Sulpäta uycuyninwanmi alawan
Tayta Diospa alawana wasinta japächaycuśhanpi David isquirbishan taquinapä.a
30
Tayta Diosllay,
alawaycuc
altuman julaycamäśhayquipïmá,
ćhïnimänïcuna asipäcalcämänanta mana munaśhayquipïmá.
2 Tayta Diosllay,
mañacuptïmá allinyaycachimanqui.
3 Tayta Diosllay,
anmá wañuycäpi libraycallämanqui.
Wañuycäpi julaycamalmá cawsayta uycallämanqui.
4 Tayta Diosman chalapacücuna taquicunawan alawapäcuy.
Chuya caśhanpïta altuman juluycäliy.
5 Piñacuyninꞌa rätullapämá.
Llaquipäcuyninñatacmi ichá pasaypipä.
Tutanpa waꞌaculpis wälanpá cuśhishañamá wälaśhun.b
6 Allinllalä cayalmi niculá:
“Manamá imapis pasamanꞌachu” nil.
7 Am Tayta Diosnïmari llaquipayniquićhu
sumä tacyä ulꞌuctanu tacyaycachimälanqui.
Pacacuycuptiquiñatacmi ichá muspaypa-muspälá.
8 Am Tayta diosllätam mañacamullac;
am Taytallá llaquipaycamänayquipämi ayacamullac.
9 ¿¡Wañüluptiꞌa imactamá gänanqui!?
¿¡Pampämaptinꞌa imactamá julucunqui!?
¿¡Pulbuman muyüśhaca alawaśhunquiñachun imatá!?
¿¡Wañüśhaca allin cayniquipi willacunꞌañachun imamá!?
10 Tayta Diosllay,
uyaliycamal llaquipaycallämayꞌari;
Tayta Diosllay,
yanapaycallämayꞌari.
11 Llaquicuynïta cushicuy
paćhcaycaćhaymanmá muyuycachinqui.
Lutu müdanäta wicapalculmá fistapä cä
müdanawan müdaycachimanqui.
12 Chaymá sumä cayniquipi amllactaña mana upällaycullal
altuman juluycuśhayqui,
alawaycuśhayqui;
am Tayta Diosllätamá wiña-wiñaypä altuman juluycuśhayqui.