Cawsayca pasacüllam
Jedutun taquinanpä David isquirbishan taqui; taquïcunäpa puydïninpämi.
39
Yaꞌami niculá:
“Sumäpamá cawsaycuśhä;
mana allin nunacunäćhu cayal allüpis
mana allincäta manamá limalcunꞌachu;
shimïtapis jaquimäśhämá” nil.
2 Chaymá upällacuycul imactapis mana limalculächu.
Allincällactapis manamá limalculächu.
Jinayaptïpis ñacayní masyacalpamanmá.
3 Śhunꞌú lulićhümá walayan.
Chayman masta tantiaycuptïmá lataypaña latayan.
Jinaptinmi limälüña:
4 “Tayta Diosllay,
imay üra chincacunätapis willaycallämay,
imaycama cawsanätapis niycallämay.
Maynu pasacülla caśhätapis yaćhaycachillämay.
5 Pasacüllactamá cawsaynïta uycamanqui.
Cay watäcuna,
ampá manamari imapischu.
¡Nunacunäpa cawsaynin jämalcuynüllamá!
Selah
6 Nunacunaca llantuynüllamá cayanchic.
Yanꞌal-yanꞌalpämá lulay-lulay cayanchic,
ima cäninchictapis ćhulacuśhanchic
mayanpä quïdanantapis manamá yaćhanchicchu.a
7 “Taytallay,
chaynu captinꞌa ¿imactañam alcayculläman?
Amllamanmá chalapacamullac.
8 Lluy juchäcunapïta julaycallämay.
Luclucunaca asipäcalcämänanpä amari caćhaycallämaychu.
9 Am lulaycunayquita yaćhalmari
imallactapis mana limalcul upällacuyculá.
10 Amañari mućhuchimaychu.
Maquiquita ćhulaycamäśhayquiwan wañulpuyälläñamá.
11 Nunacunäta juchanpi lawćhayculmá tantiaycachinqui.
Sumä cuyaśhantapis puyunümá camacaycülunqui.
Nunaca jämalcuynüllamá cayanchic.
Selah
12 “Tayta Diosllay,
mañacuylläta uyaliycallämay,
ayacuylläta ćhasquiycallämay,
cay waꞌacuynïta licaycallämay.
Ampá jamapacü nunanüllam cá.
Awquillücunanüpis pasacüllam cá.b
13 Amañari piñäśha licapayämaychu.
Manaläpis wañucul chincacuśhäcama
uchuyllactapis cushicunäpä caćhaycamayꞌari” nil.c