uycuśhayquipïmi mandacüca cushisha cayan.

Llalliycachishayquipïmi sumä cushisha cayan.

2 Śhunꞌun munaśhanmannümá lluy lulayculanqui.

Mañacuyninta manamá unꞌayculanquichu.

3 Talipaycunqui allinpä licaycunayquipämi.

Fïnu ürupi curunactalämi umanman ćhulaycunquipis.

4 Cawsayta mañacuptinpis uyculanquimá.

Wiña-wiñay allin cawsaytalämi uycunquipis.

5 Llalliycachishayquipam sumä cayniqui altuman juluycuśha cayan.

Yanapayniquipam allinpä licaycuśha,

jatunchaycuśha cayan.

6 Wiña-wiñaypämari allincäćhu caycachinqui.

Paywan caycuśhayquimá sumä-sumä cushiycachin.

7 Mandacüca Tayta Diosmanmá chalapacun.

Janay pachäćhu cäcäpa llaquipayninman

chalapacuptinmari mayanpis mana cuyuycachinꞌachu.

8 Lluy ćhïnicüniquicunactamá sumä chalälunqui.

Cuntrayqui cäcunätamá allï maquiquiwan

sumä-sumä chapatälunqui.

9 Tayta Dios,

piñacunayqui timpućhu

nina walayä urnumannümá jitaycülunqui.

Cäraycunayquićhu śhanśhay-śhanśhay

ninawanmá camacaycülunqui.

10 Jinantin pachäpïmá chulincunacta chincächinqui.

Chay nunap milaynincunactamá pichaypa-pichaycülunqui.

11 Masqui cuntrayqui imaymanacta umachanaculpis,

lulapäculpis manamá atipapäcunchu.

12 Flïchayquita paycunaman unanchaptiquimá lluy ayiculcanꞌa.

13 ¡Tayta Dios munayniquićhu altuman juluśha caycuy!

¡Sumä munayniquipïtam taquicunawan alawaycälishayqui!