Tayta Diosmi acchïní, salbamäní
David isquirbishan taquinapä.
27
Tayta Diosmá,
acchiycamäní,
salbaycamäní.
¿Mayantamá manchayäman?
Tayta Diosmi cawsaynïta pacaycamäní.
¿Mayantamá manchayäman?
2 Micuna captin millpälälimänanpä cä cuntrá śhamücunaca,
chaynu camacaycämänanpä śhamü mana allin nunacunaca
quiquincunamá saytaculcul anćhanpälälin.
3 Masqui pilyäcuna muyülïnïćhu
cacuyalcaptinpis manamá manchacuná canchu.
Masqui yaꞌawan pilyayta allacuycuptinpis
jawcallamá śhaycuycuśhä.
4 Jucllayllactam Tayta Diosta mañacú,
jucllayllactam munäpis:
Cawsaśhäcama Tayta Diospa wasinćhu imaypis caycuytamá,a
Tayta Diospa sumä cayninta licaycunäpä,
chuya wasinćhu ashiycunäpä.
5 Mana allin muyunca ćhämuptinꞌa
Tayta Diosmi wasinman pacaycamanꞌa.
Yaćhaśhan lulinmanmi ćhulaycamanꞌa,
wancapa janäninmanlämi śhaycaycachimanꞌapis.
6 Muyülïnïćhu cä ćhïnimänïcunactamá llalliycachimanꞌa.
Yaꞌañatacmi chuya carpanćhu payman
uywacunacta uycuśhä.
Cushicuywanmi taquicunawan Tayta Diosta alawaycuśhä.
7 Tayta Diosllay,
mañacamuśhäta uyaliycallämay.
Llaquipaycamalꞌari mañacuynïta uycallämay.
8 Śhunꞌullämi “Tayta Diosta ashiycuy” niman.
Chaymari Tayta Diosllay amllacta ashiycuc.
9 Yaꞌapïta amari pacacuycuychu.
Piñacuyniquićhu cay nunallayquipi amari upatucuycuychu.
Amllamá yanapaycamaní canqui.
Salbaycamäní Tayta Diosllay,
amari caćhaycamaychu nï jitämaychu.
10 Masqui taytá-mamá jitämaptinpis
Tayta Diosnïmá licaycallämanꞌa.
11 Tayta Diosllay,
ćhïnimänïcunapi
licaycul allincäpa puśhaycallämay,
allin tuqui caminuyquip puśhaycallämay.
12 Ćhïnimänïcunap maquincunaman amari ćhulaycallämaychu.
Artish willacücunamá camacaycälälimänanpä
cuntrá śhalcälälisha cacuyalcan.
13 Cayćhu cawsaśhäcama allinninta Tayta Dios
licaycachimänanta tuquictam yaćhaycú.
14 Tayta Diosllaman chalapacuy.
Mana jucmanyällal callpanchacuy.
Awari,
Tayta Diosllaman chalapacuy.