Llaquicuyninćhu mañacun, cushicuyninćhu alawan
David isquirbishan taqui “wälanpa yalamü luychua” nishan tünuwan taquinapä; taquïcunäpa puydïninpämi.
22
Tayta Diosllay,
Tayta Diosllay,
¿imapïmi caćhaycämanqui?b
¿Imapïmi mana salbaycamanquichu?
¿Imapïmi ayacuynïta uyaliycamanquichu?
2 Tayta Diosllay,
muyun-muyun
mañacuptïpis manamá uyaliycamanquichu.
Tutanpapis jamaycuyta manañamá taliycüchu.
3 Amꞌa,
chuyam canqui,
mandacümi canqui,
Israelpa alawaycuśham canqui.
4 Taytäcuna anmanmá chalapaculcäla.
Chalapaculcaptin anmá librayculanqui.
5 Anman mañacalcämulmi libraycuśha capäcula.
Chalapaculcalmi pinꞌayćhüchu nï capäcula.
6 Yaꞌañatacmi ichá cululla cá;
manañamá nunachu.
Nunacunäpa asipäculcänanmá cá,
malcacunäpa jalutaculcänanmá cá.
7 Lluy licamäcunaca asipäcalcämanmi.
Cuncactapis iwiycaćhaśhtinlämi jamuyapäman:c
8 “Cay nunaca Tayta Diosmanmi chalapacula.
Payꞌari libraycuchun.
Rasunpa cuyalꞌa salbaycuchunꞌari”d nil.
9 Anmi Taytay,
mamäpa patanpi julaycamälanqui.
Anmi mamäpa malayllanćhu jawcallacta caycachimälanqui.
10 Mamäpa patanpi manaläpis yalamuptïmi
ñawillayquiman ćhulaycuśha cayculá.
Mamäpa patanpïtalämi Tayta Diosní cayculanqui.
11 Llaquicuyca janäćhüñamá cacuyan.
Amari caćhaycallämaychu.
Manamá mayanpis yanapaycamäní canchu.
12 Ćhïnimänïcuna türunümá muyülïnïman ćhulacälälin.
Basanpa piña türuncunanümá muyülïnïćhu cacuyalcan.
13 Sumä lücuya piña liyuncunanümá
shiminta äśhacuśha yaꞌaman śhacayalcämun.
14 Yaꞌañatacmi yacu mächïshanu cayällá.
Jinantin tullümi müsïsha cayan.
Śhunꞌüpis sïra-yupaymá chulluyan.
15 Callpäpis cutuśhnümá lluy chaquïlun.
Allüpis laꞌanacacüśhamá cayan.
Wañüśhanu jitalayätañamá caćhaycämanqui.
16 Juyu nunacunaca juyu allꞌucunänümá
muyülïnïman ćhulacälälin.
Ćhaquïtapis,
maquïtapis pasaypictamá luläläliman.
17 Lluy tullücunapis fintaycunamá cayan.
Ćhïnimänïcunamá mana manalcullal
cushiculcänanpä licapayalcäman.
18 Quiquin-pulam müdanäta aypunacülun.
Müdanäpämi chüsanacälälin.e
19 Am Tayta Diosllá,
amari caćhaycallämaychu.
Callpanchaycamäní yanapaycü jucllaña śhaycamuy.
20 Ispädawan wañuchimänanpïta libraycallämay.
Chay allꞌucunap munayninpïta julaycallämay.
21 Liyuncunap shiminpïta salbaycallämay.
Munti wäcacunap wälanpïta libraycallämay.
22 Taytallay,
śhutiquitamá śhullcäcunaćhu willacuśhä.
Juntunacuycunaćhüpis taquicunawanmi alawaśhayqui.f
23 Tayta Diosta manchacuywan licaycücunaca alawaycäliy.
¡Jacobpa milaynincuna altuman julaycäliy!
¡Israelpa milaynincuna allinpä licaycäliy!
24 Wacchacunäpa ñacayninta pay
manamá unꞌaycunchu nï pacacuycunpischu.
Sinuꞌa yalpalayanmá yanapaycunanpä.
Mañacuynintapis uyaliycunmá.
25 Malcayquip juntunacuyninćhümi alawaycuśhayqui.
Manchacuywan licaycüniquicunaćhümi
limalicuśhäta lulaycuśhä.
26 Wacchacunämi maćhaycälinancama micapäcunꞌa.
Tayta Diosta ashïcunämi alawaycälinꞌa.
Wiña-wiñaypämá cawsaycälinꞌa.
27 Jinantin allpäćhu cä nasyuncunämi
Tayta Diosman yalpaćhaculcal filtacalcämunꞌa.
Jinantin nasyuncunäćhu caśhtacunämi
paypa puntanman unꞌulaycälinꞌa.
28 Tayta Diosmá mandacüca.
Paymá jinantin nasyuncunäta mandacun.
29 Mayanpapis cawsaynin manamá lantishachu.
Chaymi jinantin pachäćhu munayniyücunäpis
maćhacaycälil payta alawaycälinꞌa.
Pulbuman lluy cutïcunämari payman uyshuycälinꞌa.
30 Ipa śhamücunämi Tayta Diosllacta sirbiycälinꞌa.
Paypïtamá ipa wiñaycunäman willaycuśha canꞌa.
31 Tincüniquiman licaycü caśhayquitawan,
sumäcunacta lulaycuśhayquicunactamá
manalä näsimücunäman willaycuśha canꞌa.