Tayta Diospa llaquipayninpïtam alawan
David lücu-yupayman muyulcul Abimelecman liptin alapacüśhanpi David isquirbishan taqui.a
34
Alefb1 Tayta Diostamá imaypis altuman juluycuśhä;
shimillá imaypis alawaycunꞌamá.
Bet
2 Tayta Diosllamá cawsaynïta
cawsay-cawsayta uywaycaman;
mana nunatacücunämá uyaliycälil cushiculcanꞌa.
Guimel
3 Tayta Diosta altuman juluycuśhun;
śhutinta juclla alawaycuśhun.
Dalet
4 Tayta Diosta ashiycuptïmá uyaliycamäla;
lluy manchacuynïcunapïtamá libraycamäla.
He
5 Payllaman licäcunaca cushicuywanmá chipipicyaycälin.
Imaypis manamá pinꞌayman ćhulaycuśha caycälinchu.
Sayin
6 Cay waccha nunaca ayacuptïpis
Tayta Diosꞌa uyaliycamälamá;
lluy llaquicuynïcunapïta libraycamälamá.
Jet
7 Altuman juluycünincunacta Tayta Diospa
anjilninmá muyülïnincunallaćhu caycul ama-pacha niycun.
Tet
8 Licaycul mallilculꞌari yaćhaycuy Tayta Dios sumä allin caycuśhanta.c
Sumä-sumä cushicuymá payman chalapacücunäpá.
Yod
9 Am japächaśha cäcunaca manchacuywan
Tayta Diosta licaycäliy.
Manchacuywan licaycünincunactá
imapis manamá pishiycunꞌachu.
Caf
10 Cäniyücunäpis wacchayalcälilmi micuypi capäcun;
Tayta Diosta ashïcunätañatacmi ichá
imapis mana faltaycunꞌachu.
Lamed
11 Chulilläcuna,
śhapämuy sumäta uyaliycälinayquipä.
Tayta Diosta manchacuywan cäsucuytamá yaćhaycälichishayqui.
Mem
12 ¿Achca watacuna cawsaytachun munanqui?
¿Sumä cushicuyllaćhu caytachun munanqui?
Nun
13 Chayurá mana allin limaycunapi alluyquita sujitacuy;
shimiqui amari articunacta limayächunchu.
Samej
14 Mana allincunapïta japächacul allincällactari lulaycuy.
Jawca cawsaycällacta ashiycul chaymannu cawsaycuy.
Ayin
15 Allincämannu cawsä nunacunäta Tayta Diosmá ñawillanćhu caycachin;
ayacuynincunactapis uyat-uyatllamá cayan.
Pe
16 Mana allin luläcunäpäñatacmi ichá Tayta Dios cuntran cayan;d
cay allpäćhu manaña yalpalcuśha cananpämá chincächinꞌa.
Tsade
17 Ñatac allin nunacunäpa ayacuynintá Tayta Dios uyaliycunmá;
llaquicuynincunapïta juluycunmá.
Qof
18 Llaquicuywan pasaypi ñitichicüśha cäcunäwanmá Tayta Dios caycun;
llaquicuyćhu cä śhunꞌuyücunätamá pay salbaycun.
Resh
19 Allincäćhu cä nunaca imaymana
llaquicuycunactamá pasaycun.
Jinaptinpis chaycunapi Tayta Diosmá juluycun.
Shin
20 Paymá lluy tulluncunactapis licaycun.
Allin nunäpa jucllay tullullanpis
manamá paquiycuśha canꞌachu.e
Tav
21 Mana allin luläcunätam ichá
quiquinpa mana allin lulayllan wañuyman apanꞌa;
allin nunäta ćhïnicücunaca lawćhaycuśhamá canꞌa.
22 Tayta Diosmá nunancunacta salbaycunꞌa;
payman chalapacücunaca manamá lawćhaycuśhachu canꞌa.