Imactapis camä Tayta Diostam alawan
33
Allincäćhu cä nunacunaca cushicuypïta
Tayta Diosta alawaycäliy;
allin nunacunäpa taquiśhancuna sumä-sumämá.
2 Tayta Diosta arpacunawan alawaycäliy;
ćhunca cuirdayu arpaniläcunawan taquiycäliy.
3 Muśhü taquicunawan alawaycäliy.
Cushishalla sumä tuquillacta taquiycäliy.
4 Tayta Diospa shiminꞌa rasuncällamá;
lluy lulaycuśhancunaca chalapacuna allinllamá.
5 Allincätawan tincüllanman lulaycätamá
Tayta Dios cuyan;
cuyacuyninwanmá juntäśha cay allpaca cayan.
6 Tayta Diospa limayninwanmi sïluca lulaycuśha cala.
Jämaycuyninwanmi imaymana uyllurcunäpisa lulaycuśha cala.b
7 Paymá lamarcäćhu yacucunätapis
wacuyllamannu juntuycülun;
nisyu-nisyu yacucunätapis jucllayllamanmá winaycülun.
8 Jinantin pachäćhu cäcuna Tayta Diosta
licapäcul äśhalayllamanc camapäcuy.
Jinantin allpäćhu yaćhäcuna altumanꞌari juluycäliy.
9 Paypa limalcuyllanwanmá lluy camaśha cala.
Paypa niycuśhallanwanmá lluy tacyaycachisha cala.
10 Nasyuncunäpa lulay munaśhancunactamá
mana cäman Tayta Dios muyuchin;
malcacunaca mana allin lulay
munaśhancunactamá mana cäman muyuchin.
11 Tayta Diospa lulay munaśhancunam
ichá wiña-wiñaypä tacyaycun.
Śhunꞌunćhu cäcunaca wiña-wiñaypämá caycun.
12 Tayta Diosman chalapacü nasyunpä maynu cushicuymá.d
Quiquinpä aclacuśhan malcapä sumä cushicuymá.
13 Janay pachäpïmá Tayta Dios licapayämun;
jinantin nunacunämá ñawillanćhu cayan.
14 Payꞌa caycuśhancäpïmá jinantin
pachäćhu cäcunäta licapayämun.
15 Paymá lluy nunacunäpa śhunꞌunta lulala.
Nunacunäpa ima lulaśhancunallapis
paypa ñawillanćhütacmá cayan.
16 Maynu-maynu pilyä nunayu calpis
mandäca manamá salbacunmanchu;
nïtac maynu-maynu callpasapa allinnin nunapis ayinmanchu.
17 Cawallucunaca manamá mayantapis salbaycunmanchu.
Maynu callpasapa calpis manamá libraycunmanchu.e
18 Ñatac cäsucünincunactá ñawillanćhümi
Tayta Dios caycachin;
llaquipäcuyninman chalapacünincunactá licaycunmá.
19 Wañuycäpïmá almanta libraycun.
Micuy wanayćhüpis micuyniyütamá cawsaycachin.
20 Yaꞌanchicꞌa Tayta Diosmanmá chalapacunchic.
Paymá yanapaycamäninchic,
atajaycamäninchic.
21 Payćhümá śhunꞌunchic sumä cushicun.
Śhutin imanuypis caśhanmanmá chalapacunchic.
22 Tayta Diosllay,
anman chalapaculcäśhämannuꞌari
llaquipayniqui yaꞌacunawan caycullächun.