Yanapäśhanpïtam Tayta Dios alawan
David isquirbishan taquinapä; taquïcunäpa puydïninpämi.
40
Tayta Diosman mana jucmanyällalmi alcayculá.
Payñatacmi uyshuycamul ayacuylläta uyaliycamäla.
2 Wañuycäpa patanpïtam julaycalläman;
aśhnayä ućhcupïtam salbaycalläman.
Wancap jananmanmi jaluycachimanqui;
palpunäpïtam tacyaycachimanqui.
3 Payta alawaycunäpämi muśhü
taquicta shimïman ćhulaycamula.
Chayta licayculmi achca nunacuna
payta manchaculcal chalapaculcanꞌa.
4 Cushisha cachun Tayta Diosman
chalapacuyninta ćhuläcunaca,
nunatucücunäman mana lïcunaca,
taytachacunacta mana alawäcunaca.
5 Tayta Diosnillay,
achca-achca
milagrucunactam lulayculanqui.
Yaꞌacunap allinnïpa lulaycuśhayquicunacta
manamá yupaytapisa atipächu.
Cay lulaycuśhayquita willacuyta
munalpis manamá camacämanchu.
6 Uywacunacta uycuśhuśhayquipi,
micuycunacta uycuśhuśhayquipïchu manamá cushicuyanqui.
Manatacmá juchacta pampachaycunayquipä
uycuśhunayquipïlächu wañupacuyanqui.
Aśhwanpa anmi uyalicüta ishpiycachimanqui.
7 Chaymi nilá:
“Cayćhümi cayá;
ćhämüñam.
Yaꞌapïmari limayan pitwïsha isquirbishaćhu.
8 Tayta Diosnillay,
munaśhayquita lulaycuyllactam wañupacú.
Yaćhachicuyniquita śhunꞌüćhümá uywaycullá” nil.b
9 Lluy-lluy nunayquicunactamá tincüllanman lulaycuśhayquita willaycú.
Am Tayta Diosnillay tuquictamá
yaćhayanqui upälla mana cacuśhäta.
10 Tincüninman lulaycuśhayquita manamá śhunꞌulläćhüchu uywacú.
Aśhwanpa chalapacuna caśhayquitawan
salbacü caśhayquitam willacú.
Nunayquicunapïta cuyacuyniquitawan
rasun caycuśhayquita manamá pacacuycüchu.
11 Tayta Diosnillay,
llaquipäcuyniqui yaꞌaćhu amari camacächunchu.
Imaypis cuyacuyniquiwan allin cayniqui yaꞌawan caycullächun.
12 Fintaytapis mana atipaycuna achca-achca sasachacuycunamá ñitïlläman.
Quiquïpa mana allinnïcunamá ćhäman.
Manañamá licalcuytapis atipäñachu.
Mana allinnïcuna ächäpïtapis mas-masñamá cacuyan.
Callpätapis lluyñamá apacalpaman.c
13 Tayta Diosllay,
ama chaynu callaychu libraycallämayña.
Tayta Diosnillay śhamullayñari yanapaycamäní.
14 Cawsaynïta camacayta munäcunaca
pinꞌayman ćhulaśha,
pantächisha capäcuchun.
Mana allinnïta lulay munäcunaca
pasaypi pinꞌacüśha ayipäcuchun.
15 Yaꞌapïta burlacücunaca cärantapis
pampäman śhaticuycul ayipäcuchun.
16 Amta ashïcunacá amćhümi sumä-sumä cushiculcanꞌa.
Am salbaycunayquita wañupacücunacá imaypis nipäcunꞌam:
“Tayta Dios altuman juluycuśha cachun” nil.
17 Tayta Diosllay,
mana imayu llaquisha cayällaptïpis amari unꞌaycallämaychu.
Anmá yanapaycamäní,
libraycamäní canqui.
Tayta Diosllay,
jucllañari yanapaycallämay.