Tayta Diosllamanmi masïsu chalapacun
David isquirbishan taquinapä; taquïcunäpa puydïninpämi.
31
Tayta Diosllay,
amllamanmi pacacaycamú.
Pinꞌayman ama ćhulaycallämaychu.
Allin tincüniquimannu libraycallämay.
2 Sumäta uyaliycamal jucllaña libraycallämay.
Sumä wancanümi pacaycamäní canqui.
Sumänin sigüru cäcänümi salbaycamäní canqui.
3 Pacaycamäní wancamá canqui.
Salbaycamäní murällam canqui.
Śhutiqui allinpä licaycuśha cananpä
caminaycallämay,
puśhaycallämay.
4 Cunca cuchuynïpa ćhulaycälimäśhanpi
julaycallämay;
amllamá pacaycamäní,
licaycamäní canqui.
5 Cay almalläta maquiquimanmá ćhulaycamú.a
Chalapacuna Tayta Diosllay,
libraycallämayꞌari.
6 Tayta Diosllämanmi yaꞌa chalapacullá.
Yanꞌal cä taytachacunacta alawäcunätam ichá ćhïnicú.
7 Cuyacuyniquimá sumä cushicuyta uycalläman.
Anmá llaquicuylläta licayculanqui,
anmá ñacaylläta lisiyculanqui.
8 Ćhïnimänïcunap maquinman manamá jitaycamälanquichu.
Aśhwanpa allinnin jawca allpamanmá ćhulaycamälanqui.
9 Llaquićhümi cayällá.
Tayta Diosllay llaquipaycallämayꞌari.
Nanaycäwanmi ñawilläpis manaña ñawichu.
Aychalläpis manañam aychañachu,
tullulläpis manañamá tulluñachu.
10 Nanaycäwanmá cawsaynïpis camacalpuyällanña.
Llaquicuycäwanmá cawsaynïpis chincacalpuyanña.
Llaquicuynïmi callpäta apayäman,
aychäpis mañamá aychañachu.
11 Lluy ćhïnimänïcunap asipäculcänanmá cayá.
Malcamasïcunap jamuyäculcänanmá cayá.
Lisinacuśhäcunap licayta mana munaśhanmá cayá.
Caminucunaćhu licamäcunäpis
licalcamal-licalcamalmá ayiculcan.b
12 Wañüśha cayätanüñamá manaña yalpapämanchu.
Lluy amshüśha wacuytanüñamá unꞌäläliman.
13 Nunacuna waśhäta limapäcuśhantamá uyalí.
Lluy-lluy muyülïnïćhümá manchachicuyllaña muyuyan.
Yaꞌapa cunträmá juc pinsaylla lluy limanaculcan.
Wañuchipämänanpämari limanaculcan.c
14 Yaꞌañatacmi ichá am
Tayta Dioslläman chalapacamul ní:
“Amllam Tayta Diosní canqui” nil.
15 Ampa maquiquićhümá cawsayní cayan.
Ćhïnimänïcunapïta,
aticaćhamänicunapïta julaycallämayꞌari.
16 Cay nunallayquita ñawillayquićhu caycachimay.
Cuyacuyniquićhu salbaycallämay.
17 Tayta Diosllay,
amllamanmi mañacamullá.
Pinꞌaycäman amari caćhaycallämaychu.
Aśhwanpa mana allin nunacunaca
pinꞌaycäman ćhulaycuśha capäcuchun.
Wañüśhacuna caśhancäćhu upälla capäcuchun.
18 Casquish shimincuna wićhäśha cachun.
Allin nunacunäpa cuntranmá juyucunacta limapäcun.
Nunatucüśhamá jamuyapäcun.
19 Taytay,
maynu sumä-sumämá llaquipäcuyniqui.
Cäsucüniquicunapämá ćhulaycunqui.
Anman chalapacücunätá lluy nunacunap
puntanćhümá camalaycachinqui.
20 Anmá quiquiquiman pacaycunqui
chay mana allin nunacunäpa limanacuynincunapïta.
Cuntran limaśha cä nunacunätam yaćhaśhayquiman
ćhulaycul ñawillayquićhu licaycunqui.
21 Tayta Dios altuman juluycuśha cachun.
Malcäćhu intüśha cayaptïmá llaquipäcuyninćhu
sumä lulaycunacta yaꞌapä lulaycapamäla.
22 Muspäśhanu cayalmi nilá:
“Tayta Dios licaytapis manañamá munamanchu” nil.
Chaynu niyaptïpis yanapaycamänayquipä
ayacuptí am uyaliycamälanquim.
23 Lluy chalapacücunaca,
Tayta Diosta cuyapäcuy.
Paymari chalapacünincunacta ñawillanćhu caycachin.
Nunatucücunätañatacmi ichá
tincüninman sumä-sumätalä uycülun.
24 Tayta Diosman chalapacücuna callpanchaculcay,
amañari imactapis manchaculcayñachu.