Aꞌanu cä atajaycamäní amari upatucuycuychu.

Manaña uyalïtucamaptiquiꞌa wañüśhanüñam caycullá.

2 Chuya wasiquiman maquïta chacchalällal

mañacuylläta uyaliycallämayꞌari.

3 Mana allin nunacunäwan,

juyucunäwan

cuscactá amari wicapämaychu.

Paycuna nuna-masincunawan jawca

cawsaypïta limayta limapäcunmá.

Śhunꞌunćhüñatacmi ichá mana allincunälla winalayan.

4 Lulaśhanmannu uycüluy,

mana allinninmannu cutiycachiy.^a

Imam lulaśhancunamannu tincüta uycüluy.

5 Tayta Dios lulaśhancunactawan

camaśhancunacta paycuna manamá licätuculcälachu nï tantiapäculachu.

Chayurá Tayta Diosmi camacaycul manañamá śhalcachipäcunꞌañachu.

6 Mañacuynïta uyaliycamäní Tayta Dios

allinpä licaycuśha cachun.

7 Tayta Diosmi callpanchamäní,

pacaycamäní.

Paymanmi lluy śhunꞌulläwan chalapacú;

paymi yanapaycaman.

Chaymi śhunꞌullá sumä cushisha caycuptin

imaypis taquicunawan sulpäta uycuśhtin alawayculläśhä.

8 Tayta Diosmá malcanpa callpanchaycünin.

Aclacuśhan mandäninpä pacaycünin,

licaycünin.

9 Tayta Diosllay,

malcayquita salbaycuy.

Aclacuśhayquita allinpä licaycuy.

Uwish michïnu michiycul wiñaypä puśhaycuy.