Mandacüca llalliycunanpämi mañacun
David isquirbishan taquinapä; taquïcunäpa puydïninpämi.
20
Ñacayniquićhu Tayta Diosꞌari uyaliycuśhunqui.
Jacobpa Tayta Diosninꞌari licaycuśhunqui.
2 Chuya carpanpïta yanapaycuśhunqui.
Sionpïta callpanchaycuśhunqui.
3 Lluy uycuśhayquicunäpïtari yalpalcuchun.
Cañaywan uycuśhayquicunäta allinpä ćhasquiycuchun.
Selah
4 Śhunꞌuyqui munaśhantari uycuśhunqui.
Lluy lulay munaśhayquiꞌari lulaycuśha cachun.
5 Chay llalliycuśhayquipïta sumämi cushicuśhun.
Bandiracta altuman pallalcuśhtinmi
Tayta Diospa śhutinta camalachishun.
Lluy mañacuśhayquita Tayta Diosꞌari lulaycuchun.
6 Aclacuśhan mandäcäta Tayta Dios llalliycachinanta yaćhämi.
Chuya janay pachäpi uyaliycamulmá
munayninwan sumäcunacta llalliycachinꞌa.
7 Paycuna pilyupä cä carritancunamanmá chalapaculcan.
Cawalluncunaman atinïdumá capäcun.
Yaꞌanchicñatacmi ichá Tayta Diosninchicpa śhutinman chalapacunchic.a
8 Paycuna jucmanyalculmá palpupäcun.
Yaꞌanchicñatacmi masïsu śhaycuycul tacyaycunchic.
9 Tayta Diosllay,
mandacücäta salbaycullayꞌari.
Ayaculcaptí uyaliycälillämayꞌari.