis casquiculcälamá.
37 Janä śhunꞌullanwanmi cuyätuculcäla.j
Limalicuyninćhüpis manamá sumächu tacyaycälila.
38 Ñatac Tayta Diosꞌa llaquipayculam.
Juchancunacta pampachayculmi mana camacayculachu.
Achca cutimá piñacuyninta śhaycachila.
Rabyacuyninwan manamá llallichiculachu.
39 Nunacunaca wañucülla caśhantamá Tayta Dios yalpaycula.
Mana cutimul pasacülla waywanu caśhantamá yalpaycula.
40 Ayca cutimá chunyäcäćhu Tayta Diospa cuntran śhalcapäcula.
Ayca cutimá mana imapis caśhanćhu śhunꞌunta nanachipäcula.
41 Yapalcul-yapalculmá Tayta Diosta yaćhapayta ćhapapäcula.
Israelcunap Chuya Tayta Diosnintamá piñachipäcula.
42 Munayninpïta manamá yalpalcälilachu.
Ñacachïnincunapïta libraycälishanta unꞌälälilamá.
43 Egiptoćhu milagrucuna lulaśhanta manamá yalpapäculachu.
Zoan nishan lädućhu sumä lulaycunacta lulaśhanta unꞌälälilamá.
44 Mayucunacta yawarman muyüchiptin upyapäcunanpä
manaña allin caśhantapis manañamá yalpapäculachu.k
45 Chaynütacmi unꞌälälila caćhuypa
pawananpä tanracunactal caćhamuśhanta,
camacaycunanpä ucucuycunactanm caćhamuśhanta,
46 chaynütac talpuynincunacta camacaycünanpä
culucunacta caćhamuśhanta,
talpuyninpa wayuynincunacta pawananpä paćhcaśhcunacta caćhamuśhantapis.o
47 Chaynütacmi üba lantancunacta luntuwan camacaycüśha caśhantapis,
ïgus lantanman asachishancunactapis lluy unꞌälälila.
48 Chaynütacmi unꞌälälila uywancuna
luntuwan camacaycüśha caśhanta,
uwishnincuna räyucunäwan chincächisha caśhantapis.p
49 Tayta Diospa piñacuynin walayaptinmi
sumä ñacayta,
rabyacuyta,
llaquicuytapis caćhäla.
Lluy chaycunamá camacaycunanpä caćhamuśhancunaca cala.
50 Piñacuyninwanmá apachicüla;
nunacunäpa cawsayninta manañamá llaquipayculachu.
Aśhwanpamá lluy camacaycüla.
51 Egiptoćhu wamä chulincunactamá wañüchila.
Cam ayllup wamä chulincunactamari camacaycüla.q
52 Canćhantin uwishtanümá malcanta julaycamula.r
Chunyäninpamá uwishtanu puśhaycula.
53 Allinta licayculmi mana manchalïllacta puśhaycula.
Ćhïnicünincunactañatacmi ichá lamarca pampäla.s
54 Chaypïtam chuya allpanpa culindanman puśhäla.t
Sumä munayninwan llallilculmá alapacuśhan ulꞌüman puśhäla.
55 Israelcunäpa ñawpäninpïtamá nasyuncunäta alapacüla.u
Chay allpacunäta lluy ayllucunämanmi tücäninña cananpä aypuycula.
Chayćhümi israelcunäta carpancunaćhu ayllunpa-cama tacyaycachila.
56 Jinayaptinpis paycunañatacmi janay pacha
Tayta Diosta yaćhapaycuyta munapäculav piñachipäcula.
Yaćhachicuyninta,
camachicuynintapis manamá cäsuculcälachu.
57 Aśhwanpam awquilluncunanüpis cuntran śhalculcul ipanchälälin.
Wicsu lansanümá wicsuycaćhaculcäla.
58 Alawananpä uycunanta lulaśhancunawanmi piñachipäcula.
Taytachanta alawayninwanmi sïlacuyman ćhulapäcula.
59 Chaycunacta licälulmi Tayta Dios sumä piñacüla.
Chaymi israelcunäta licaytapis nï munalañachu.
60 Jinalmi caćhaycüla Silo malcaćhu chuya carpactapis,
nunacunäwan yaćhananpä cä chucllactapis.w
61 Jinaman babulninta ćhïnicünincunap maquinmanmi ćhulaycüla.x
Sumä cayninta paycunap maquinmanmari ćhulaycüla.
62 Malcanwan sumä piñäśha cayalmá ispädawan
camacaycüśha cananpä aclacuśhancäta ćhulaycüla.
63 Müsuncunactapisy ninam camacaycüla.
Chaymi wamlancunapis casaracuy taquicta manaña taquipäculañapischu.
64 Ispädawanmá sasirdütincunapis camacaycüśha capäcula.
Japanyäśha walmincunapis manañamá waꞌapäculañachu.
65 Chayćhümi shincapi malläyäśhanu Tayta Dios śhalcämula.
Sumä-sumä piñäśha apalcaćhäcänümá apalïla.
66 Ćhïnicünincunactamá ayichila.
Wiña-wiñaypämá pinꞌayman ćhulaycüla.
67 Ñatac Josepa aylluncunacta manañamá licayta munalachu.
Efrain aylluctapis manañamá aclayculañachu.
68 Juda aylluctañatacmi ichá aclaycula.
Cuyaśhan Sion ulꞌuctamá aclaycula.
69 Chuya wasinta sïlütanülämá jatu-jatunta lulachila.
Allpätanu wiñaypä tacyaycachishancätanümá tacyaycachila.
70 Uywaynin Davidtamá aclaycula.
Uwish michishanpïtamá julaycamula.
71 Uwishcunäpa ipanpïtam puśhamula.
Jacob malcanta,
Israel tücäninta michiycunanpämari muyuycachila.z
72 Davidꞌa allin śhunꞌuwanmá michiycula.
Allin tantiaywanmá puśhaycula.